Bía yian niŋ ámvála dá vé Nzamá nlém mesán
4
Éde,
á bɔbédzaŋ,
bía súgan mína dzaa ya álép mína ébe Ntí Yesus ná,
ané míní ñɔŋ yaá ayágalé ébe bía,
á mfá ámvála mína yian niŋ ya ávé Nzamá nlém mesán,
néa fe mína míní ŋga niŋ yaá,
amvála te éñe míní bíra dɔ bɔ.
2 Amú ná mína yem nzá metsiŋŋ bí ngá vé mína ébe Ntí Yesus.
3 Amú ná nkómánn Nzamá éwɔ wi;
ntélán eki wenan;
é ne ná,
míní tɔbɔ nkánán ya nsémm eveák;
4 kada mot ye ébe mína,
á yemŋe kálá é ñúu deñ á ntɔbán eki été ya ngaŋŋ,
5 se áwulu tugá amvála ané meyɔŋ mefé mé ne kaa áyem Nzamá.
6 Mot enziŋ a táa duan,
ngé ki ávus ya mwanñaŋ ébe dzam te;
dá é tɔɔ́ ná,
ébe é mam má mése,
Ntí éñe aa kun,
amvála te fe bía tára mína dɔ dzó ya ávé mbámm.
7 Amú ná Nzamá eé ndzí bía lwée á mfá mvin mam,
fáve á ntélán eki.
8 Édɔ é ne ná,
éñí áse aa tep métsiŋŋ má,
ăá tep mot binam,
fáve é Nzamá aa vé mína Mfúfúp Nsísim weñ.
9 Ve á mfá edziŋŋ bɔbéñafwáa,
mínăá yi ná me tsili mína dɔ.
Amú ná Nzamá éñe a yágale yaá mína bébyen ná,
dziŋŋán bevɔ́ɔ́ ya ébá bevɔ́ɔ́.
10 Amú ná éñe fe mína bɔ dɔ néa ya é bɔbédzaŋ bése bé ne á Masedonia áse.
Ve,
á bɔbédzaŋ,
bía lép mína ná néa míní bíra dɔ daŋ bɔ.
11 Éde,
bíragán dzéŋ ná míní niŋ mvwaá,
míní bɔ fe é mam menan mína bébyen,
ya fe ábɔ eséññ ya é mó menan,
amvála ané bí ngá mánan mína;
12 á mfá ye ná míní niŋ ya ngaŋŋ ébe bot béye átán,
míní bɔ fe kaa áyi dzóm enziŋ.
Ásɔ́ɔ́ Ntí
13 Á bɔbédzaŋ,
bĭá kómo ki ná míní tɔbɔ kaa áyem á mfá ye ébá bé ntɔɔ́ óyó [nwúán],
ná míní nza tɔbɔ eywiññ amvála ané é bot bevɔ́ɔ́ bé ne kaa átɔbɔ ya oyan.
14 Amú ná ngé bía bwíni ná Yesus aá wú,
a wómo fe;
amvála te fe ébá bé ngá ke óyó [áwú] ébe Yesus,
Nzamá aa ye sɔ́ ya ñí bábe bɔ́.
15 Dzam te édɔ,
bía dzó mína ébe éfíá Ntí ná:
bía é bot bí ngén betétéá,
bía é bot bía lígi akekwíñ ásɔ́ɔ́ Ntí,
bĭá ye tébe é bot bé ntɔɔ́ óyó [nwúán] ósú amvála enziŋ.
16 Ve déá,
Ntí émyen aa ye sigi eé sɔ́ á dzóp,
ya kíŋŋ édzwée ya é kíŋŋ ntébosú baángel,
ya fe é kíŋŋ tɔ́ŋ Nzamá,
éde ébá bé wú yaá ébe Kristo ébɔ́ bá ye tára wómo.
17 Véa,
bía é bot bí ne betétéá,
bía ye dzíga bétban nsámá mbɔ́ɔ́ bíabe bɔ́ á mikút á mfá áke koan ya Ntí á nyem dzóp,
amvála te édɔ bía ye tɔbɔ bíabe Ntí kɔ́mm áse.
18 Édɔ é ne ná,
foŋŋán milém ya bífíá bí,
bevɔ́ɔ́ ya ébá bevɔ́ɔ́.