Bá lóm Timoteo
3
Éde ákoan ná bí sés fe dɔ nzomo,
éde bí ngá yén mvéáñ ná bí lígi etámm Átenas.
2 Ané bí ngá lóm mwadzaŋ wea Timoteo,
bíabe bɔ́ bía bɔ fe éséññ Nzamá fufúlu ébe é mbamba fwéñ Kristo,
á mfá áyéme mína ya álép mína ébe mbwínánn wenan;
3 ná mot enziŋ a nza fógan ákála bindáglé bíte,
amú ná mína bébyen mína yem ná ya dzam te édɔ bí ne ntélán.
4 Amú ná,
é tám bí mbé bíabe mína,
bía tára mína dzó ná bí nkún yén bindáglé,
néa fe dá é ngá bɔ,
amvála ané mína yem.
5 Akála dzam te,
ákoan ná ma mĕé mbé fe nzomo,
éde me ngá lóm Timoteo ná me yem ébe édí ye á mbwínánn wenan,
a nza bɔ amvála enziŋ ná mbóble bot á bóble yaá mína;
éde éséññ dea dá é súgan nzu bɔ kaa eban.
6 Ve éndagá,
Timoteo a búlán yaá ébe bía,
eé sɔ́ ébe mína;
ñí á sɔ́ fe ya bía bembamba mefwéñ méye á mbwínánn wenan ya édziŋŋ denan,
ya fe ná,
tám áse míní belé bía mbamba osímánn,
míní bíra bía kómo yén,
ntéññ mbɔ́ɔ́ fe ané bía bía kómo fe mína yén.
7 Édɔ,
á bɔbédzaŋ,
ébe é dzóm ése bía yi,
ya fe bindáglé byea,
bía tɔbɔ ya mfoŋann mílém á mfá wenan ébe mbwínánn wenan.
8 Amú ná,
éndagá éñe bí ŋga niŋ yaá,
ngé mína míní yém nguu ébe Ntí.
9 Nzá akíba fá bí ne búlán vé Nzamá á mfá wenan,
ya mésán mése bí ngá sán ya mɔ ébe ású é Nzamá wea ákála denan;
10 éde bí ngá bíra yaglan alú ya ó mos,
ná bí ne yén mésú menan,
ya fe ná bí sóŋan édí dá dzéŋ á mbwínánn wenan?
Méyaglán Pablo ya émá é bot bábe bɔ́ bá bɔ eséññ fufúlu
11 Édɔ ná,
Nzamá émyen,
ya Éséá wea,
ya fe Ntí wea Yesus,
éñe á léregé é nzenn dea ébe mína.
12 Ve Ntí á bɔɔ́ge ná míní vém ya átɔbɔ fe ndzálánn ya edziŋŋ ébe bevɔ́ɔ́ ya ébá bevɔ́ɔ́,
ya fe á mfá bot bése amvála ané bía bía bɔ fe dɔ ébe mína;
13 á mfá ye ná,
á yém mílém myenan kaa meku á ntɔ́pbán eki ébe ású Tará,
ya é Nzamá wea,
ébe ásɔ́ɔ́ Ntí wea Yesus bábe mítɔ́pbán mí bot myeñ.