BEKOLOSENSE
É Kálara Bekolosense
1
Pablo,
ápostol Yesukristo amú nkómánn Nzamá,
ya mwadzaŋ Timoteo,
2 á mfá mitɔ́pbán ya bebébélá bé bɔbédzaŋ ébe Kristo béye bé tɔɔ́ á Kolosa.
Mvɔmm ya mína,
ya mvwaá,
ébe Nzamá Éséá wea.
Ávé akíba ákála bebwíni béye á Kolosa
3 Bía vé Nzamá akíba,
Éséá Yesukristo Ntí wea,
bíí yaglan fe bíyɔŋ bíse ákála denan,
4 niané bíá wórán mbwínánn wenan ébe Kristo Yesus ya fe edziŋŋ míní belé ébe mítɔ́pbán míse,
5 amú oyan wenan bá baale wɔ á dzóp été,
éwí míní ngá tára wók ya bébélá efíá,
mbamba fwéñ,
6 éwí ó sian yaá ébe mína;
amvála ané wá ke fe wá wúm bibumá ya ávém éniŋ ngúrá,
amvála te fe eé bɔ ébe mína atéé ye é mos míní ngá wók ya áyem é mvɔmm Nzamá á bébélá été,
7 ané míní ngá yága ébe Epafras,
ndzindziŋŋ oloá fufúlu ya bía,
éñí a ne bébélá mvwála bíséññ Kristo ákála denan,
8 éñe fe a ngá lére bía édziŋŋ denan ye á Nsísim été.
Áyaglan ákála bebwíni béye á Kolosa
9 Amú dzam te,
bía,
atéé ye é mos bí ngá wók dɔ,
bĭá dzɔgɔ ná bía yaglan ákála denan ya ádzaa ná míní tɔbɔ ndzálánn ya nyemann ye á nkómánn weñ,
á fak ése ya á kén ése ye á nsísim été;
10 á mfá ye ná míní wulu amvála ané dá ñep ya Ntí,
míníí vé ñí nlém mesán ébe dzam áse,
míníí wúm bibumá bíye bembamba mibɔann míse,
míníí vém fe ébe á nyemann Nzamá;
11 tɔbɔgán ya nguu ése ámvála é nguu edzwée ye é dúmá deñ e ne ná,
míní tɔbɔ mbán ya edzíp ya mesán;
12 míníí vé fe Éséá akíba,
éñe aá téle mína mikɔkgán ná míní ñɔŋ ngap ébe é tsígá mitɔ́pbán mí bot éyéá été;
13 aá koro bía ébe edzwée ye ó dzíbi ósí,
á kéñ bía téle édzwée ngɔ́mán ndzindziŋŋ mwán weñ,
14 ébe éñe bí belé akoroga [ya mékií meñ],
ndzámann misémm.
Éwólo Kristo dá kúluban éyéá été
15 Éñe a ne évagle é Nzamá a ne kaa áyéne,
ntóó Mwán ye é dzóm áse bé ngá vele.
16 Amú ná baá vele byém bíse ébe éñe
á dzóp été,
ya é sí ñí,
émá má yéne
ya émá mé ne kaa áyéne;
ané bítɔɔ́ bídzwée,
ané menguu bidzwée,
ané betébosú,
ngé ki bengɔ́vina,
bé ngá vele byém bíse ébe éñe ya akála deñ.
17 Éñe a ne byém bíse ósú,
ébe éñe byém bíse byá bí tɔɔ́ fe nkomann.
18 Éñe fe a ne nló ye é ñúu
é ne ekóánn bebwíni,
éñe a ne atáraga,
ntóó mot ye bewú été,
á mfá ye ná éñe á tébe dzam áse ósú.
19 Amú Nzamá a ngá yén mvéáñ ná
ndzálánn ye mam mése éñe ó tɔbɔ ébe éñe,
20 ya ébe éñe,
aá bera álat dzóm áse angɔmm ébe émyen,
eé vé mvwaá ákála mekií méye é krús deñ,
ané é byém bí ne é sí ñí,
ngé ki é byém bí ne á dzóp été.
21 Éde mína,
ébe métám ómvús míní mbé beyín,
minzínzíŋŋ ákála osímánn wenan ye á bembéa mibɔann été.
22 Ve éndagá a kom yaá elat mínabe bɔ́ ya é ñúu mison deñ,
ákála awú deñ,
á mfá ye ná á lére mína ébe ású deñ mína mífúfúp,
míní tɔɔ́ kaa meyeŋŋ,
kaa ki ya meku.
23 Ngé é ne bébélá ná,
míní tɔɔ́ mbán á mbwínánn été,
mbemann,
kaa ki áfógan ébe oyan ye é mbamba fwéñ míní wók yaá,
éñí bá kat fwéñ ébe byém bíse bíye bí ne mvelann á dzóp ásí,
édí te fe ma Pablo bé téle ya ma dɔ mvwála bíséññ.
Éséññ Pablo ékóánn bebwíni ye á Kolosa
24 Éndagá ma sán ébe midzuúk myam akála denan,
ma dzálá fe ébe mámyen mídzuúk myá dzéŋ ébe Kristo,
akála é ñúu deñ,
édɔ é ne ekóánn bebwíni.
25 Édí te édɔ bé ngá téle ma mvwála bíséññ,
amvála ané mbaale ye éséññ Nzamá a vé yaá ma á mfá wenan,
ná me mana dzálá éfíá Nzamá,
26 édí dá nzaman kén mot dá é tɔɔ́ fe asweññ metám méye ókuá ya mimyee mí bot,
ve éndagá é léreban yaá ébe mítɔ́pbán mí bot myeñ;
27 ébe ébá meyɔŋ mefé été,
Nzamá a ngá kómo lére ntam ye á dúmá ye édí dá nzaman kén mot dí,
édɔ e ne é Kristo a ne mína été,
oyan ye á dúmá.