4
Édɔ ná,
é bɔbédzaŋ bam,
mindzindziŋŋ ya ébá ma bíra síman,
mesán mam ya é korona dam,
tébegán nguu néa ébe Ntí.
Abwiññ mvwaá
2 Ma dzaa Evodia,
ma dzaa fe Sintike ná bé belé awókgán ébe Ntí.
3 Ya fe wa ñá mwíi eséññ,
ma dzaa wa ná ó ke vwála biningá béte,
ébá bíabe bɔ́ bí lúman yaá fufúlu ákála mbamba fwéñ,
ya Klemente,
ya fe ébá bevɔ́ɔ́ bá séñ fufúlu ya ma,
ébá bíyola byeba bí ne ntsilann ábá ye éniŋ.
4 Sánŋán eyɔŋ ése ébe Ntí.
Ma baale dɔ dzó ná:
Sánŋán!
5 Bot bése bé yemŋe áñep denan.
Ntí a ntɔɔ́ bebeñ!
6 Dzam enziŋ é táa mína kpoo milém ábum;
ve ébe dzam áse,
léregán dɔ Nzamá ya ndzaá,
ya meyaglán,
míníí síli ñí dɔ ya ávé akíba.
7 Éde é mvwaá Nzamá da lot otémŋa óse,
da ye kálá mílém myenan,
ya ásímánn denan ébe Kristo Yesus.
É mam bá yian belé mésímánn
8 Á bɔbédzaŋ,
édí dá súgan é ne ná:
É mam mése mé ne bébélá,
é mam mése mé ne ya ngaŋŋ,
é mam mése mé ne tételé,
é mam mése mé ne mfúbánn,
é mam mése mé ne ya edziŋŋ,
é mam mése mé ne ya mbamba ewógá,
ngé dzam enziŋ ye é ne ya esós,
ngé dzam enziŋ ye ólugú,
émá méte émɔ ñɔŋŋán.
9 Éde,
é mam míní ngá yága,
ya émá míní ngá ñɔŋ,
ya émá míní ngá wók,
ya fe émá míní ngá yén ébe ma,
émá méte émɔ bɔgán,
véa Nzamá ye á mvwaá aa ye tɔbɔ ya mína.
10 Maá bíra sán ébe Ntí ná,
nde míní bera yaá vuman osímánn ye ná mína baale ma;
bébélá a ne ná,
nlém ó mbé ó kele mína ó yóp,
ve afóo édɔ míní ngá dzéŋ.
11 Măá kɔ́bɔ dɔ ákála ná ma yi dzóm enziŋ,
amú me yága yaá ná ma yébe ábímm áse me ne belé.
12 Ma yem ániŋ ya bitun bí mó,
ma yem fe niŋ ya byém bíí fwíige;
ébe mam mése,
ya dzam áse,
me mana yaá yága etɔɔ́ ye éniŋ bidzí byá fwíige,
ngé ki édí ye áwók nzeñ;
ané ániŋ ya abwiññ byém,
ngé ki édí byá dzéŋ.
13 Me ne nkɔkgán á mfá dzam áse ébe Kristo éñe aa vé ma nguu.
14 Ve fáve ná míní bɔ yaá ededea mvéáñ ná mína ñɔŋ ngap fufúlu ébe bindáglé byam.
15 Á bot béye á Filipos,
mína bébyen mína yem ná atáraga ye á nkatann mbamba fwéñ,
niané me ngá kólo á Masedonia,
ekóánn bebwíni enziŋ deé ndzí ma vé dzóm enziŋ ye é byém me ngá yi,
fáve mína etámm,
16 amú ná,
atwaa á Tesalonika,
ñí ya mína lóm fe ma é byém me ngá yi,
álot eyɔŋ evɔ́ɔ́.
17 Se ná ma kómo medás,
ve fáve ná ma dzéŋ á mfá wenan ébumá dá vém ébe mína.
18 Ve ma me ñɔŋ yaá dɔ ásesé,
me mbelé fe eé fwíige,
me bíra yaá dzéñ;
niané me ngá túga ñɔŋ ébe Epafrodito métómm míní ngá lóm ma,
beñá metúnŋa méye mbamba mbwánn énum,
émá má vé nlém Nzamá mesán.
19 Éde é Nzamá wɔm aa ye mína dzálá ya é dzóm áse mína yi,
amvála ané mítam míye á dúmá myeñ mí ne ébe Kristo Yesus.
20 Dúmá é tɔbɔgé ya Nzamá,
é Tará wea kɔ́mm ya kɔ́mm.
Amén.
Míbóló myá súgan
21 Bérágán ya bebwíni bése,
ébe Kristo Yesus.
É bɔbédzaŋ bé ne bíabe bɔ́ bá bérán ya mína.
22 Bebwíni bése bá bérán ya mína,
ádaŋdaŋ ébá béye é ndá Sesar.
23 É mvɔmm Ntí Yesukristo é tɔbɔgé ya mína bésesé.