Mbéámbéá eniŋ, fáve ébe Kristo etámm
3
É bɔbédzaŋ bam,
édí dá belan é ne ná,
míníí sán ébe Ntí,
măá yén dɔ dzam enziŋ ná ma bera mína tsili dzam avɔ́ɔ́ ya avɔ́ɔ́,
néa éñe mína yémbe.
2 Tɔbɔgán ya bemvú nkée,
tɔbɔgán ya bembéa bebɔ biséññ nkée,
tɔbɔgán ya betene meñúu nkée;
3 ákála ná,
bía bí ne nkíkgán akeé,
bía é bot bía kaŋ Nzamá á Nsísim été,
bíí vága fe ébe Kristo Yesus,
kaa ki átɔbɔ ya ñúu mison mebúnn.
4 Afáŋbɔ ná ma me belé fe é mam me ne tɔbɔ ya ñúu mison mebúnn.
Ngé mot enziŋ mfé aa tém ná a belé mam á mfá ná átɔbɔ ya ñúu mison mebúnn,
ma ma daŋ.
5 Bá kík ma akeé alú mmom,
me ne mwann Israel,
mot ye áyɔŋ Benjamín,
énzénzaŋ bwann Beebreo me ne ñá mfaŋ mwann Ebreo;
á mfá nkɔɔ́ metsiŋŋ me ne mwann Fariseo;
6 á mfá abéánn,
me ngá dzéŋ ekóánn bébwíni ásí;
á mfá nzósoó ye á nkɔɔ́ metsiŋŋ,
ma kaa meku.
7 Ve é mam mé mbé ané ábúánn á mfá wɔm,
me ñɔŋ yaá mɔ ané adzímlé,
ákála Kristo.
8 Akekwíñ ná,
me ngén fe ma ñɔŋ mam mése ané adzímlé,
ngé ma kanan ya mɔ ya é mora ntam a ne ébe nyemann Kristo Yesus,
Ntí wɔm.
Ya ákála deñ,
me dzímle yaá ásesé,
ma ñɔŋ fe dɔ ané mbíán,
á mfá ye ná me ñɔŋ Kristo,
9 ma bé koan fe ya ñí ébe éñe;
ma kaa ábelé é nzósoó aa sɔ́ ébe mámyen,
éñí á ne éñí ye á nkɔɔ́ métsiŋŋ,
ve fáve éñí ye ábwíni Kristo,
é nzósoó aa sɔ́ ébe Nzamá ákála mbwínánn;
10 á mfá ye ná me yem ñí,
ya fe é nguu ye á nwómán míwúán deñ,
áfulan ya ñí ébe nyénánn bíndáglé weñ,
áfonan fe ya ñí ébe áwú deñ;
11 ná me ke koan ya nwómán míwúán ámvála enziŋ.
12 Éde se ná me koan yaá ya dɔ,
ngé ki ná me dzálá yaá dɔ,
ve fáve ná ma tsini ósú,
ngé é ne bɔban ná me biñ édí Kristo Yesus ñí a ngá biñ fe ma ya dɔ.
13 Á bɔbédzaŋ,
mámyen ma măá ñɔŋ ki ná me mbelé dɔ;
ve ma bɔ dzam avɔ́ɔ́;
ávwían édí é lígi yaá ómvús,
meé sám nlém édí é ne ósú;
14 ma tsíni ósú ná me dzálá,
á mfá ye ná me wún é dás é ne é mora ékígá Nzamá ébe Kristo Yesus.
15 Édɔ ná,
bía é bot bésesé bí ntɔɔ́ beñábot,
néa éñe bí témŋán,
ngé mína síman dzam enziŋ afé,
Nzamá ñí aa ye fe mína dɔ lére.
16 Ve fáve ná bía yian niŋ ámvála bí koan yaá ya dɔ [bí wórágánán dzam avɔ́ɔ́].
17 Á bɔbédzaŋ,
mína bɔgán fe bevú fufúlu ya ma.
Dággán fe ébá bá niŋ ámvála éfonann míní belé ébe bía.
18 Amú ná,
ámvála me kɔ́bɔ yaá mína dɔ abwiññ biyɔŋ,
ma kɔ́bɔ fe dɔ éndagá ya míige ó mís ná,
abwiññ bot dá wulu deé síŋ é krús Kristo;
19 ásúgánn deba é ne ntsamann,
é nzamá weba éñe a ne mébum meba,
é dúmá deba da é ne osoán.
Ébá béte bá síman fáve mam méye é sí ñí.