Ámvála osímánn Yesus
2
Ya dzam te édɔ,
ngé efíá melépgá enziŋ é ne ébe Kristo,
ngé mfoŋann nlém enziŋ ó ne ya édziŋŋ,
ngé awókgán enziŋ ye á Nsísim,
ngé ki nlém edziŋŋ enziŋ,
ya nyénánn engóngɔ́ɔ́,
2 dzálágán ma ya mesán ná lút,
á mfá ye ná míní tém dzam avɔ́ɔ́,
míní tɔɔ́ ya edziŋŋ evɔ́ɔ́,
nlém mbɔ́ɔ́ ébe otémŋa ovɔ́ɔ́.
3 Kaa ábɔ dzam enziŋ á mfá ábúánn mot émyen,
ngé ki ya nzeze engúŋ,
ve fáve ya nsilann ñúu ósí,
míní ñɔŋ é bot bevɔ́ɔ́ ná ébɔ́ bé tára tébe ósú ya mína bébyen.
4 Kada mot a táa dzéŋ é mvéáñ deñ émyen,
ve fáve éñí ébá bevɔ́ɔ́.
5 Éde mína belégán fe osímánn amvála ané Kristo,
6 afáŋbɔ ná émyen éñe a tɔɔ́ Nzamá,
ñí eé ndzí ñɔŋ etɔɔ́ Nzamá deñ
ané é dzam bá kárán ya dɔ,
7 fáve ná a ngá téle émyen á mféŋŋ,
á twáa etɔɔ́ óloá,
ntéññ mbɔ́ɔ́ ané mot binam.
8 Ñí a ntɔɔ́ ntéññ mbɔ́ɔ́ ané mot binam,
á sili é ñúu deñ émyen ósí,
a súgan bɔ mewók ya akekwíñ awú,
ádaŋdaŋ ná awú ye á krús.
9 Ya dzam te édɔ Nzamá aá bíra ñí ádaŋ bére ó yóp,
a vé fe ñí éyola é ne eyola áse áyóp;
10 á mfá ye ná ébe éyola Yesus,
abɔ́ŋŋ áse é kútbe ó sí,
ané ébá bé ne á dzóp,
ané ébá bé ne ósí,
ané ébá bé ne ki á sí été;
11 dém áse dá é mem fe ná
Yesukristo éñe a ne Ntí á mfá ye ébe é dúmá Tará Nzamá.
Eyéá ye é sí ñí
12 Édɔ ná,
á mínzínzíŋŋ myám,
amvála ané míní bɔ yaá mewók tám áse,
se fáve éyɔŋ me ne bíabe mína,
ve ádaŋdaŋ áwola dí éyɔŋ me ne kɔɔ́,
séñŋán ákoroga denan ya nkée,
ya ekɔ wɔŋŋ,
ya fe áku beñeñeá.
13 Amú ná Nzamá éñe aa vé mína,
átára ya nkómánn ye mbɔann eséññ,
ná é mbamba ntélán mam weñ á dzálában.
14 Bɔgán mam mése kaa miswa kaa ki ya nléránn benzósoó,
15 á mfá ye ná míní tɔbɔ kaa meku ya fe mikeññ,
míní tɔɔ́ fe é bwán Nzamá bé ne kaa bidzo énzénzaŋ ye ékúkwát ya mbéa myee bot été;
énzénzaŋ ye ébá mína feañ été amvála ané atéteñ é sí ñí été,
16 míníí bánbe éfíá ye éniŋ été,
á mfá ye ná ma me belé fe é dzam ma tɔbɔ ya dɔ engúŋ é mos Kristo;
dá é tɔɔ́ fe ná meé ndzí mára á nzeze,
ngé ki ábɔ eséññ á nzeze.
17 Ve,
atwaa ngé ma dzólo amvála ané metúnŋa,
ya ébe édí ma séan ya dɔ á mfá ye á mbwínánn wenan,
ma sán,
ma daŋdaŋ fe sán fufúlu bíabe mína bésesé.
18 Ntéññ mbɔ́ɔ́ mína sánŋán fe,
mína sánŋán fe ya ma fufúlu.
Timoteo bá Epafrodito
19 Ve ma yana ébe Ntí Yesus ná,
me dzíga mína lóm Timoteo,
á mfá ye ná,
niané me wók yaá méfwéñ menan,
ma me biñ fe nguu á nlém.
20 Amú ná mĕé belé ki mot enziŋ mfé ye a belé ámvála áwórán dam,
éñí a ne ya é ñá nlém aa ye ñí kelebe ó yóp á mfá ye ákómo áyem é mam menan.
21 Akála ná bésesé bá dzéŋ é mam meba bébyen,
ve se émá Yesukristo.
22 Ve mína mína yem é fúlú deñ,
ná á séñ yaá bía ñí amvála ané mwán bá éséá,
á mfá ye á nkatann mbamba fwéñ.
23 Ya dzam te,
éñe fe ma yana ná ma ye mína ñí dzíga álóm,
é tám me yem yaá mam méye ásúgánn dam.
24 Éde,
me tɔɔ́ ya mebúnn ébe Ntí ná,
mámyen ma ma ye fe nzu avóó.
25 Ve me ngá ñɔŋ ná,
dá yian ná me lóm mína mwadzaŋ Epafrodito,
bía ñí bí ne bebɔ biséññ ya bwann bénzima fufúlu,
éñe fe míní ngá lóm ma ya ñí ya avwálá á mfá ye é mam me ngá yi.
26 Dá é tɔɔ́ fe ná,
ñí a ngá bíra fe mína kómo yén bésesé,
á mbé a tɔɔ́ éywiññ été,
amú mína bésesé mína wók ná aá ku nkúkwann.
27 Aá ku fá nkúkwann,
akekwíñ ná a ngá lík sɔŋ e yɔ́ɔ,
ve Nzamá aá yén ñí engóngɔ́ɔ́;
se fáve éñe etámm,
ve ya fe ma,
á mfá ye ná eywiññ é nza daŋ ma loran.
28 Dzam te édɔ ma bíra mína ñí kómo álóm ná,
niané mína ye ñí bera yén,
míní ŋga sán;
véa ma me lígi fe me tɔɔ́ kaa daŋ bera ábelé eywiññ.
29 Édɔ ná,
ñɔŋŋán ñí ébe Ntí ya mesán mése;
ébá bá bé ne fe ané éñe,
bíragán bɔ́ vé ngaŋŋ.
30 Amú ná,
ákála éséññ Kristo édɔ aá lík ya dɔ sɔŋ e yɔ́ɔ,
eé yébe ná aa niŋ áŋgónó eniŋ á mfá ye ná ábelan ya ma,
ámvála mína míní ngá yian dɔ ábɔ.