Á mfá mítɔ́pbán mí bot míse ébe Kristo Yesus,

émí mí ne á Filipos fufúlu ya betébosú bábe bebɔ bíséññ.

2 Mvɔmm é tɔbɔgé ya mína ya é mvwaá é Tará Nzamá wea ya éñí Ntí Yesukristo.

3 Ma vé é Nzamá wɔm akíba éyɔŋ ése ma síman mína,

4 éyɔŋ ése ma dzaa ákála mína bése,

ma bɔ ndzaá te ya mesán,

5 ébe éfulann denan ye á nkatann mbamba fwéñ atéé ye é mos ósúá ye anzukwíñ áwola dí;

6 me tɔɔ́ ya mebúnn ébe é dzam dí ébyen ná,

éñí a ngá tára bɔ mbamba eséññ ébe mína,

aa ye dɔ dzálá akekwíñ é mos Kristo Yesus.

7 É ne ma nzósoó ná me tém é dzam dí ébe mína bésesé,

akála ná me belé mína á nlém wɔm été;

ané á mibok myam,

ngé ki meé vé eyalann ya átéle mbamba fwéñ ná a ne bébélá,

mína bésesé mína ñɔŋ mvɔmm fufúlu bíabe mína.

8 Amú ná Nzamá a ne ma ngañiá ébe ámvála ma bíra mína kómo áyén á nlém wɔm été mína bésesé ya édziŋŋ Yesukristo.

9 Édí édɔ ma dzaa á méyaglán été,

ná:

édziŋŋ denan é bíra daŋdaŋ áfwíige á nyemann ya á kén ése;

10 ná míní yem bíli édí dá daŋ ya mvéáñ,

á mfá ye ná míní tɔbɔ tételé kaa ki ya meku ébe é mos Kristo;

11 míníí tɔɔ́ fe ndzálánn ya ebumá ye á nzósoó,

édí é ne ébe Yesukristo á mfá dúmá ya ólugú Nzamá.

12 Á bɔbédzaŋ,

ve ma kómo ná míní yem ná,

mam méye ébe ma,

má súgan bíra ávwála ná,

mbamba fwéñ á ke aa vém;

13 akekwíñ ná nkeán míbok wɔm ákála Kristo ó mana yaá kwíñ éndendaŋ ébe bwann benzima bése béye á kpatéle,

ya fe ébá bése bevɔ́ɔ́.

14 Éde fe ábwiññ bɔbédzaŋ bevɔ́ɔ́,

béé tɔbɔ ya Ntí mebúnn ákála míbok myam,

bé ŋga bíra yaá belé aywá á mfá ákat éfíá Nzamá kaa ákɔ wɔŋŋ.

15 Akekwíñ ná bevɔ́ɔ́ benziŋ bá kat é fwéñ Kristo ya evínn ya fe ya mitéé;

ve ébá bevɔ́ɔ́ ya mbamba nlém.

16 Éde bevɔ́ɔ́ benziŋ bá kat é fwéñ Kristo á mfá ábúánn mot émyen,

se ya beñá mekéá,

béé tém ná néa,

éñe bá kɔgle ma bindáglé á ndá mibok.

17 Ve ébá bevɔ́ɔ́ ya edziŋŋ,

béé yem ná bé téle yaá ma,

á mfá ákam ya mbamba fwéñ.

18 Éde dzé?

Ámvála ásesé é ne bɔ,

ané se ya beñá mekéá,

ngé ki ya bébélá,

bá kat é fwéñ Kristo;

ébe édí te édɔ ma sán,

ma ye fe tsíni ya mesán.

19 Amú ma yem ná,

ébe méyaglán menan ya ávwálá Nsísim Yesukristo,

dzam te dá ye ma súgan ya filí.

20 Amvála é ne ma ededea nkómánn ya oyan ye ná măá wók osoán amvála enziŋ,

fáve ná ya filí ése,

ané ma niŋ,

ngé ki awú,

atwaa áwola dí,

ané ki ábɔ tám áse,

Kristo éñe aa ye tɔbɔ mbélánn ó yóp ébe éniŋ dzam.

21 Amú ná á mfá wɔm ániŋ éñe a ne Kristo,

áwú dá é ne fe abúánn.

22 Ve ngé éniŋ ye míson dam,

dá dá súgan bɔ ya eban á mfá éséññ,

véa măá yem fe édí me tɔ́pge.

23 Akála ná,

ébe mam méte mé beáñ émɔ má fít ma,

meé bíra kómo ke átɔbɔ bía Kristo,

édí te fe dá dá súgan daŋ ya mvéáñ;

24 ve á mfá ye é mvéáñ denan,

dá dá daŋ yian ná me tsíni éniŋ míson dam.

25 Édí édɔ me tɔɔ́ ya dɔ mebúnn,

ma yem ná ma ye tɔbɔ,

ma ye tsíni me tɔɔ́ bíabe mína bésesé,

á mfá mévémm menan ya mesán méye á mbwínánn;

26 á mfá ye ná,

mévágá menan ákála dam mé kɔgle ébe Kristo Yesus,

ébe é tám ma ye bera tɔbɔ énzénzaŋ denan.

27 Fáve ná,

niŋŋán á bot été amvála ané dá ñep ya é mbamba fwéñ Kristo,

akekwíñ ná ngé ma nzu mína áyén,

ngé ki ná ma tsíni me tɔɔ́ kɔɔ́,

mé wók ná míní yém ná séŋŋ ébe nlém mbɔ́ɔ́,

ya awókgán avɔ́ɔ́,

míníí lúman fe fufúlu ákála mbwínánn ye á mbamba fwéñ;

28 kaa ki kɔ wɔŋŋ enziŋ ébe ébá bá ke mína á ngamm áyát.

Édí te,

dá lére ébe bɔ́ á ntsamann weba,

ve á mfá wenan,

ákoroga,

édí te é ne édí Nzamá.

29 Amú ná mína bé vé yaá mvɔmm ákála Kristo,

se fáve ná ábwíni ñí,

ve ya fe ná áyén bindáglé ákála deñ;

30 míníí yén fe bindáglé bivɔ́ɔ́ ya bivɔ́ɔ́ míní ngá yén ébe ma,

mína wók fe áwola dí ná bí ne ébe ma.