Melépgá énzénzaŋ bwán ya beéséá
6
Á bwán,
bɔgán beésúá mewók,
ébe Ntí amú ná édí te é ne nzósoó.
2 Sémeŋé ésúá bá ñuá (édɔ é ne é mvéná ósúá ye e ne ya ngaá),
3 á mfá ye ná eniŋ é ke wa mvéáñ,
ó belé fe niŋ ayaáp é sí ñí.
4 Mína beéséá,
kaa sɔŋán é bwán benan ya meyéá,
fáve ná áyála bɔ́ méyágalé été,
ya ébe mélépgá Ntí.
Melépgá énzénzaŋ aloá ya bemása
5 Á aloá,
bɔgán bémása benan béye é sí ñí mewók,
ya wɔŋŋ ya beñeñeá,
ya fe nsilann ñúu ósí ébe mílém myenan été,
ntéññ mbɔ́ɔ́ fe ané ébe Kristo;
6 se ná bot bé yén mína,
amvála ané ngé mína kómo ávé bot nlém mésán,
ve fáve ané áloá Kristo,
míníí bɔ nkómánn Nzamá ya nsísim óse.
7 Ábɔ bíséññ áloá ya mbamba nlém,
amvála ané ngé a ne Ntí,
se bot,
8 míníí yem ná é mbamba dzam áse kada mot aa bɔ,
édɔ fe aa ye ñɔŋ ébe Ntí,
a ne bɔ oloá ngé ki filí mot.
9 Á mína bemása,
mína belagán fe ya bɔ́ ntéññ mbɔ́ɔ́,
líkgán nsómán aywá,
míníí yem ná Ntí weba,
ya fe áawenan a ne á dzóp été,
ya fe ná ébe éñe,
obea ngamm ó sés.
Méngéá bebwíni bá lúman ya mɔ
10 [Á bɔbédzaŋ] édí dá súgán é ne ná,
ádaŋán ávévé nguu ébe Ntí ya ébe éwólo nguu deñ.
11 Tɔbɔgán mbwátán ya méngéá mése Nzamá,
á mfá ye ná míní tɔbɔ nkɔkgán ya átébe nguu ébe nkée méduk déble.
12 Amú ná mélúmán mea mé sés ya é bot bé ne ya mison ya mekií,
ve fáve ya betébosú,
ya bidzwée,
ya menguu méye ó dzíbi ébyɔ bíye é sí ñí,
ya ménguu bembéa mísísim mévóm méye á dzóp été.
13 Ya dzam te,
ñɔŋŋán méngéá mése Nzamá,
á mfá ye ná míní tɔbɔ kaa ku á mbémbéa mos,
niané míní mana yaá dɔ bɔ áse,
véa átébán kaa fógan.
14 Éde míníí téle kaa fógan néa,
míní baga bébélá a tɔɔ́ mína ntsinann ángérgá,
míní baga fe eben ye á nzósoó,
15 mébɔ ñí ya míní tɔɔ́ mbwátán ya nkomann ye á mbamba fwéñ ye á mvwaá.
16 Ádaŋdaŋ ná,
niané míní ñɔŋ yaá eben ye á mbwínánn,
édí míní ne dzím ya dɔ mékɔŋŋ mé ndúán mése mbémbéa mot,
17 ñɔŋŋán fe afogolóŋ ye ákoroga,
ya nzwaokeŋ ye á Nsísim,
édɔ é ne éfíá Nzamá.
18 Éde tám áse yaglánán á Nsísim,
ya meyaglán mése ya ndzaá ése;
mɔ́mɔŋán eyɔŋ ése mbán méyaglán été,
á mfá ébe mítɔ́pbán mí bot míse;
19 ya fe á mfá wɔm ná,
bé vé ma efíá éyɔŋ ma kúu anu,
á mfá ye ná me kúlán éndendaŋ kaa ki ákɔ wɔŋŋ,
édí dá nzaman kén mot ébe mbamba fwéñ;
20 ébe édí te,
ma é mot me téle ya dɔ ané éveŋ Kristo ya bekalamekéná,
ná me kɔ́bɔ dɔ kaa ákɔ wɔŋŋ,
ámvála ma yian fe dɔ ábɔ.
Bifíá byá súgan
21 Ve á mfá ye ná mína míní yem fe édí áse ma bɔ,
Tikiko éñe aa ye mína dɔ kat,
ndzindziŋŋ mwadzaŋ ya bébélá mvwála bíséññ ébe Ntí;
22 á mfá édí te fe édɔ me lóm yaá mína ñí,
ná míní yem é mam má lot ya bía,
ya fe ná áfoŋ mína milém.