BEGALATA
É Kálara Begalata
Mebéránn
1
Ma Pablo,
apostol (se á mfá bot ngé ki ákála mot,
fáve ákála Yesukristo ya ákála Tará Nzamá,
éñí a ngá wómo ñí míwúán été);
2 ya é bɔbédzaŋ bése bé ne bíabe bɔ́;
ébe bíkóánn bebwíni bíye á Galasia:
3 Mvɔmm ya mína,
ya é mvwaá é Tará Nzamá wea,
ya Ntí Yesukristo,
4 éñí a ngá vé émyen ákála mísémm myea,
á mfá ye ná á koro bía ébe mbéa tám ñí,
amvála nkómánn é Tará Nzamá wea ó ne,
5 éñe á tɔbɔgé ya dúmá kɔ́mm ya kɔ́mm.
Amén.
É mbamba fwéñ a ne mbɔ́ɔ́ ya mbɔ́ɔ́
6 Ma yágán ya ábímm avóó míní lík yaá éñí a ngá lwée mína ébe é mvɔmm Kristo,
ná mína bee mbamba fwéñ mfé,
7 é sés ná mfé a ne,
fáve ná bot benziŋ ébɔ́ bá nzaman mína,
béé kómo fe tsén é mbamba fwéñ Kristo.
8 Ve atwaa bía,
ngé ki ángel enziŋ ye á dzóp aa kat mína é mbamba fwéñ aa selan ya éñí bí kat yaá mína,
mot te á tɔbɔgé ya biboŋ.
9 Ámvála bí tára yaá mína dzó,
ma bera dzó éndagá ná:
Ngé mot enziŋ aa kat mína é mbamba fwéñ aa selan ya éñí míní ñɔŋ yaá,
mot te á tɔbɔgé ya biboŋ.
10 Amú ná éndagá,
ye é mvéáñ bot ye éñí Nzamá,
fé ma dzéŋ?
Ye ma dzéŋ ná bot ébɔ́ bé yén ma mvéáñ?
Ngé me ngén ma dzéŋ ná bot ébɔ́ bé yén ma mvéáñ,
me sés fe óloá Kristo.
É mbamba fwéñ a ne kaa ayeŋŋ
11 Á bɔbédzaŋ,
ma kómo ná mína yem ákála dzé,
é mbamba fwéñ me ngá kat mína a sés éñí mot binam.
12 Amú ná meé ndzí ñí áñɔŋ ngé ki áyága ñí ébe mot,
fáve ná ya nléránn Yesukristo.
13 Amú ná míní wók yaá ámvála me ngá niŋ éyɔŋ me mbé á nyébé bejudio,
ámvála me ngá bíra dzéŋ ékóánn bebwíni Nzamá ásí,
meé kómo dɔ tsam.
14 Éde,
á nyébé bejudio á mfá ábíra dziŋ ámvúgá bimvámvámm,
me ngá lot abwiññ bot béye á myee wɔm,
ébá béye é sí dam.
15 Ve,
é Nzamá a ngá tɔ́p ma amvála etámm atéé ye ábum naná,
éñe fe aá lwée ma ya é mvɔmm deñ;
16 niané a ngá yén mvéáñ ye álére é Mwán weñ ébe ma,
á mfá ye ná me kat é mbamba fwéñ weñ ébe meyɔŋ mefé,
meé ndzí dzíga áke ásíli ntétéá mot binam enziŋ;
17 meé ndzí ki bét á Yerusalen,
á mfá áyén ébá bé ngá tára ma ábɔ baapostol ósú;
fáve ná,
maá ke Arabia,
me bera fe búlán á Damasko.
18 Véa,
nia mibú mí léa me bét á Yerusalen,
á mfá a vé Pedro ayemann,
ané me ngá tɔbɔ bía ñí awóm melú ya melú mé tán.
19 Ve meé ndzí yén mbɔ́ɔ́ enziŋ mfé ye baapostol,
fáve Jakobo,
Ntí mwanñaŋ.
20 Ébe édí ma tsili mína,
dággán ná ósú Nzamá,
măá bɔ mineá.
21 Nia véa,
me kéñ á mebeŋŋ mé sí méye á Siria ya Silisia.
22 Ve bíkóánn bebwíni Kristo bíye á Judea bĭí ngá yem ma ó mís;
23 béé wók fáve ná,
éñí a ngá dzéŋ bía ásí métám ó mvús,
éndagá á ŋga kat yaá mbamba fwéñ ye á mbwínánn a ngá kómo tsam métám ó mvús.
24 Bá bé ŋga vé Nzamá dúmá ébe ma.