Míbámm myá súgan
13
Éyɔŋ léa édɔ ma nzu ébe mína dí.
Bá ye tɔɔ kada adzó ya é ngañiá bot bé beáñ ngé ki bé léa.
2 Me tára yaá dɔ dzó é tám me mbé eyɔŋ beáñ,
afáŋbɔ ná áwola dí me ne kɔɔ́,
ma bera dɔ dzó ébe ébá bé ngá tára bɔ nsémm,
ya fe ébe bésesé bevɔ́ɔ́,
ná ngé ma bera nzu,
măá ye dzɔgɔ.
3 Dá é tɔɔ́ ná mína dzéŋ é ndem é Kristo aa kɔ́bɔ ébe ma,
éñí a sés ntéteák á mfá wenan,
fáve ewólo ébe mína.
4 Amú afáŋbɔ ná bá ywíñ ñí ó krús ateák été,
ve a ne ntétéá ya é nguu Nzamá.
Ntéññ mbɔ́ɔ́ bía bí ne fe mitéteák ébe éñe,
ve bía ye tɔbɔ betétéá bíabe bɔ́ ya é nguu Nzamá á mfá wenan.
5 Fasgán mína bébyen,
ngé míní ne á mbwínánn été,
kyakgán mína bébyen;
ngé ki ná ye mína bébyen mínăá ñú táŋ ná Yesukristo a ne ébe mína,
fáve ngé é ne ná mínăá kyaba mikat?
6 Ve me tɔɔ́ ya mebúnn ná míní yem ná bĭá ku mikat.
7 Éde bía yaglan ya Nzamá ná míní táa bɔ mbéa dzam enziŋ,
se á mfá ye ná bí yéne ané nkyabán,
fáve á mfá ye ná míní bɔ é dzam é ne mvéáñ,
afáŋbɔ ngé bía bí ne yéne ané ébá bé ku yaá mikat.
8 Amú ná bí sés bɔ dzam enziŋ ye é ne bébélá á ngamm áyát,
fáve ébe ákála bébélá.
9 Amú ná bía sán éyɔŋ bí ne mitéteák,
ve mína míní tɔɔ́ bíwólo;
dzam te fe bía yaglan ya dɔ,
á mfá nkomann bíniŋ wenan.
10 Akála te édɔ ma tsili ya dɔ é mam má me tɔɔ́ kɔɔ́,
á mfá ye ná éyɔŋ mé ntɔɔ́,
mé bɔ kaa ábelan ya ngét amvála nguu édzwée Ntí a ngá vé ma á mfá ávé bot nguu,
se á mfá átsam.
Bifíá bíye ámanaŋa
11 Á mfá asúgánn,
á bɔbédzaŋ,
tɔbɔgán ya mesán,
tɔbɔgán ya biniŋ nkomann,
tɔbɔgán ya mfoŋann mílém,
tɔbɔgán ya osímánn ovɔ́ɔ́,
tɔbɔgán fe mvwaá,
véa Nzamá ye édziŋŋ ya mvwaá aa ye tɔbɔ mínabe bɔ́.
12 Ábérán bevɔ́ɔ́ ya ébá bevɔ́ɔ́ ya ñáŋán memáŋŋ bɔbéñafwáa.
13 Mitɔ́pbán mí bot míse myá bérán ya mína.
14 Ábwará Ntí Yesukristo,
ya édziŋŋ Nzamá,
ya fe áwókgán Mfúfúp Nsísim,
bí tɔbɔgé ébe mína bésesé.