1 BEKORINTIO
É Kálara Ósúá Bekorintio
Pablo aa bérán ya Bekorintio
1
Pablo,
ntélán á mfá ábɔ ápostol Kristo Yesus amú nkómánn Nzamá,
bía mwadzaŋ Sóstenes,
2 bía bérán ya ékóánn bebwíni Nzamá é ne á Korinto;
ébá bé ntɔɔ́ ntélán eki ébe Kristo Yesus,
ekígá ná bé bɔ ntélán eki bábe ébá bésesé bá yónán éyola Ntí wea Yesukristo ébe mevóm mése,
Ntí weba ya fe éewea.
3 Mvɔmm ya mína ya é mvwaá Nzamá,
é Tará wea,
bá Ntí Yesukristo.
Pablo aa vé akíba
4 Ma vé é Nzamá wɔm akíba tám áse ákála denan amú é mvɔmm Nzamá bé vé yaá mína ébe Kristo Yesus;
5 ya fe ná ébe dzam ése míní ntɔɔ́ ndzálánn ébe éñe,
ébe éfíá ése ya nyemann ósesé;
6 amvála ané é ngañiá Kristo a tɔbɔ yaá ébe mína,
7 édɔ é ne ná dás enziŋ dăá dzéŋ mína,
míní seŋ fe áléreban Ntí wea Yesukristo;
8 éñí fe aa ye mína yém nguu akekwíñ asúgánn kaa meku é mos Ntí wea Yesukristo.
9 É Nzamá bá tɔbɔ ya ñí mebúnn,
éñe a lwée yaá mína ná míní ñɔŋ ngap mínabe é Mwán weñ Yesukristo,
Ntí wea.
Mfá mengamm ya mengamm
10 Á bɔbédzaŋ,
ma lép mína ya éyola Ntí wea Yesukristo,
ná mína bésesé míní tɔbɔ ya kíŋŋ fɔ́ɔ́,
ya fe ná nkánán mengamm ó táa bɔ énzénzaŋ denan,
fáve ná túgán tɔbɔ nlatán ya ósímánn ovɔ́ɔ́ ya fe nyénánn mbɔ́ɔ́.
11 Amú ná,
á bɔbédzaŋ,
é bot Kloé bé kat yaá ma mfá wenan ná,
mitéé mí ne énzénzaŋ denan.
12 Ma kɔ́bɔ ya édí é ne ná,
kada mot ye ébe mína aa dzó ná:
“Ma me ne é mot Pablo”,
“Ma é mot Apolo”,
“Ma é mot Pedro”,
“Ma é mot Kristo.”
13 Ye Kristo a ne nkabann?
Ye Pablo éñe bá dɔ́mle á krús ákála denan?
Ye mínaá duuban ki ébe éyola Pablo?
14 Ma vé Nzamá akíba ná meé ndzí du mot enziŋ ye ébe mína,
fáve Krispo bá Gayo;
15 á mfá ye ná mot enziŋ á nza dzó ná mínaá duuban ébe éyola dam.
16 Maá du fe bot béye é ndá Estéfanas;
éde ébá bevɔ́ɔ́,
măá yem ngé maá du mot enziŋ mfé.
17 Amú ná Kristo eé ndzí ma lóm ná me du bot,
fáve ná me kat mbamba fwéñ,
se ákɔ́bɔ ya kén,
á mfá ye ná me nza bɔ é krús Kristo nzeze.
Kristo éñe a ne é nguu ya é kén Nzamá
18 Amú ná fwéñ ye á krús e ne é dzam é ne akút á mfá é bot bá dzáŋ,
ve mfá wea,
ébá bé ne mikoránn,
e ne é nguu Nzamá.
19 Amú é ne ntsilann ná:
“Ma ye dzéa é kén bebelé kén,
é fak mifefák da ma ye fe nzaman.”
20 Mbelé kén a ne ó vé?
Ntsili bekálara a ne ó vé?
Nkékéŋŋ nkɔ́bɔ ye é tám ñí a ne ó vé?
Ye ná Nzamá ăá bé bɔ ná kén ye éniŋ dzí é súgan akút?
21 Dá é tɔɔ́ ná ébe é kén Nzamá béé ndzí lík ná bé yem Nzamá ya ébe kén ye é sí ñí,
ve Nzamá a yén yaá mvéáñ ná á koro bebwíni ébe ákút ye á nkatann fwéñ.
22 Édɔ ná bejudio bá dzaa mendem,
begriego bá bá dzéŋ kén;
23 ve bía bía kat fwéñ ná Kristo aá wú á krús,
ekɔp obaá á mfá bejudio,
akút dzam dá á mfá meyɔŋ mefé;
24 ve,
á mfá é bot a téle yaá,
ané bejudio ané begriego,
Kristo éñe a ne é nguu Nzamá ya é kén Nzamá.
25 Amú ná édí é ne akút ébe Nzamá dá lot bot ya kén,
édí dá é ne ateák ébe Nzamá dá dá lot fe bot ya nguu.
26 Édɔ ná,
á bɔbédzaŋ,
ñáán táŋ ná ékígá wenan,
abwiññ ye ébe mína é sés ya kén amvála ané éniŋ dá lére;
ngé ki biwólo bí bot;
ngé ki ébá bá byála á bora méndá mé bot.
27 Fáve ná,
Nzamá a tɔ́p yaá édí é ne akút éniŋ dzí á mfá álére bebelé kén osoán;
a tɔ́p yaá fe édí é ne ateák á mfá álére biwólo bí bot osoán;
28 Nzamá a tɔ́p yaá édí dá daŋ ya nzeze béé byana fe dɔ éniŋ,
édí dá é sés á mfá átsam édí é né,
29 á mfá ye ná mot enziŋ a nza vága ósú Nzamá.
30 Ve ákála Déñ,
míní ntɔɔ́ ébe Kristo Yesus,
éñe fe a veŋan yaá é kén dea á mfá Nzamá,
ya nzósoó,
ya ntélán eki ya akoroga;
31 á mfá ye ná,
amvála ané é ne ntsilann ná:
“Éñí aa vága,
á vággé ébe Ntí.”