É Fwéñ Kristo
2
Á bɔbédzaŋ,
éyɔŋ me ngá sian ébe mína,
meé kat mína fwéñ é ngañiá [é mam má nzaman kén mot] Nzamá,
meé ndzí sɔ́ ya bora bífíá ngé ki kén mot.
2 Amú maá kík ná măá ye yem dzam enziŋ énzénzaŋ denan,
fáve Kristo,
éñí a ne ndɔ́mlán á krús.
3 Éde me mbé énzénzaŋ denan ya áteák,
ya wɔŋŋ,
ya fe abwiññ beñeñeá;
4 véa,
nkɔ́bɔ wɔm ya nkatann fwéñ wɔm bíí ndzí bɔ ya bifíá bí fak ébí kén mot,
fáve ya nléránn ye á Nsísim ya nguu,
5 á mfá ye ná mbwínánn wenan ó nza tɔbɔ ébe kén bot,
fáve ébe nguu Nzamá.
Nzamá aa lík ná bé yem ñí amú Nsísim weñ
6 Ve bía,
bía kɔ́bɔ édí kén á mfá é bot bé ntɔɔ́ beñá bot;
ve se kén ye é tám ñí,
ngé ki éñí bidzwée bíye é tám ñí,
ébí byá ke byá bɔ kaa eban;
7 fáve ná bía kɔ́bɔ ya é kén Nzamá é dzam dá nzaman kén mot,
édɔ é mbé ásweññ,
édí Nzamá a ngá tára téle kaa ná é tám ñí é bɔ á mfá é dúmá dea,
8 éñí betébosú benziŋ béye é tám ñí băá bé yem;
amú ná ngé bé yem dɔ,
ngé béé ndzí dɔ́mle Ntí ye á dúmá á krús.
9 Ve amvála ané é ne ntsilann ná:
“É mam dzís deé ndzí yén,
alɔ́ deé ndzí wók,
má meé ndzí ki ñíi á nlém mot,
émɔ Nzamá a koman yaá á mfá ébá bá dziŋ ñí.”
10 Ve,
Nzamá aá lére bía mɔ ya Nsísim;
amú ná Nsísim aa fas mam mése,
atwaa bídwá bí mam Nzamá.
11 Éde mot mbé ye énzénzaŋ bot aa yem é mam mot?
Fáve nsísim ó ne ébe mot?
Ntéññ mbɔ́ɔ́ fe mot enziŋ ñí ăá yem ki é mam Nzamá,
fáve Nsísim Nzamá.
12 Ve bía bíí ndzí ñɔŋ nsísim ye éniŋ,
fáve ná bía ñɔŋ nsísim wá sɔ́ ébe Nzamá,
á mfá ye ná bí yem é mam Nzamá a vé yaá bía dás.
13 Á mfá é mam bía kɔ́bɔ fe ya mɔ,
se ya bífíá bá yágale ya kén mot,
fáve ya ébí Nsísim aa yágale;
eé kalan mam méye á nsísim ya nsísim.
14 Ve mot binam ăá yébe é mam Nsísim Nzamá,
amú ná á mfá weñ mé ne akút,
ñí a sés ki mɔ áyem,
amú ná bá fas mɔ ya nsísim.
15 Ve é mot a belé Nsísim aa fas mam mése,
ve mot enziŋ ñí ăá fas ki ñí.
16 Amú ná:
“Nzá aá yem édí Ntí a belé á nló été?
Nzá aa ye ñí vé ayágalé?”
Ve bía,
bí belé ósímánn Kristo.