Baapostol bá yébe Pablo énzénzaŋ deba
2
Éde véa,
nia awóm míbú ya mí nii,
ané me ngá bera bét á Yerusalen bía Bernabé,
meé ke fe ya Tito.
2 Maá bét ákála nléránn dzam ye á nsísim,
éde ébá bé mbé ya ewógá,
me ngá kaŋle bɔ́ évwíñ,
é mbamba fwéñ ma kat á meyɔŋ mefé été,
á nza bɔ tám enziŋ ná ma bɔ eséññ ngé ki ná me bɔ yaá éséññ á nzeze.
3 Ve atwaa é Tito á mbé bía ñí,
ñí béé ndzí ki áyémele ya ñí ná á tɔbɔ nkíkgán akeé,
afáŋbɔ ná a mbé mwann griego.
4 Éde ákála é bɔbédzaŋ meduk bé ngá ñíi á nsámá été ásweññ,
béé nzu ñíi ásweññ ná bá mɔ́mɔ étɔɔ́ filí bí belé ébe Kristo Yesus,
á mfá ye ná bé tɔɔ́ bía mikómm [míye á nkɔɔ́ metsiŋŋ],
5 ébá béte,
bíí ndzí bɔ́ vagle ávé afóo tám enziŋ ná bía bee bɔ́;
á mfá ye ná bébélá ye á mbamba fwéñ á tɔbɔ ébe mína.
6 Ya ébá bé ngá láŋ ná bé belé ewógá ye ná bé ne dzóm enziŋ (édí bé mbé,
măá bís ki;
Nzamá a sés obea ngamm);
amú ná ébe ma,
ébá bé mbé ya ewógá béé ndzí ma yágale dzam enziŋ ye é ne mfefeñ.
7 Ve ñí a tɔɔ́ ná,
niané bé ngá yén ná baá téle ma á mfá mbamba fwéñ ébe ébá bé ne kaa nkíkgán akeé;
amvála ané Pedro ñí ya éñí ébá bé ne nkíkgán akeé.
8 Amú ná éñí a ngá bɔ eséññ apostol á mfá Pedro ébe ébá béye á nkíkgán akeé,
aá bɔ fe eséññ á mfá wɔm ébe meyɔŋ mefé.
9 Éde Jakobo ya Pedro ya Juan,
ébá bé ngá láŋ ané mekon,
niané bé ngá ñú táŋ é mvɔmm Nzamá a ngá vé ma,
ané bé ngá ñɔŋ ma ya Bernabé amvála ané bébɔ biséññ ntéññ mbɔ́ɔ́ ané ébɔ́,
á mfá ye ná bía ébe meyɔŋ mefé,
ébɔ́ bá ébá béye á nkíkgán akeé.
10 Éde bé ngá dzaa bía fáve ná bí síman mitétéññ,
édí te fe ma me mbé me belé dɔ abwiññ nkómánn ye ábɔ.
Pablo aa kat fwéñ míkéá bá Pedro
11 Ve niané Pedro a ngá sian Ántiokia,
ané me ngá vé ñí mbámm ású ya asú,
akála ná édí a ngá bɔ dĕé mbé mvéáñ.
12 Amú ná kaa ná bot benziŋ béye ébe Jakobo bé sian,
a ngá bɔ eé dzí bábe bot béye meyɔŋ mefé;
ve niané bé ngá sian,
á ŋga dulugan átɔbɔ nkánán,
eé kɔ ébá béye á nkíkgán akeé wɔŋŋ.
13 Éde béjudio bevɔ́ɔ́ bá bé ngá saŋan fe ya ñí ébe meduk méte été;
akekwíñ ná atwaa Bernabé ñí ya bé ŋga dulu fe ya méduk meba.
14 Ve niané me ngá yén ná bĕé ngá wulu tételé á mfá bébélá ye á mbamba fwéñ,
ané me ngá dzó Pedro ósú bot bése ná,
“Ngé wa,
o tɔɔ́ mwann judio,
wa niŋ amvála ané mot ye á meyɔŋ mefé,
se ané mwann judio,
akála dzé wa yémle bot béye á meyɔŋ mefé ná bé niŋ amvála ané bwann bejudio?”
15 “Bía,
bibíbyála béjudio,
se amvála ané bot béye meyɔŋ mefé bé ne bebɔ misémm;
16 ve bá yem ná mot a sés tɔbɔ nzósoó ákála ádzálá é mam nkɔɔ́ metsiŋŋ wá mánan,
fáve ákála mbwínánn ébe Yesukristo;
bía bí bwíni yaá fe Kristo Yesus,
á mfá ye ná bí tɔbɔ benzósoó ákála mbwínánn ébe Yesus,
se ákála ádzálá é mam nkɔɔ́ metsiŋŋ wá mánan;
amú ná mot enziŋ ăá ye tɔbɔ nzósoó ákála ndzálánn ye é mam nkɔɔ́ métsiŋŋ wá mánan.”
17 Ve ngé bía dzéŋ ná bí tɔbɔ benzósoó ébe Kristo,
bía bí koan yaá fe ya bía bébyen ané ébɔ́ bebɔ misémm.
Ye Kristo a ne mvwála bíséññ ye á nsémm?
É sés bɔban amvála enziŋ!
18 Amú ná ngé ma bera lóŋ é mam me ngá tsam,
mámyen me bɔ yaá ntsam metsiŋŋ.
19 Amú ná,
mámyen,
ákála atsiŋŋ,
me wú yaá ébe atsiŋŋ,
ná me niŋ á mfá Nzamá.
20 Me tɔbɔ yaá nkelann á krús bía Kristo.
Éde éñí aa niŋ a sés fe ma,
ve ná Kristo éñe aa niŋ ébe ma;
éniŋ ma niŋ mison éndagá,
ma niŋ dɔ ya mbwínánn ébe é Mwán Nzamá,
éñí a ngá dziŋ ma,
ané a ngá vé fe émyen ákála dam.
21 Măá tep é mvɔmm Nzamá,
amú ná ngé nzósoó aa sɔ́ ébe ákála nkɔɔ́ métsiŋŋ,
véa Kristo aá wú á nzeze.