Bá ñɔŋ Mfúfúp Nsísim fáve ya mbwínánn
3
Á akúkút bwann begalata!
Nzá a mana yaá mína dzí nlém [ná mína táa bɔ bébélá mewók],
mína é bot é mís menan,
bé lére yaá Yesukristo éndendaŋ nkelann á krús?
2 Édí etámm édɔ ma kómo yem ébe mína ná,
ye mínaá ñɔŋ Nsísim ákála ádzálá é mam nkɔɔ́ métsiŋŋ,
ngé ki ya ákála ábéá ya mbwínánn?
3 Nde míní ne akúkút aaná?
Míní ngá tára ya Nsísim,
ye ná mína ke súgan éndagá ya nguu mot binam?
4 Ye ná míní ngá mana dzuk ébe ábímm mam dí á nzeze?
Ngé dá e ne ki bébélá ná dá bɔban á nzeze!
5 Éde,
é Nzamá aa vé mína Nsísim,
eé bɔ fe biwólo bí mam énzénzaŋ denan,
ye aa bɔ dɔ ákála ádzálá nkɔɔ́ métsiŋŋ,
ngé ki ákála ábéá ya mbwínánn?
6 Néa éñe Abraam a ngá bwíni Nzamá,
ané bé ngá láŋ ñí dɔ ané nzósoó.
7 Ya dzam te,
yemŋán ná é bot bé ne ébá béye á mbwínánn,
ébɔ́ bé ne é bwán Abraam.
8 Amú mitsili mií tára lére ná Nzamá aa ye tɔɔ́ meyɔŋ mefé nzósoó ákála mbwínánn,
éde ósúá a ngá tára kat Abraam mbamba fwéñ ná,
‘Meyɔŋ mése ma ye ñɔŋ abwará ébe wa.’
9 Édɔ ná é bot bé ne ébá béye á mbwínánn,
bé belé abwará ya mbwínánn Abraam.
10 Amú ná é bot bése bé ne á nkɔɔ́ métsiŋŋ ásí,
bé ne biboŋ été,
akála e ne ntsilann ná,
“Biboŋ ya éñí áse aa bɔ kaa laŋan ébe é mam mése mé ne ntsilann ábá nkɔɔ́ metsiŋŋ été,
á mfá ye ná á dzálá mɔ.”
11 Dá é tɔɔ́ ná,
mot enziŋ ăá ye tɔbɔ nzósoó ósú Nzamá ákála nkɔɔ́ métsiŋŋ.
É ne été ná,
“Nzósoó mot aa ye niŋ ákála mbwínánn.”
12 Ve nkɔɔ́ métsiŋŋ wăá sɔ́ á mbwínánn;
fáve ná,
éñí aa dzálá é mam má,
aa ye niŋ ákála émɔ.
13 Kristo ñí aá koro bía ébe biboŋ bíye nkɔɔ́ métsiŋŋ été,
niané a ngá veŋan biboŋ ákála dea.
Amú e ne ntsilann ná,
“Éñí áse a kele élé a ne biboŋ,”
14 á mfá ye ná ébe Kristo Yesus ábwará Abraam é nzu ébe meyɔŋ mefé;
ná bí ñɔŋ ngaá Mfúfúp Nsísim ákála mbwínánn.
Ngaá da lot nkɔɔ́ métsiŋŋ
15 Á bɔbédzaŋ,
ma kɔ́bɔ ané mot binam ná,
elat,
atwaa e ne édí bot,
niané é tɔbɔ yaá ntélán mot enziŋ a sés dɔ tsam,
ngé ki ákɔgle dɔ dzam enziŋ áyóp.
16 Édɔ ná,
bá vé Abraam mengaá,
ya fe é mvɔŋ dzeñ.
Dăá dzó ná,
“Ya memvɔŋ mwe,”
amvála ané ngé mé ne abwiññ,
fáve ané mvɔŋ fɔ́ɔ́.
“Ya ébe é mvɔŋ dzwe,”
édɔ e ne Kristo.
17 Édí ma kɔ́bɔ édɔ dí ná,
nkɔɔ́ métsiŋŋ ó ngá tɔbɔ ntélán,
niané mibú mitet mí nii ya mibú mewóm mé léa mí ngá lot,
wăá tsam élat Nzamá a ngá tára tɔɔ,
amvála ané ngé dá bɔ ngaá te kaa eban.
18 Amú ná,
ngé tsígá eé tsinibe ákála nkɔɔ́ métsiŋŋ,
ngé dĕé tsií ki fe á ngaá.
Ve Nzamá ñí aá kee dɔ Abraam ya ákála ngaá.
19 Éde,
amú dzé nkɔɔ́ métsiŋŋ waá sɔ́?
Bá kɔgle wɔ́ áyóp ákála ntsamann metsiŋŋ,
akekwíñ ané é mvɔŋ bé ngá vé ya dɔ ngaá dá sian.
Baángel ébɔ́ bé ngá kalan metsiŋŋ mé tɔɔ́ nkomann ébe é wéá ntébe nzaŋŋ.
20 Éde bá băá téle ntébe nzaŋŋ ngé ngamm e ne fɔ́ɔ́;
ve Nzamá ñí a ne mbɔ́ɔ́.
Oloá ngé ki mwán
21 Édɔ ná,
ye nkɔɔ́ metsiŋŋ ó ne mengaá Nzamá á ngamm áyát?
É sés bɔban amvála enziŋ!
Akála ná,
ngé bé téle nkɔɔ́ metsiŋŋ ó ne vé eniŋ,
ñá mfaŋ nzósoó ngé aa sɔ́ á nkɔɔ́ métsiŋŋ été.
22 Ve mitsili myá myá mana dzili mot áse á nsémm été,
á mfá ye ná ébá bé belé mbwínánn ébe Yesukristo,
ébɔ́ bé ñɔŋ ngaá.
23 Ve kaa ná mbwínánn ó sɔ́,
bí mbé bí tɔɔ́ ndzilann á nkɔɔ́ métsiŋŋ été,
akekwíñ mbwínánn ó mbé ná ó nkún kwíñ éyéá été.
24 Édɔ ná,
nkɔɔ́ métsiŋŋ éwɔ ó ngá baale bía akekwíñ ané Kristo a ngá sian;
á mfá ye ná bí ne tɔbɔ nzósoó ákála mbwínánn.
25 Ve eyɔŋ mbwínánn wá ó sɔ́ yaá,
bía bĭí tɔɔ́ fe ébe mbaale ásí.
26 Amú ná mína bése míní ne é bwán Nzamá ákála mbwínánn ébe Kristo Yesus.
27 Amú ná,
mína ébá bésesé míní ngá tɔbɔ nduann ébe Kristo,
Kristo éñe fe míní bwát yaá.
28 Ébe éñe,
mwann Judio a sés,
ngé ki mwann griego;
ébe éñe,
oloá ó sés,
ngé ki filí;
ébe éñe,
fám e sés,
ngé ki miningá;
amú ná mína bése míní ne ntéññ mbɔ́ɔ́ ébe Kristo Yesus.
29 Édɔ ná,
ngé míní ne ébá Kristo,
míní ne fe é mvɔŋ Abraam,
beñɔŋ tsígá amvála ané ngaá e ne.