5
Ya dzam te édɔ,
vúgán Nzamá amvála ané mindzindziŋŋ mí bwán;
2 wulugán édziŋŋ été,
ntéññ mbɔ́ɔ́ ané Kristo ñí a ngá dziŋ fe bía,
éde ákála dea a ngá kík é ñúu deñ émyen ébe Nzamá,
amvála ané bivévé ya metúnŋa bí ne mbamba mbwánn énum.
3 Ve nsémm eveák ya mvin ése,
ngé ki oyéá byém,
băá yian ki byɔ átúptúp ébe mína,
amvála ané dá yian ya mitɔ́pbán mi bot.
4 Băá yian ki kɔ́bɔ bifíá bí osoán,
ngé ki akúkút mikɔ́bɔ,
ngé ki é fiaŋ é ne mvin,
émá méte mé ne kaa áyian,
ve dá daŋ ya mvéáñ ná ávé akíba.
5 Akála ná,
bébélá mína yem édí ná,
mbɔ nsémm eveák enziŋ,
ngé ki mvinvín,
ngé ki oyéá byém,
éwɔ ó ne nkaŋann biyemá,
băá ye ñɔŋ tsígá ébe édzwée ngɔ́mán Kristo ya édí Nzamá.
6 Mot enziŋ a táa mína duk ya benzeze bífíá,
amú ná ébe é mam má,
méyéá Nzamá má nzu ébe bwán béye melɔ́.
7 Ya dzam te,
kaa saŋan ya mínabe bɔ́;
8 amú ná ómvús míníí mbé dzíbi,
ve áwola dí míní ne eyéá ébe Ntí;
wulugán ané bwán béye éyéá,
9 (akála ná ebumá ye éyéá,
é ne dzam áse ye áñep,
ya nzósoó ya bébélá)
10 míní fas nzá dzam dá vé Ntí nlém mesán.
11 Kaa fulan ya mam ya mibɔann míye ó dzíbi mí ne kaa mfí,
fáve ná ábwaale myɔ;
12 amú ná é ne osoán ná bé kɔ́bɔ é mam bot béte bá bɔ ásweññ.
13 Ve mam mése má yéne niané mé kwíñ yaá éyéá été,
akála ná eyéá édɔ dá kúlu mam mése.
14 Ya dzam te édɔ aa dzó ná,
Wa é mot wa ke óyó,
tébegé,
wómoŋé béwú été,
véa Kristo aa ye wa lére eyéá.
15 Édɔ ná,
tɔbɔgán nkée ámvála mína wulu,
se ané akúkút,
ve fáve ané ébá bé ne ya kén,
16 míníí duan ya tám,
amú ná melú má mé ne abé.
17 Édɔ é ne ná,
kaa ábɔan akúkút,
fáve ná yemŋán édí é ne nkómánn Ntí.
18 Kaa tɔbánán fían ya é vino ó ne ya nwulann tugá,
ve fáve tɔbɔgán ndzálánn ya Mfúfúp Nsísim;
19 míníí kɔ́bɔ mína ya mína ya Besalmo,
ya nyeann byeá,
ya byeá bíye á nsísim,
míníí yee byeá,
míníí lugu fe Ntí ébe milém myenan été.
20 Éde fe ávéán Tará Nzamá akíba tám áse,
á mfá mam mése,
ébe éyola Ntí wea Yesukristo.
21 Béágán bevɔ́ɔ́ ébe ébá bevɔ́ɔ́ á wɔŋŋ Ntí été.
22 Biningá bé béágé béyóm beba bébyen,
ntéññ mbɔ́ɔ́ fe ané ébe Ntí.
23 Amú ná fám édɔ e ne nló miningá,
ntéññ mbɔ́ɔ́ ané Kristo ñí á ne nló ékóánn bebwíni,
émyen fe a tɔɔ́ nkoro é ñúu deñ.
24 Ve amvála ané ekóánn bébwíni é ne édzwée Kristo ásí,
ntéññ mbɔ́ɔ́ fe biningá bá bá yian fe tɔbɔ édzwée béyóm beba ásí ébe mam mése.
25 Á beyóm,
dziŋŋán beñu beyéá,
amvála ané Kristo ñí a ngá dziŋ fe ekóánn bebwíni,
a kee fe é ñúu deñ ané metúnŋa ákála édɔ;
26 á mfá ye ná,
á téle dɔ eki,
niané a ngá mana dɔ tun ébe nsopbán ye á mendzímm ya éfíá deñ;
27 ná ekóánn bébwíni é yéne ébe ású deñ,
ya dúmá,
kaa ayeŋŋ,
kaa mbwat,
kaa ki ya dzam enziŋ ye dá fonan ya mam méte;
fáve ná é tɔbɔ eki ya kaa ayeŋŋ.
28 Amvála te fe,
beyóm bá yian dziŋ beyéá beba ámvála bá dziŋ fe méñúu meba bébyen.
Éñí aa dziŋ ngéá,
aa dziŋ fe é ñúu deñ émyen.
29 Amú ná mot enziŋ ăá bé víni é ñúu deñ tám enziŋ,
fáve ná aa yála dɔ,
ya fe ná a baale dɔ,
ntéññ mbɔ́ɔ́ ané Kristo ñí aa bɔ fe dɔ ékóánn bebwíni.
30 Akála ná bí ne mesúk mé ñúu méye é ñúu deñ [méye míson myeñ ya émá méye bíveés byeñ].
31 Ya dzam te édɔ fám da ye lík éséá bá ñiá,
a kéñ fulan bá ngéá,
bé beáñ bá ye tɔbɔ ñúu fɔ́ɔ́.
32 Édí te,
é ne é mora dzam aa nzaman kén mot,
ve ma ma kɔ́bɔ dɔ á mfá ébe Ntí ya ébe ekóánn bébwíni.
33 Ya fe ná,
kada mot mbɔ́ɔ́ ya mbɔ́ɔ́ ye ébe mína,
ñí á dziŋŋe fe ngéá amvála ané aa dziŋ émyen,
miningá ñí á sémeŋé fe nnóm.