Bía bésesé bí ne mot mbɔ́ɔ́ ébe é ñúu Kristo
4
Dzam te édɔ ma é mwann mbok Ntí,
ma lép mína ná míní niŋ ámvála dá ñep ya ékígá bé lwée yaá mína ya dɔ,
2 ya nsilann ñúu ósí óse,
evwévwé nlém,
ya fe edzíp,
míníí nzoman bevɔ́ɔ́ ya ébá bevɔ́ɔ́ édziŋŋ été,
3 áyémán nguu ye ábaale éfulann míní belé á Nsísim été,
ébe awókgán ye á mvwaá.
4 Ñúu e ne fɔ́ɔ́ ya fɔ́ɔ́,
Nsísim ñí a ne fe mbɔ́ɔ́ ya mbɔ́ɔ́,
ámvála bé lwée yaá fe mína ébe oyan ovɔ́ɔ́ ya ovɔ́ɔ́ ye ékígá denan.
5 Ntí a ne mbɔ́ɔ́,
mbwínánn ó ne mbɔ́ɔ́,
nduann wá ó ne fe ovɔ́ɔ́;
6 Nzamá mbɔ́ɔ́ éñe fe a ne Éséá bésesé,
éñí a ne mam mése áyóp,
á mfá bésesé,
ya fe ébe ásesé.
7 Ve ébe kada mot ye ébe bía bé vé yaá ñí mvɔmm ébe amvála ané ábímm dás Kristo é ne.
8 Ya dzam te édɔ,
aa dzó ná,
“Niané a ngá bét ó yóp
aá ke ya mikómm,
éde a ngá vé bot bedás.”
9 Édí te ná,
“aá bét,”
dá yíli á yá?
Fáve ná aá sigi fe mífá mí ne edwá á sí été.
10 Éñí a ngá sigi,
émyen fe aá bét ná á tɔbɔ dzam áse ye á dzóp été á yóp,
á mfá ádzálá dzam áse.
11 Éde aá vé bevɔ́ɔ́ benziŋ baapostol,
ébá bevɔ́ɔ́ bá bekúlu medzó,
ébá bevɔ́ɔ́ bá bekat fwéñ,
ébá bevɔ́ɔ́ bá bekálá mitómá,
ya fe beyágale,
12 ná bé vé mítɔ́pbán mí bot ayágalé á mfá ábɔ éséññ Nzamá,
ná bé lóŋ é ñúu Kristo;
13 akekwíñ ané bía bésesé bía ke sian éfulann ye á mbwínánn ya édí nyemann é Mwán Nzamá ó ne ngúrá,
ané ñá mot,
amvála ané ntéññ Kristo ó ne ndzálánn ngúrá áse;
14 á mfá ye ná bí nza bɔ bwán,
ébá mikebá mí máŋ myá dulu,
bé sɔ́ ya bɔ́ ókó bé ne ya bɔ́ áká,
ya bivúŋ méyágalé mé bot bíse,
ákála nkée méduk bot bá belan ya wɔ á mfá áduk bot mékeŋŋ été.
15 Fáve ná míní baale bébélá édziŋŋ été,
bí vémŋán á mfá dzam áse ébe éñí a ne nló,
Kristo.
16 Ébe éñí aa vé ná ñúu ése dá túga vegan,
dá fulan fe moŋ mé ñúu mése,
amvála ané asúk éséññ kada mot ye á nsámá é ne,
á mfá aa ke aa tɔbɔ nlóŋán édziŋŋ été.
Mfefeñ éniŋ ébe Kristo
17 Édí te édɔ ma kɔ́bɔ,
édɔ fe ma bán ébe Ntí ná,
míní táa niŋ ámvála meyɔŋ mefé má niŋ fe,
ébɔ́ bá niŋ á nzeze mam ye ósímánn weba été,
18 akála ná ndzímán wá dzwée bɔ́ ya fe áleét mílém deba,
ébá béte osímánn ó ne bɔ́ ya dzíbi,
bé ne beyín,
bé tɔɔ́ fe oyaáp ébe éniŋ dá sɔ́ ébe Nzamá.
19 Ébá béte niané bé ngá súgan bɔ kaa fe áwú osoán,
bé kee bébyen éniŋ tugá ná bá dzálá ya abwiññ evéé amvála mvin dzam áse.
20 Ve mína,
se amvála te édɔ míní ñɔŋ yaá áyágalé Kristo,
21 ngé é ne bébélá ná,
bá kɔ́bɔ ya mína,
bé yágalé fe mína édí Yesus,
ámvála bébélá é ne ébe éñe.
22 Éde,
á mfá ámvála eniŋ míní ngá tára niŋ ó mvús,
áswálán nnomm mot ébe mína,
éwí ó ne nwúán ntuk ya mikómánn meduk.
23 Ve tɔbɔgán mifefeñ á nsísim ye ósímánn wenan été;
24 bwátgán fe mfefeñ mot,
éñí á ne mvelann Nzamá,
á nzósoó,
á mfúbánn été,
ya bébélá.
Mefúlú méye á mfefeñ éniŋ
25 Akála te édɔ,
álíkgán mineá,
kɔ́bɔgán bébélá kada mot ya éñí mbɔ́ɔ́,
amú ná bí ne mesúk mé ñúu ébe ñúu fɔ́ɔ́.
26 Áyéán,
ve kaa ábɔ nsémm;
nlódzóp ó táa dzím méyéá menan mé tɔɔ́,
27 kaa ki ávé déble afóo.
28 Éñí aa bɔ eé dzíp,
a táa bera ádzíp,
fáve ná á séñŋe,
eé bɔ ya é mó meñ édí é ne mvéáñ,
á mfá ye ná á belé é dzóm á ne vé éñí ĕé belé.
29 Mbéa efíá enziŋ a táa kwíñ ánu denan,
fáve édí é ne ávwála mot,
á mfá ávé é bot bá wók dɔ mvɔmm.
30 Éde,
kaa véán ki Mfúfúp Nsísim Nzamá eywiññ,
éñí míní ngá ñɔŋ ya ñí sitám á mfá mos ye ákoroga.