Éséññ Nzamá Pablo a ngá bɔ á Tesalonika
2
Á bɔbédzaŋ,
amú ná mína bébyen mína yem ná mfépbán wea ébe mína weé ndzí bɔ kaa eban,
2 fáve ná,
niané bí ngá yén midzuúk ya bindáglé á Filipos amvála ané mína yem,
ébe é Nzamá wea éñe bí mbé bí tɔɔ́ ya ñí mebúnn á mfá ákat mína é mbamba fwéñ Nzamá ébe abwiññ bindáglé été.
3 Amú ná,
mélépgá mea măá sɔ́ évuzá été,
ngé á mvin,
ngé ki á meduk.
4 Fáve ámvála bí tɔbɔ yaá nkyabán ébe Nzamá,
ná átéle bía á mfá mbamba fwéñ amvála te édɔ bía kɔ́bɔ,
se ná bot ébɔ́ bé sák bía,
fáve Nzamá,
éñí aa fas mílém myea.
5 Amú ná amvála ané mína yem,
bíí ndzí sɔ́ ya mína tám enziŋ ya bembamba bifíá méduk,
ngé ki ya oyéá byém ye ásweññ;
Nzamá a ne ngañiá.
6 Kaa ki dzéŋ é dúmá dá sɔ́ ébe bot,
ngé éedenan,
ngé ki édí bot befé.
É tɔɔ́ ná,
bí ne é baapostol Kristo,
bí mbé mína vé mbaga;
7 ve bía bí ngá lére añep énzénzaŋ denan,
amvála ané ñiá aa yem baale é bwán beñ émyen.
8 Néa éñe bí belé ya mína ededea edziŋŋ,
bíá tɔbɔ ya mesán ná bí kee mína,
se fáve é mbamba fwéñ Nzamá,
ve ya fe bíniŋ bía bébyen,
ya dzam te édɔ míní ngá bíra bɔ é bot bía dziŋ.
9 Amú ná,
á bɔbédzaŋ,
mína síman ané bí ngá dzuk ya biséññ bí nguu alú ya ó mos,
á mfá ye ná bí táa bɔ mot enziŋ ye ébe mína mbaga,
bíí kat mína é mbamba fwéñ Nzamá.
10 Éde,
mína míní ne bengañiá,
ya Nzamá,
ébe nzá ámvála bembamba bé bot ya benzósoó,
ya fe kaa bidzo bí mbé énzénzaŋ denan,
mína bebwíni.
11 Ané mína yem,
nzá amvála bí ngá lép mína,
amvála ané éséá a ne dɔ bɔ ya kada é mwán mbɔ́ɔ́ weñ;
12 bí ngá vé mína nguu ya melépgá,
bíí vé mína ngañiá á mfá ye ná míní niŋ ané dá ñep ya é Nzamá a lwée yaá mína édzwée ngɔ́mán deñ ye é dúmá deñ.
13 Dzam te édɔ fe,
bía kaa ki ádzɔgɔ ná bía vé Nzamá akíba,
akála ná niané míní ngá ñɔŋ éfíá é mbamba fwéñ Nzamá édí míní ngá wók ébe bía,
éde míní ngá yébe dɔ;
se amvála ané medzó mé bot,
fáve amvála ané éfíá Nzamá ébyen é ne bébélá,
édí ébyen dá bɔ fe eséññ ébe mína bebwíni.
14 Amú ná,
á bɔbédzaŋ,
míní sɔ́ yaá vú efonann ye bíkóánn bebwíni Nzamá bí ne á Judea ébe Kristo Yesus,
míníí yén fe midzuúk é mó bot béye é sí denan,
ntéññ mbɔ́ɔ́ fe ané ébɔ́ é mó bejudio.
15 Ébɔ́ fe bé ngá ywíñ Ntí Yesus ya bekúlu medzó,
bé bíra fe bía dzéŋ ásí,
băá bɔ édí Nzamá aa yén mvéáñ,
fáve bé téle bot bése á ngamm áyát.
16 Éde,
béé kili bía nkɔ́bɔ ébe meyɔŋ mefé,
á mfá ye ná me tɔbɔ nkoránn;
asúgánn é ne fáve ná,
tám áse bá dzálá é nɔmɔ mísémm weba.
Ve méyéá Nzamá má mé súgan yaá fe sian ébe bɔ́.
Pablo a ngá kómo fép Betesalonisense
17 Ve,
á bɔbédzaŋ,
bíabe mína bí tɔɔ́ nkánán á mison été oyomm tám,
ve se á nlém.
Bí mbé bí tɔɔ́ evévéñ ye ábíra ákómo áyén mésú menan.
18 Ya dzam te édɔ bí ngá vak ná bía nzu ébe mína;
ma Pablo,
álot eyɔŋ evɔ́ɔ́;
ve Sátan ñí á dzip bía dɔ.
19 Amú ná,
dzé é ne oyan wea,
ngé ki mesán,
ngé ki dás ye áwún ye engúŋ?
Nde se mína míní ne dɔ ósú Ntí wea Yesus,
é tám aa ye sian?
20 Amú ná mína míní ne é dúmá dea ya mésán mea.