Kristo éñe aa vé filí
5
Kristo aá tɔɔ́ bía filí á mfá ye ná bí niŋ á filí été.
Édɔ ná,
yémŋán nguu étɔɔ́ filí te été,
kaa ábera ábaga mvaba ye étɔɔ́ oloá.
2 Dággán,
ma Pablo ma dzó mína ná,
ngé mína kíkban akeé,
Kristo ăá ye bɔ ya mína abúánn amvála enziŋ.
3 Ma bera dzó é mot áse aa keleban ná,
é ne ñí mvólá ná á dzálá fe nkɔɔ́ metsiŋŋ óse.
4 Míní kánan yaá mínabe Kristo,
mína é bot mína dzéŋ ná bé láŋ mína ané benzósoó ya nkɔɔ́ métsiŋŋ;
míní bók yaá á mvɔmm été.
5 Amú ná bía,
ébe Nsísim,
bía bíra yana nzósoó oyan ya mbwínánn.
6 Ákála ná,
ébe Kristo Yesus,
ané nkíkgán akeé,
ngé ki kaa nkíkgán akeé,
é sés ya abúánn enziŋ,
fáve mbwínánn wá séñ ya edziŋŋ.
7 Míní ngá ke ósú mvéáñ.
Nzá a dzip yaá mína á mfá ye ná míní táa bɔ bébélá mewók?
8 Éde edzíp te,
dăá sɔ́ ébe é mot a lwée yaá mína.
9 Oyomm levadura wá vúza ntsura ngúrá.
10 Me tɔɔ́ ya mína mebúnn ébe Ntí ná,
mínăá ye belé ósímánn enziŋ ofé.
É mot aa ndágle mína,
aa ye ñɔŋ akira,
a ne bɔ é mot áse ané bɔ.
11 Á bɔbédzaŋ,
ve ma,
ngé nkíkgán akeé éwɔ me ngén ma kat fwéñ,
amú dzé bé ngén bá dzéŋ ma ásí?
Ngé éñe é bɔ néa,
bé vea yaá ekɔp obaá ye á krús.
12 Ngwáa ngé ébá bá ndágle mína,
ngé bá tɔbɔ ki kíkgán.
13 Á bɔbédzaŋ,
amú ná bá lwée mína á mfá étɔɔ́ filí;
ve fáve ná,
kaa ábelan ya etɔɔ́ filí te amvála ané dzam ye ábɔ ya dɔ nsémm;
fáve ná,
áséan bevɔ́ɔ́ ya ébá bevɔ́ɔ́ ákála edziŋŋ.
14 Amú ná nkɔɔ́ métsiŋŋ óse wá tɔbɔ ndzálánn ébe efíá evɔ́ɔ́!
“Dziŋŋe é mot mbɔ́ɔ́ ámvála wa dziŋ wámyen.”
15 Ve ngé mína lópban,
míní dzíán fe bevɔ́ɔ́ ya ébá bevɔ́ɔ́,
tɔbɔgán ya nkée,
á nza bɔ tám enziŋ ná,
nde míní ŋga dzéán yaá bevɔ́ɔ́ ya ébá bevɔ́ɔ́.
Mibɔann míye á nlém mot binam
16 Akála te édɔ ma dzó ya dɔ ná,
niŋŋán ya Nsísim,
véa éñe mínăá ye dzálá mikómánn míye á nlém mot binam.
17 Amú ná mikómánn míye á nlém mot binam mí ne Nsísim á ngamm áyát;
Nsísim ñí ya a ne fe á nlém mot binam á ngamm áyát.
Amú ná bé beáñ béte bá síŋán,
ya dzam te édɔ mínăá bɔ édí mína kómo.
18 Ve ngé Nsísim éñe aa wulu ya mína,
nkɔɔ́ métsiŋŋ wăá dzwée fe mína.
19 Édɔ ná,
mibɔann míye á nlém mot binam myeé léreban éndendaŋ,
émyɔ mí;
nsémm eveák,
mvin mam,
nwulann tugá,
20 nkaŋann biyemá,
mevalan,
nzíŋŋ,
mitéé,
abéánn,
olúnn,
evínn,
nkánán mengamm,
bembéa míyébé,
21 mbéa nlém,
áfían meywa,
fét nyénánn befám ya biningá,
ya fe é mam mevɔ́ɔ́ má fonan ya émá méte;
ma vé mína mbámm éndagá,
amvála ané me tára yaá mína dɔ ákɔ́bɔ ná,
é bot bá bɔ amvála mam méte,
băá ye ñɔŋ édzwée ngɔ́mán Nzamá tsígá.
Bibumá bíye é mot aa niŋ á Nsísim été
22 Ve ebumá ye á Nsísim e ne ná;
edziŋŋ,
mesán,
mvwaá,
edzíp,
esós,
añep,
mbwínánn,
23 evwévwé nlém,
ádzwée nlém;
nkɔɔ́ métsiŋŋ enziŋ ó sés mam méte á ngamm áyát.
24 Ve é bot bé ne ébá Kristo Yesus,
bé mana yaá kele á krús nlém mot binam ya bívéé bíye á nsémm byeñ ya fe mikómánn.
25 Ngé bía niŋ á Nsísim été,
bí wulugán fe ákála Nsísim.
26 Bí kaa ábɔan benzeze bingúŋ bevɔ́ɔ́ ya ébá bevɔ́ɔ́,
bí ŋga sɔŋán bevɔ́ɔ́ ya ébá bevɔ́ɔ́,
bí ŋga bɔan fe evínn bevɔ́ɔ́ ya ébá bevɔ́ɔ́.