Pablo bábe bora bé baapostol
11
Ngwáa ngé mína nzomo ma ébe oyomm akút!
Ve,
mína nzomoŋán ma.
2 Amú ná me ne mbébéánn ákála denan ya ábéánn Nzamá,
amú ná maá vé mína atsiŋŋ alúk ébe nnóm mbɔ́ɔ́ á mfá álére mína ébe Kristo amvála ané éndúnn ngwan é ne kaa ayeŋŋ.
3 Ve,
ma kɔ wɔŋŋ ná,
é táa bɔ amvála enziŋ ná ané ñó ya mékeŋŋ meñ e ngá duk Eva,
átémŋa denan dá é lés fe ébe nlém mbɔ́ɔ́ ya mfúbánn ébe Kristo.
4 Amú ná bébélá,
ngé mot enziŋ aa nzu eé kat é fwéñ Yesus mfé,
éñí bíí ndzí kat fwéñ,
ngé ki ná mína ñɔŋ nsísim mfé aa selan ye éñí míní ngá ñɔŋ,
ngé ki ná mína yébe é mbamba fwéñ aa selan ye éñí míní ngá ñɔŋ,
mína mína túga dɔ nzomo.
5 Amú ná ébe dzam enziŋ ma ñɔŋ ná me sés omomot enziŋ á mfá bora bé baapostol béte.
6 Ve ngé me ne bɔ ndzímán á nkɔ́bɔ,
me sés dɔ á nyemann,
fáve ná ébe mam mése,
bí lére yaá mína ásesé.
7 Ye maá bɔ nsémm,
ná meé sili mámyen ósí á mfá ye ná mína míní tɔbɔ mbélánn ó yóp;
dá é tɔɔ́ ná maá kat mína é mbamba fwéñ Nzamá á nzeze?
8 Me ngá dzíp bíkóánn bebwíni bifé,
meé ñɔŋ ntáŋ ébe bɔ́ á mfá ábɔ éséññ Nzamá ébe mína,
9 éde é tám dá me mbé bíabe mína,
méé yi fe byém,
meé ndzí bɔ mot enziŋ mbaga;
amú ná niané bɔbédzaŋ bé ngá sɔ́ á Masedonia,
bá dzálá ma ya é byém me ngá yi;
éde ná maá baale mámyen ébe dzam ése,
ma ye fe baale mámyen ná me táa mína bɔ mbaga.
10 Amvála ané é bébélá Kristo a ne ébe ma,
ébe éngúŋ dam te băá ye ma kam ya dɔ ébe mebeŋŋ mé sí méye Ákaya.
11 Amú dzé?
Ye é ne ná măá dziŋ mína?
Nzamá éñe aa yem dɔ!
12 Ve,
é dzam ma bɔ,
ma ye tsíni ná ma bɔ dɔ ná me dzip afóo,
édí é bot bá kómo,
ná bé lére bébyen ané ntéññ mbɔ́ɔ́ ya bía,
ébe édí bot béte bá vága.
13 Amú ná bot béte bé ne baapostol méduk,
minéneá bebɔ biséññ,
bá veŋan bébyen ané é baapostol Kristo.
14 Dé sés ki nzigan;
amú ná Sátan ñí aa veŋan fe émyen ané ángel ye éyéá.
15 Ya amú dzam te,
dá é sés eyágán dzam,
ngé bevwála bíséññ beñ bá bá veŋan fe bébyen amvála ané bevwála bíséññ béye á nzósoó;
ásúgánn deba dá ye bɔ amvála ané míbɔann myeba mí né.
Mídzuúk Pablo
16 Ma bera dzó ná,
mot enziŋ a táa ma ñɔŋ ané me ne okúkút mot;
ve ngé mína bɔ dɔ,
ñɔŋŋán ma atwaa amvála ané okúkút mot,
á mfá ye ná ma me vága fe oyomm abímm.
17 Ébe é dzam ma kɔ́bɔ,
măá kɔ́bɔ dɔ amvála ané édí Ntí,
fáve amvála ané okúkút mot,
ya mebúnn méte ná ma me vága ya mɔ.
18 Dá é tɔɔ́ ná abwiññ bot é ŋga vága yaá amvála ané bot béye é sí ñí,
ma ma ye fe vága.
19 Amú ná,
míní tɔɔ́ mifefák,
mína mína nzomo é bot bé ne mekút mé bot;
20 akála ná,
ngé mot enziŋ aa tɔɔ mína mikómm,
ngé mot enziŋ aa víli mína byém,
ngé mot enziŋ aa duan ya mína,
ngé mot enziŋ aa bére émyen ó yóp,
ngé mot enziŋ aa bími ki mína ású,
mína mína nzomo dɔ.
21 Ma dzó dɔ á mfá osoán,
amvála ané ngé bí bɔ yaá mitéteák;
ve ébe dzam enziŋ afé ye mot enziŋ a ne bɔ éngúŋ,
(ma kɔ́bɔ dɔ ané okúkút mot),
ma ma bɔ fe éngúŋ.
22 Ye bé ne bwann Beebreo?
Ya fe ma!
Ye bé ne bwann Beisraelita?
Ya fe ma!
Ye bé ne é mvɔŋ Abraam?
Ya fe ma!
23 Ye bé ne bevwála bíséññ Kristo?
(Ma kɔ́bɔ amvála ané ngé me ma dzímle yaá kén),
ma ma daŋ;
ébe bíséññ,
byá bíra ma fwíige;
ébe ntɔbán á mbok,
abwiññ bíyɔŋ;
ébe biyíra,
bí sés ya táŋ;
ébe baáŋgónó ye áwú,
abwiññ bíyɔŋ;
24 ébe Bejudio,
me ñɔŋ yaá milɔ́ŋŋ mewóm mé léa ya milɔ́ŋŋ ebuú táŋ biyɔŋ bí tán;
25 bé yít yaá ma ya mikás táŋ biyɔŋ bí léa;
bé lúm yaá ma mekwá,
eyɔŋ evɔ́ɔ́;
byéa ó kúbán yaá ya ma,
táŋ biyɔŋ bí léa;
me lot yaá ngúrá alú ya ngúrá mos édwá máŋ été;
26 ébe bikena,
abwiññ biyɔŋ;
ébe baáŋgónó béye aswíñ,
ébe baáŋgónó béye benzeé midzɔ́ŋŋ;
ébe baáŋgónó béye bot béye é sí dam,
ébe baáŋgónó béye bot béye meyɔŋ mefé;
ébe baáŋgónó béye á kísoan été,
ébe baáŋgónó béye éyáŋŋ été,
ébe baáŋgónó béye á máŋ été,
ébe baáŋgónó béye énzénzaŋ bɔbédzaŋ béye méduk,
27 ébe eséññ ya fe mvwaránn;
ébe abwiññ melú mé evéveññ;
á nzeñ ya fe evéé;
abwiññ bíyɔŋ kaa ádzí;
ávép été ya fe kaa bitóp.
28 Mam méte mé ne émá méye átán,
ve mfá mbɔ́ɔ́,
nkelann nlém ó yóp ákála bíkóánn bebwíni bíse wá wá dzéñ fe ébe ma kada mos.
29 Nzá ané ntéteák,
kaa ná ma ma tɔɔ́ fe ntéteák?
Nzá bá bɔ ná ákɔp obaá,
kaa ná ma bíra yéá?
30 Ngé ma yian vága,
ma ye vága ébe ntéteák me né.
31 É Nzamá ya Éséá Ntí Yesus,
éñí a ne ya olugú mbéámbéá,
aa yem ná măá bɔ minéa.
32 Á Damasko,
é ŋgɔ́vina a ne édzwée kéza Aretas ásí,
a ngá mɔ́mɔ é kísoan Bedamasko ná ábiñ ma.
33 Ve,
bá bé ngá sili ma á wúna ye á mfim óngóo á mkpéñ été,
néa éñe me ngá túp é mó meñ été.