É nguu édzwée apostol Pablo
10
Éde mámyen,
Pablo,
ma bíra mína dzaa ébe evwévwé nlém ya áñep Kristo,
ná é tám me ne énzénzaŋ denan ma yéne ané me ne ya nsilann ñúu ósí,
ve é tám da me ntɔɔ́ kɔɔ́ mé ŋga baŋan ya mína;
2 éde ma bíra dzaa ná é tám ma ye mína tɔbɔ été,
me táa mína baŋan akála mébúnn me tɔɔ́ ya mɔ ná ma ye bɔ aywá ébe é bot benziŋ bá ñɔŋ bía amvála ané ngé bía niŋ ané bot béye é sí ñí.
3 Amú ná atwaa bía niŋ ané bot béye é sí ñí,
bĭá lúman amvála ané bot béye é sí ñí,
4 amú ná byém melúmán byeá bí sés ébí bot béye é sí ñí,
fáve ná bí ne biwólo ébe Nzamá ná byá tsam mendá ménguu mé edzwée,
5 bíí wea mekéá ósí ya fe é dzóm ése dá tébe nyemann Nzamá á ngamm áyát,
bíí ke fe ya otémŋa ósesé míkómm ná ó bɔ Kristo mewók.
6 Bí téle fe nkomann á mfá ávé akira mbɔann melɔ́ ósesé,
éyɔŋ méwók menan mé ntɔɔ́ ndzálánn.
7 Mína yén mam amvála ané má yéne átán.
Ngé mot enziŋ a tɔɔ́ émyen ya mebúnn ná a ne éñí Kristo,
á beragá dɔ tém á mfá weñ émyen ná,
amvála ané a ne éñí Kristo,
bía bí ne fe dɔ.
8 Amú ná măá ye wók osoán,
afáŋbɔ ná ma bíra vága ébe é nguu édzwée dea,
éñí Ntí a vé yaá á mfá ávé mína nguu,
se átsam mína,
9 ná é táa fonan amvála ané ngé ma kómo mína vé bisisis ébe békálara bam.
10 Éde ngúrá mfá,
bá dzó ná,
bekálara bé ne adziít ya nguu,
ve á mfá mbɔ́ɔ́,
ñúu da yéne ané ntéteák mot,
efíá dá é ne fe ané édí bé byana yaá.
11 Mot te,
á ñá táŋ édí ná,
édí bí ne éfíá ébe bekálara,
bí tɔɔ́ kɔɔ́,
bí ne fe dɔ á mbɔann é tám bí ntɔɔ́.
12 Amú bĭá yébe ná bía láŋ bía bébyen ngé ki ákánan bía bébyen ya bot benziŋ béye ébá bá sák bébyen,
ve béé vakgan bébyen ya bébyen,
béé kanan fe bébyen ya bébyen,
bé ne kaa fak.
13 Ve bía,
bĭá vága ábímm é ne kaa áyian,
fáve ná amvála abímm ovakga Nzamá a ngá lére bía ná bí nzu koan ya mína.
14 Amú ná bĭá loran óvakga wea,
amvála ané ngé bĭá bé koan ya mína,
amú ná bía bía tára nzu ásian ébe mína ya é mbamba fwéñ Kristo.
15 Bía bébyen bĭá vága ábímm é ne kaa áyian ébe biséññ bot befé,
ve bí tɔɔ́ ya oyan ná,
amvála ané mbwínánn wenan wá yémbe,
bía bía ye fe bíra tɔbɔ mbélánn ó yóp ébe mína ya óvakga wea,
16 á mfá ákat mbamba fwéñ ébe mévóm mé ne mína ósú,
ná bí nza vága ébe óvakga é bot bevɔ́ɔ́ bé bɔ yaá.