Avwálá á mfá bɔbédzaŋ
9
Amú ná ngúrá mfá,
ébe avwálá á mfá mítɔ́pbán mí bɔbédzaŋ,
dá buk ná me tsili mína;
2 akála ná ma yem é mbamba nkómánn wenan éñí ma vága ya ñí ébe ású Bemasedonio,
ná Akaya á tɔbɔ yaá nkomann atéé ye mbú ó ngá lot,
éde ná ábéánn denan é túm yaá abwiññ bot ásí.
3 Ve mfá mbɔ́ɔ́,
me lóm yaá bɔbédzaŋ,
ná mévágá mea ébe mína mé nza bɔ nzeze ébe dzam te,
ná míní tɔbɔ nkomann ámvála me ngá dzó dɔ;
4 á nza bɔ ná ngé Bemasedonio benziŋ bé sɔ́ bíabe bɔ́,
bé koan ya mína kaa nkomann,
véa bía bía ye wók osoán ébe mévágá mea,
(á mfá ye ná me nza dzó ná mína).
5 Édɔ me ngá tém ná dá yian ná bí lép bɔbédzaŋ ná bé tára ke ósú á mfá ánzu ébe mína,
ná bé tára koman avwálá añep denan míní ngá tára kyaa,
á mfá ye ná é tɔbɔ nkomann amvála ané avwálá añep,
se ané ébá bé belé onzáŋŋ akúmm.
Bía vé ya mesán
6 Ve ma dzó édí ná:
“Éñí aa beñ avítsaŋ,
aa ye fe yoo avítsaŋ;
éñí ñí aa beñ abwiññ abwará,
aa ye fe yoo abwiññ abwará.”
7 Éde kada mot á vá amvála ané a ngá tára kík á nlém weñ été,
se ya nlém eywiññ,
ngé ki ya ntsinann;
amú ná Nzamá aa dziŋ éñí aa vé ya mesán.
8 Nzamá a ne bɔ ná mvɔmm ése eé fwíige ébe mína;
á mfá ye ná míníí belé eyɔŋ ése ábímm dá yian,
ébe byém bíse,
ná míní fwíige á mfá mbamba mbɔann óse;
9 ámvála é ntɔɔ́ ntsilann ná:
“A ngá myea,
a ngá vé mitétéññ;
é nzósoó weñ aa laŋan kɔ́mm áse.”
10 Éde,
éñí aa vé é mot aa beñ mvɔŋ ya mfémm ébe é mot aa dzí,
aa ye vé,
á fwiñ fe é mvɔŋ dzenan,
aa ye fe kɔgle bibumá bíye é nzósoó wenan;
11 mína ye tɔbɔ ededea ndzálánn ébe dzóm ése á mfá ávé ya nlém añep ósesé,
éwí wá vé Nzamá akíba ébe bía.
12 Amú ná mbɔann éséññ Nzamá ye ákee ávwálá dí,
dăá dzéá édí mítɔ́pbán mí bɔbédzaŋ myá yi etámm,
fáve ná dá dzéá fe abwiññ mvéán Nzamá akíba;
13 ébe édí mína ye vé,
bé vé Nzamá dúmá,
amú mewók menan ya fe mémem menan ébe é mbamba fwéñ Kristo ya ávwálá añep denan á mfá weba ya á mfá bot bése.
14 Éde bá á mfá weba,
ya meyaglán á mfá wenan,
bá bé lére fe édziŋŋ deba ákála ededea abwiññ ábwará Nzamá e ne ébe mína.
15 Akíba ya Nzamá akála é dás deñ bé sés vé nkanaŋa.