Áñep bot béye á Masedonia
8
Éde,
á bɔbédzaŋ,
bía bɔ mína ná míní yem é mvɔmm Nzamá,
éñí bé vé yaá ébe bíkóánn bebwíni bíye á Masedonia,
2 ná ébe mora nkat ye á ndzuúk,
mésán meba má mé ngá fwíige,
ededea átéññ deba dá é ngá daŋ fe fwíige ébe ntam ye áñep deba.
3 Ma vé ngañiá ná,
amvála mam bé mbé belé,
bá vé ya nkómánn weba álot ábímm mam bé mbé belé;
4 béé dzaa bía ya abwiññ ndzaá ná bí vé bɔ́ afóo ná bé ñɔŋ ngap ébe mvɔmm ye ávwála bebwíni,
5 se ki ané bí ngá tém,
fáve ná bé ngá tára vé bébyen ébe Ntí,
véa ébe bía amvála ané nkómánn Nzamá ó ne;
6 ya dzam te édɔ bí ngá dzaa Tito ná,
ámvála a ngá tára,
amvála te édɔ fe á mana ébe mína é mvɔmm ñí.
7 Ve amvála ané míní ne ndzálánn ébe dzam ése,
ébe á mbwínánn ya ébe éfíá,
ébe á nyemann ya ébe nkée ósesé,
ébe édziŋŋ míní ngá lére á mfá wea,
ná míní tɔbɔ fe ndzálánn ébe é mvɔmm ñí.
8 Măá kɔ́bɔ dɔ ané bá mánan,
fáve ná ákyak nkée ébe é bot bevɔ́ɔ́,
ya fe é bébélá édziŋŋ wenan.
9 Amú ná mína yem é mvɔmm Ntí wea Yesukristo,
ná ákála denan,
a tɔɔ́ nkúkúmm,
ñí aa ngá veŋan ntétéññ mot,
á mfá ye ná ébe átéññ deñ,
míní nzu veŋan mikúkúmm.
10 Ébe é dzam dí ma vé mína é fak dam;
amú ná dzam te dá é ne fe mína ya abúánn,
mína é bot,
se fáve ná míní ngá tára dɔ bɔ,
ya fe ná míní ngá kómo dɔ bɔ,
atéé ye á mbú ó ngá lot;
11 ve áwola dí,
dzálágán fe dɔ ya mbɔann,
ná ámvála míní mbé míní tɔɔ́ nkomann ya mbamba nkómánn,
amvála te fe míní dzálá dɔ ébe é dzóm míní belé.
12 Amú ná ngé mbamba nkómánn á ntɔɔ́,
bá yébe ámvála é dzóm bé belé,
se ané é dzóm bĕé belé.
13 Măá dzó dɔ á mfá ye ná bot befé bé belé avwálá,
ve mína mína ndzuúk,
fáve ná ábɔ ntéññ mbɔ́ɔ́.
14 Éde ébe é tám ñí,
ábwiññ denan dá é dzálá á ndzéŋŋ weba,
á mfá ye ná ábwiññ deba dá é dzálá fe ndzéŋŋ wenan,
ná ábɔ ntéññ mbɔ́ɔ́.
15 Ámvála é ntɔɔ́ ntsilann ná:
“Éñí a ngá twáa abwiññ,
ĕé ngá buk ñí,
éñí ñí a ngá twáa avítsaŋ,
ñí ĕé ngá yi ki dzóm.”
Tito bábe bemvwíññ
16 Ve,
akíba ya Nzamá éñí a vé yaá nkée ovɔ́ɔ́ ya ovɔ́ɔ́ ébe nlém Tito á mfá wenan;
17 akála melépgá a ngá ñɔŋ,
ñí a tɔɔ́ ya ededea abéánn,
a tée yaá ná a nzu ébe mína ya nkómánn weñ.
18 Éde bíabe bɔ́ fufúlu bí lóm yaá mwadzaŋ,
éñí éwógá deñ ébe á mbamba fwéñ,
é ne ébe bíkóánn bebwíni bíse,
19 se fáve édɔ etámm,
ya fe ná bíkóánn bebwíni bí tɔ́p yaá ñí ané mvwíññ dea ye ékena ébe é mvɔmm ñí,
éñí bía bɔ ya dɔ eséññ á mfá é dúmá Ntí émyen,
á mfá álére mbamba nkómánn wea;
20 bíí dzip ná mot enziŋ a nza bía vé meku ébe abwiññ mvɔmm bía séan ya dɔ dí;
21 amú ná bía dzéŋ ná bí bɔ édí e ne mvéáñ,
se fáve ósú Ntí etámm,
ya fe ósú bot.
22 Éde bíá lóm mwadzaŋ wea bábe bɔ́,
éñí bí kyak yaá abwiññ bíyɔŋ ébe nkée weñ ébe abwiññ mam.
Ve,
áwola dí a ne ededea nkée,
ya abwiññ mébúnn a tɔɔ́ ya mína.
23 Á mfá Tito,
a ne ñɔŋngap ye éséññ dam,
bía ñí bía bɔ fe eséññ á mfá wenan;
éde á mfá bɔbédzaŋ,
bé ne milómán míye bíkóánn bebwíni ya é dúmá Kristo.
24 Édɔ é ne ná,
míníí lére bɔ́ ndem ye edziŋŋ denan ósú bíkóánn bebwíni,
ya ákéá mevágá meá á mfá wenan.