7
Édɔ ná á mindzindziŋŋ myám,
é tɔɔ́ ná bí belé mengaá méte,
bí fúbugán bía bébyen ébe ayeŋŋ ése ye ó ñúu ye édí ye á nsísim,
bíí bɔ ntélán eki wea ewólo ébe é wɔŋŋ Nzamá.
Mésán Pablo
2 Váán bía afóo;
bíí ndzí bábá mot enziŋ,
bíí ndzí ywíñ mot enziŋ ntuk,
bíí ndzí ki duan mot enziŋ.
3 Măá dzó dɔ á mfá ávé mína meku;
amú me tára yaá dzó ná míní ne bía mílém été,
ané áwú,
ané ániŋ.
4 Me belé ededea filí á mfá wenan;
ma bíra fe vága ya mína;
ébe ndzuúk wea ósesé,
me ne ndzálánn ya mfoŋann nlém,
mesán má ma fwíige fe ma.
5 Amú ná éyɔŋ bí ngá sian á Masedonia,
é ñúu dea deé ndzí belé awaabé,
fáve ná bí ngá yén midzuúk ébe mifá míse;
átán,
melúmán;
mílém été ñí ya wɔŋŋ.
6 Ve Nzamá éñí aa foŋ mílém ébá bé ne nsilann ósí,
éñe,
a ngá foŋ bía milém ya ásɔ́ɔ́ Tito;
7 se fáve ya ásɔ́ɔ́ weñ,
ve ya fe mfoŋann nlém éwí mína ngá foŋ ñí ya wɔ́,
eé kat bía fwéñ é bora nkómánn wenan,
míyónn myenan ya ábéánn denan ákála dam;
akekwíñ ná mé ŋga bíra daŋ sán.
8 Amú ná ngé má vé mína eywiññ ya é kálara wɔm,
măá dzoban ya dɔ.
Atwaa ngé maá dzoban ya dɔ,
me téa fá ná kálara te aá vé mína eywiññ,
afáŋbɔ ná fáve oyomm abɔ́ŋŋ tám.
9 Ve áwola dí ma sán,
se amú ná míní ngá tɔbɔ eywiññ,
fáve akála ná míní ngá tɔbɔ eywiññ á mfá ádzoban;
amú ná míní ngá tɔbɔ eywiññ amvála ané nkómánn Nzamá ó ne,
á mfá ye ná míní nza dzímle dzam enziŋ á mfá wea.
10 Amú ná éywiññ é ne amvála ané nkómánn Nzamá ó ne dá ke ya mot édzoban á mfá akoroga,
kaa ávé eywiññ;
ve eywiññ ye éniŋ dzí dá nzu ya mot áwú.
11 Amú ná,
dággán é dzam dí ébyen,
nzá nkée dzam te é vé yaá mína!
Átɔbɔ eywiññ amvála ané Nzamá aa kómo,
nzá okamŋa,
nzá meyéá,
nzá wɔŋŋ,
nzá nkómánn,
nzá abéánn,
nzá akunŋa.
Ébe dzam ése míní lére yaá mína bébyen ná míní ne nkeññ ébe dzam te.
12 Édɔ ná,
afáŋbɔ ná maá tsili mína,
deé ndzí bɔ akála éñí a ngá bábe mot,
ngé ki akála éñí a ngá tɔbɔ mbábánn,
fáve ná akála nkée wenan á mfá wea ó léreban mína éyéá ósú Nzamá.
13 Akála te édɔ bí ngá tɔbɔ ya mfoŋann mílém.
Ve á mfá mfoŋann mílém wea,
bía daŋ bíra sán akála mésán Tito,
amú ná nsísim weñ,
wá biñ awaabé ákála mína bésesé.
14 Ngé me bɔ yaá mevágá ya ñí ébe dzam enziŋ á mfá wenan,
meé ndzí wók osoán;
fáve ná,
amvála ané bí kɔ́bɔ yaá ya mína dzam ése bébélá,
amvála te fe mevágá mea ébe Tito ma me súgan yaá fe bébélá.
15 Édɔ ná nlém weñ ébe mína ó ne onén ádaŋdaŋ éyɔŋ aa síman méwók mína bésesé,
ámvála míní ngá ñɔŋ ñí ya wɔŋŋ ya beñeñeá.
16 Ma sán,
ná me tɔɔ́ ya mebúnn ya mína ébe mam mése.