Aloá ákála Yesus
4
Dá é tɔɔ́ ná bí mbelé éséññ Nzamá dí,
amvála bía bí ñɔŋ yaá nyénánn engóngɔ́ɔ́,
bĭá teak,
2 fáve ná,
bí tep yaá é mam méye ásweññ mé ne osoán,
kaa ki áwulu ya mekeŋŋ,
ngé ki áviri efíá Nzamá ya meduk,
fáve ná ya nléránn bébélá éndendaŋ,
bía lére nkyabán bía bébyen ébe ósímánn ye á nlém mot áse ósú Nzamá.
3 Ve,
ngé é mbamba fwéñ wea a ne ásweññ,
a ne ásweññ á mfá é bot bá dzáŋ.
4 Ébá nzamá ye éniŋ dzí a dzip yaá miló míye é bot bé ne kaa ábwíni,
ná bé bɔ kaa áyén éyéá é mbamba fwéñ ye á dúmá Kristo,
éñe a ne éfonann Nzamá.
5 Amú ná bía bébyen bĭá kat é mbamba fwéñ wea,
fáve éñí Ntí Kristo Yesus,
ve bía bébyen,
áloá denan ákála Yesus.
6 Akála ná Nzamá,
éñí a ngá dzó ná,
eyéá é feañŋe á dzíbi été,
éñe fe a feañ yaá mílém myea éyéá ye á nyemann ébe é dúmá Nzamá dá feañ ású Yesukristo.
Ániŋ akála mbwínánn
7 Ve bí belé ntam te bílas bí sí été,
á mfá ye ná mora eyágán nguu á bɔɔ́ge éñí Nzamá,
á bɔ fe kaa ábɔ áawea;
8 ná bíí yén bindáglé ébe dzam ése,
ve bía kaa áyébe swaá;
bía nzaman,
ve bĭá dzímle mebúnn;
9 bá dzéŋ bía ásí,
ve bí sés nlamann;
bá sɔ́gle bía ásí,
ve bĭá dzáŋ;
10 tám áse bía ke ya áwú Yesus ó ñúu,
á mfá ye ná éniŋ Yesus dá é léreban é ñúu dea.
11 Amú ná bía é bot bí ne betétéá,
éyɔŋ ése bá kee bía áwú akála Yesus,
á mfá ye ná éniŋ Yesus dá é léreban ébe éwúwúa ñúu dea.
12 Édɔ é ne ná,
awú édɔ é bɔ ébe bía,
ve eniŋ dá ébe mína.
13 Ve bía bí belé nsísim mbɔ́ɔ́ ya mbɔ́ɔ́ te ye á mbwínánn,
amvála ané édí é ne ntsilann ná:
Maá bwíni,
akála te édɔ me ngá kɔ́bɔ;
bía bía bwíni fe,
akála te édɔ bía bía kɔ́bɔ fe.
14 Éde bía bía yem ná éñí a ngá wómo Ntí Yesus,
ñí aa ye fe bía wómo bíabe Yesus,
aa ye fe bía lére fufúlu bíabe mína.
15 Amú ná ébe mam mése méte mé bɔban yaá ákála denan,
á mfá ye ná é mvɔmm da ke da ke ébe abwiññ bot,
eé bɔ ná mvéán akíba ó fwíige á mfá é dúmá Nzamá.
16 Édɔ ná,
bĭá teak,
afáŋbɔ ná é mot ye átán wea aa ke aa bweñ avítsaŋ avítsaŋ;
ve é mot ye nlém été wea,
aa ke aa tɔbɔ mfefeñ mos ya mos.
17 Amú ná ovovos ndzuúk wea bía lot été wí,
wá wá vé bía é mvaba ye á dúmá e ne mbéámbéá,
éñí bé sés kanan ya dɔ,
18 é tám mína bɔ kaa ábem mís ébe é mam má yéne,
ve fáve émá mé ne kaa áyéne;
amú ná é mam má yéne má tɔbɔ avítsaŋ tám,
ve émá mé ne kaa áyéne émɔ má tɔbɔ mbéámbéá.