Mína míní ne é kálara Kristo
3
Ye ná bía bera mína tára lére bía bébyen ná bí ne nkyabán?
Ngé ki ná,
ye ná bía yi,
amvála ané bot benziŋ,
bekálara bé nkyabán ébe mína,
ngé ki á mfá wenan?
2 Mína míní ne é kálara wea,
ntsilann mílém myea été,
bot bése béé láŋ ñí,
béé yem fe ñí,
3 é kwíñ yaá éyéá été ná míní ne é kálara Kristo,
bía bía tsili ñí,
a sés ntsilann ya nsɔŋ,
fáve ya Nsísim é Nzamá a ne ntétéá;
a sés ntsilann méfép mekwá,
fáve méfép méye á nlém mot binam.
4 Ve,
bí belé mebúnn méte ébe Kristo ósú Nzamá;
5 dé sés ná bía bébyen bía ñɔŋ ná bía tá dɔ twíñ,
fáve ná nkɔkgán wea wá sɔ́ bía ébe Nzamá,
6 Éñe fe aá téle bía ané mikɔkgán bevwála bíséññ béye á mfefeñ elat,
se édí ye á ntsili,
fáve édí ye á Nsísim;
amú ná ntsili wá ywíñ,
ve Nsísim ñí aa vé eniŋ.
Eséññ ye áwú ya eséññ ye á Nsísim
7 Ve ngé mbɔann éséññ Nzamá ye áwú,
ó tɔɔ́ ntsilann á mefép mékwá ó mbé ya dúmá,
akekwíñ ná bwann Israel bĕé mbé bem Moisés mís ású,
akála é dúmá é mbé ású deñ,
édí é ngá ke dá síbi;
8 Nde mbɔann éséññ Nzamá ye Nsísim wăá ye daŋdaŋ ya dúmá.
9 Amú ná ngé mbɔann eséññ Nzamá wá ñɔŋ nkíkgán misaŋ ó mbé ya dúmá,
mbɔann eséññ Nzamá ye á nzósoó éwɔ wá ye daŋ fwíige ya dúmá.
10 Édɔ ná,
édí é mbé ya dúmá,
é súgan yaá kaa dúmá,
akála é dúmá dá daŋ ya nnén.
11 Amú ná ngé édí dá ke dá síbi é mbé ya dúmá,
édí dá dá laŋan édɔ dá ye daŋ bɔ ya dúmá.
12 Édɔ é ne ná,
bía bí tɔɔ́ ya amvála oyan te,
bía bíra kɔ́bɔ kaa wɔŋŋ,
13 se amvála ané Moisés a ngá bɔ eé dzip ású deñ ya etóp,
á mfá ye ná bwann Israel bé táa ñí bem mís ású,
ébe asúgánn ye édí é ngá ke dá síbi;
14 ve miló myeba mí ngá mana bɔ́ tɔbɔ aleét,
amú ná ye anzukwíñ émuú,
éyɔŋ bá láŋ bífíá bíye á nnomm elat étóp evɔ́ɔ́ ya evɔ́ɔ́ te,
é ngén é yala,
akála ná dá dá kólo ébe Kristo.
15 Éde ye anzukwíñ émuú,
éyɔŋ ése bá láŋ mébá Moisés,
etóp te é yala mílém myeba,
16 ve,
ngé mot á búlán ébe Ntí,
etóp te dá é kólo.
17 Éde Ntí éñe a ne Nsísim,
é vóm Nsísim Ntí ó ne,
véa filí e ne.
18 Ve bía bésesé,
ya ású éyéá été,
bíí bíli é dúmá Ntí ané á ngɔɔ́p été,
bía ke bía tɔbɔ ntsénán ébe á dúmá ye á dúmá ámvála éfonann émyen,
akála éséññ Nsísim Ntí.