2
Amú ná maá kík é dzam dí ébe mámyen ná,
măá bera nzu ya mína ya eywiññ.
2 Da é tɔɔ́ ná,
ngé ma vé mína eywiññ,
véa nzá ñí aa ye ma vé mesán,
nde se fáve éñí me tɔɔ́ yaá eywiññ?
3 Dzam te édɔ fe me ngá tsili mína ná,
éyɔŋ ma ye sian me nza belé eywiññ ébe é bot bá yian ma vé mesán;
meé tɔbɔ fe ya mína bésesé mebúnn,
ná mésán mam má mé bɔɔ́ge émá mína bésesé.
4 Amú ébe abwiññ ndzuúk ya nlém mitéñ maá tsili mína ya abwiññ míige,
se ná míní tɔbɔ ya eywiññ,
fáve ná ngé míní ne yem nzá ámvála edziŋŋ me belé ádaŋdaŋ ébe mína.
Pablo aa yágale á mfá bidzwiigá
5 Éde,
ngé mot enziŋ a tɔɔ́ yaá ma eywiññ,
se ma etámm a tɔɔ́ eywiññ,
ná me nza daŋ bɔ ngét,
fáve ná aá bɔ dɔ mína bésesé.
6 Éde,
ákira abwiññ bot é vé yaá mot te,
é yian yaá;
7 édɔ é ne ná,
mfá mbɔ́ɔ́,
dá daŋ ya mvéáñ ná míní dzwii ñí ya áfoŋ ñí,
é nza bɔ amvála enziŋ ná éywiññ dá é bíra ñí mana dzugu.
8 Akála dzam te édɔ ma lép mína ná míní lére édziŋŋ denan ébe éñe;
9 akála dzam te fe maá tsili mína,
á mfá ákyak mína ná me yem ngé mína bɔ dzam ése mewók.
10 Édɔ ná éñí mína dzwii dzam enziŋ,
ma ma dzwii fe ñí;
édí me dzwii yaá,
ngé me dzwii yaá dzam enziŋ,
maá bɔ dɔ ébe Kristo ákála denan,
11 ná Sátan a nza duan ya afóo ébe bía;
akála bĭá dzími ki bínginiŋe byeñ.
12 Éde éyɔŋ mé ngá sian á Troas ákála é mbamba fwéñ Kristo,
mbéñ wa ó yɔ́ŋbe fe ma ébe Ntí,
13 meé ndzí belé awaabé á nsísim wɔm été akála ná meé ndzí koan ya mwadzaŋ Tito;
fáve ná maá yáán ya bɔ́,
mé kéñ á Masedonia.
Pablo aa vé Nzamá akíba
14 Ve,
akíba ya Nzamá,
éñí a ntéle bía ósú ná bí wún tám áse ébe Kristo,
éde ná ébe bía,
énum ye á nyemann weñ dá léreban vóm áse;
15 akála ná,
bía bí ne énum dá sɔ́ ébe Kristo á mfá Nzamá,
ané ébá bá koroban ané ébá bá dzáŋ;
16 ébe ngúrá mfá bot,
enum ye áwú á mfá awú;
á mfá ébá bevɔ́ɔ́,
enum ye éniŋ á mfá éniŋ.