Áwómó míwúán été
15
Á bɔbédzaŋ,
ma lére mína ná,
é mbamba fwéñ me kat yaá mína,
éñí míní ñɔŋ yaá,
éñí míní laŋan yaá fe été,
2 ébe éñí,
míní tɔbɔ yaá fe nkoránn,
ngé mína baale éfíá me ngá kat mína,
ngé é sés ná mínaá bwíni á nzeze.
3 Amú ná édí ósúá,
maá kee mína édí ébyen ma me ngá ñɔŋ fe,
ná Kristo aá wú ákála mísémm myea,
ámvála é ne Mítsili été;
4 ná bá dzep ñí,
a wómo fe míwúán été é mos léa,
ámvála é ne Mítsili été;
5 ya fe ná aá yéne ébe Pedro;
é belan véa,
ébe beyága awóm ya bé beáñ;
6 nia véa,
aá yéne fe eyɔŋ déá ébe bɔbédzaŋ álot táŋ mitet mí tán,
abwiññ ye été dá é ngén fe é téa,
ve abímm enziŋ dá é ntɔɔ́ óyó [nwúán];
7 é belan véa,
aá yéne ébe Jakobo;
véa,
aá yéne ébe baapostol bése.
8 Éde ómvúmvúa bésesé,
ané éñí á byála ná tám é lot yaá,
aá yéne fe ébe ma.
9 Amú ná énzénzaŋ baapostol ma me ne éñí aa daŋ ya avítsaŋ,
măá yian ki ya dɔ ná bé lwée ma ná apostol,
akála ná me ngá dzéŋ ekóánn bebwíni Nzamá ásí.
10 Ve akála é mvɔmm Nzamá,
me ne é dzóm me né,
é mvɔmm deñ te da deé ndzí ki tɔbɔ ébe ma á nzeze,
éde dá é tɔɔ́ ná ma me bɔ yaá eséññ álot bésesé,
afáŋbɔ ná se ma,
fáve é mvɔmm Nzamá e ne ébe ma.
11 Édɔ ná,
a ne bɔ ma,
ngé ki ébɔ́,
néa éñe bía kat fwéñ,
néa fe mína míní bwíni yaá.
12 Éde ngé bá kat fwéñ ná Kristo a wómo yaá míwúán été,
é ne bɔ á yá ná bot benziŋ béye ébe mína bá dzó ná nwómán miwúán ó sés?
13 Ve,
ngé nwómán miwúán ó sés,
atwaa Kristo ñí eé ndzí ki wómo.
14 Éde,
ngé Kristo ñí eé ndzí wómo,
nkatann fwéñ wea ó ne nzeze ya fe mbwínánn wenan.
15 Éde,
bá bé ñɔŋ yaá bía ané mínéneá béngañiá Nzamá,
akála ná bía vé ngañiá ná Nzamá aá wómo Kristo,
éñí ñí eé ndzí wómo,
ngé dá e ne ná miwúán myăá wómo.
16 Amú ná ngé miwúán myăá wómo,
Kristo ñí eé ndzí ki wómo.
17 Édɔ ná,
ngé Kristo eé ndzí wómo,
mbwínánn wenan ó sés ya eban;
mína míní ngén fe mísémm myenan été.
18 Dá yíli véa ná,
é bot bé ntɔɔ́ óyó [nwúán] ébe Kristo,
bá bé mana yaá fe dzáŋ.
19 Éde ébe éniŋ dzí,
ngé Kristo éñe bía bí tɔbɔ yaá ya ñí mebúnn etámm,
bía bí ne ébá bá daŋ ya engóngɔ́ɔ́ álot bot bése.
20 Ve éndagá,
é ne ná,
Kristo ñí a wómo yaá míwúán été,
é ngap ósúá ye ébá bé ntɔɔ́ óyó [nwúán].
21 Amú ná amvála ané awú é ngá sɔ́ ákála mot,
édɔ fe ná,
ákála mot nwómán miwúán wá ó sɔ́ yaá.
22 Amú ná amvála ané ébe Adán bot bése bá wú,
néa fe ébe Kristo bot bése bá ye tɔbɔ ya eniŋ.
23 Ve kada mot ébe étɔɔ́ dzeñ;
Kristo,
ngap ósúá;
é belan véa,
é bot bé ne ébá Kristo ébe ásɔ́ɔ́ weñ;
24 éde ómvúmvúa,
éyɔŋ aa ye kee Nzamá Éséá edzwée ngɔ́mán ye éniŋ ngúrá,
ákoan ná,
a mana yaá tsam ekán ése,
ya nguu edzwée,
ya menguu mése.
25 Amú dá yian ná á dzwée akekwíñ ané aa ye mana bwíi mínzínzíŋŋ myeñ míse mébɔ meñ ásí.
26 Éde,
nzínzíŋŋ bá ye súgan tsam,
éwɔ ó ne awú;
27 amú ná a bwíi yaá mam mése mébɔ meñ ásí.
Ve,
éyɔŋ aa dzó ná mam mése mé mbóo ñí ásí,
dá lére éndendaŋ ná,
dá vea éñí émyen a ngá bwíi mam mése édzwée deñ ásí.
28 Éde niané mam mése mé mana yaá tɔbɔ édzwée deñ ásí;
véa,
Mwán émyen ñí aa ye fe tɔbɔ ásí édzwée éñí a ngá tɔɔ́ ñí mam mése édzwée deñ ásí;
á mfá ye ná ébe dzam ése,
Nzamá éñe aa ye bɔ ébe mam mése.
29 Ngé é bɔ kaa ábɔ néa,
ébá bá duuban ákála bewú bá bá ye bɔ á yá?
Ngé miwúán myăá ye wómo amvála enziŋ,
éde akála dzé bá duuban ya émyɔ?
30 Éde,
amú dzé ki bía bía niŋ áŋgónó eniŋ tám áse?
31 Á bɔbédzaŋ,
ma wú kada mos,
akála mesán me tɔɔ́ ya mína ébe Kristo Yesus Ntí wea.
32 Ngé amvála ané mot binam,
me ngá yítan bibibiñ Éfeso,
nzá abúánn é ne ma été?
Ngé miwúán myăá wómo,
bí dzáán,
bí ñáán fe,
amú ná ookírí bía ye wú.
33 Kaa dukgán mína bébyen:
Bembéa mengɔmm má ywíñ bembamba mefúlú ntuk.
34 Búlugán ébe é kén denan,
dzɔgán mbɔann nsémm;
amú ná bot benziŋ bĕé belé nyemann Nzamá.
Ma dzó dɔ á mfá osoán wenan.
Miwúán myá ye wómo á yá?
35 Ve,
mot enziŋ aa ye síli ná:
“Miwúán myá ye wómo nzá ámvála?
Nzá amvála ñúu ki myá ye sɔ́ ya dɔ?”
36 Á akút mot,
é dzóm wa beñ,
dăá tɔbɔ ya eniŋ ngé kaa ná é tára wú.
37 É dzóm dá wa beñ,
wăá beñ ki dɔ ya é ñúu aa ye byála ya dɔ;
fáve ná nsɔ́ kaa bikop;
a ne bɔ nsɔ́ trigo ngé ki nsɔ́ enziŋ ofé;
38 Ve Nzamá ñí aa vé wɔ́ ñúu amvála ané émyen a ngá kómo,
éde kada nsɔ́ ámvála ñúu deñ.
39 Meñúu mése mé sés amvála avɔ́ɔ́,
fáve ná ñúu fɔ́ɔ́ édɔ é ne éñí bot,
éñí fɔ́ɔ́ édɔ da é ne éñí betsít;
éñí fɔ́ɔ́ da éñí anwann;
éñí fɔ́ɔ́ da éñí kwaás.
40 Éde meñúu méye á dzóp mé né,
ya meñúu méye á sí;
ngúrá dúmá édɔ é ne édí ye á dzóp,
édí dá é ne édí ye á sí,
dá afé.
41 Ngúrá dúmá édɔ é ne édí nlódzóp,
é dúmá ngomdan dá afé,
é dúmá avɔ́ɔ́ dá édí atéteñ;
amú ná otéteñ wá selan ya éwí ovɔ́ɔ́ á mfá dúmá.
42 Amvála te fe nwómán miwúán wá ó ne.
Bá beñ é ñúu dá bweñ,
bé wómo ya éñí é ne kaa ábweñ.
43 Bá beñ á mvyan,
bé wómo á dúmá été;
bá beñ áteák été,
bé wómo á nguu;
44 Bá beñ ya é ñúu mison,
bé wómo ya ñúu nsísim.
Ngé ñúu mison e ne,
ñúu nsísim da e ne fe.
45 Amvála te fe é ne ntsilann ná:
“Adán,
é mot ósúá aá tɔbɔ mvelann mot ye émo”;
Asúgánn Adán ñí á nsísim wá vé eniŋ.
46 Ve se nsísim éwɔ ó ne ósúá,
fáve ná ñúu míson;
é belan véa éñí ye á nsísim.
47 É mot ósúá a ne éñí ye ósí metsɔɔ́,
é mot beáñ ñí a ne éñí ye á dzóp.
48 Amvála ané mot ye ósí metsɔɔ́ a ne,
amvála te fe bot béye ósí metsɔɔ́ bé né;
amvála ané mot ye á dzóp a ne,
amvála te fe bot béye á dzóp bá bé né.
49 Éde,
amvála ané bía bí baga éfonann mot ye ósí metsɔɔ́,
amvála te fe bía ye baga éfonann mot ye á dzóp.
50 Ve,
á bɔbédzaŋ,
ma dzó mína é dzam dí ná,
ñúu mison ya mekií bí sés ñɔŋ tsígá Édzwée ngɔ́mán Nzamá,
ngé ki ná édí dá bweñ dá dé sés ki ñɔŋ tsígá ébe édí é ne kaa ábweñ.
51 Dággán ná,
ma kɔ́bɔ é dzam dá nzaman kén mot,
ná:
se bía bésesé bía ye tɔbɔ óyó [nwúán],
ve déá bía bésesé bía ye tɔbɔ ntsénán,
52 mbíí ya mbíí,
ané nkáabe dzís ovɔ́ɔ́,
ébe é tɔ́ŋ dá súgan;
amú ná tɔ́ŋ da ye kɔ́bɔ,
véa miwúán myá ye wómo ébe ñúu é ne kaa ábweñ,
éde bía bía ye tɔbɔ ntsénán.
53 Amú dá yian ná é ñúu dá bweñ ñí,
eé bwát éñí é ne kaa ábweñ;
é ñúu ye áwú ñí,
da eé bwát fe éñí é ne kaa áwú.
54 Ve niané é ñúu dá bweñ ñí dá ye bwát éñí é ne kaa ábweñ;
ñúu ye áwú ñí,
da eé bwát fe éñí é ne kaa áwú,
véa éñe éfíá é ne ntsilann dá ye dzálában,
ná:
“Nwúnán ó min yaá awú.
55 Á Awú,
nwúnán we ó ne ó vé?
Á sɔŋ,
mítéñ mywe mí ne ó vé?”
56 Mítéñ awú mí ne nsémm,
é nguu nsémm da e ne atsiŋŋ;
57 Ve akíba ya Nzamá éñe aa vé bía nwúnán ébe Ntí wea Yesukristo.
58 Édɔ é ne ná,
á mindzindziŋŋ mí bɔbédzaŋ,
yémŋán nguu,
kaa áfógan,
míní ke mína vém ébe éséññ Ntí eyɔŋ ése,
míní yem fe ná éséññ denan ébe Ntí é sés á nzeze.