Nkɔ́bán Mikɔ́bɔ
14
Dzéŋŋán ná míní belé edziŋŋ,
ñamlenán fe mam méye á Nsísim,
dá daŋ ya mvéáñ ná,
míní kúlu medzó.
2 Amú ná éñí aa kɔ́bɔ éyágán nkɔ́bɔ,
ăá kɔ́bɔ ya bot,
fáve ya Nzamá;
mot enziŋ ñí ăá wók ki ñí,
fáve ná ñí aa kɔ́bɔ é mam má nzaman kén mot á nsísim weñ été;
3 Ve éñí ñí aa kúlu medzó,
aa kɔ́bɔ ya bot á mfá ávé bot nguu,
melépgá ya áfoŋ milém.
4 Éñí aa kɔ́bɔ éyágán nkɔ́bɔ,
aa vé émyen nguu;
ve éñí ñí aa kúlu medzó,
aa vé ekóánn bebwíni nguu.
5 Me ne kómo ná mína bésesé míní kɔ́bɔ biyágán mikɔ́bɔ;
ve dá daŋ ya mvéáñ ná,
míní kúlu medzó;
éde éñí aa kúlu medzó aa daŋ é mot aa kɔ́bɔ biyágán mikɔ́bɔ,
fáve ngé aa kelan myɔ,
ná ekóánn bebwíni é ñɔŋ nguu.
6 Á bɔbédzaŋ,
édɔ é ne ná,
ngé ma nzu ébe mína meé kɔ́bɔ biyágán mikɔ́bɔ,
nzá abúánn dá ye mína bɔ été?
Fáve ngé ma kɔ́bɔ ya mína ya nléránn mam,
ya nyemann,
ya nkúlánn medzó,
ngé ki ya ayágalé.
7 Atwaa é byém bí andziík bí ne kaa ábelé eniŋ,
amvála ané mwann tɔ́ŋ ngé ki mvét,
ngé byăá bɔ bíduŋŋ byá selan,
nzá amvála bá ye yem ya dɔ édí bá lɔ́ŋ mwann tɔ́ŋ,
ngé ki édí mvét?
8 Éde ngé tɔ́ŋ da vé éduŋŋ dá nzaman,
nzá aa ye koman á mfá alúmán?
9 Amvála te édɔ fe mína ya nkɔ́bɔ,
ngé ya anu mína kɔ́bɔ bífíá bé ne kaa áyem,
nzá amvála bá ye yem édí mína dzó?
Amú dá ye fonan amvála ané ngé mína kɔ́bɔ ya nyem dzóp.
10 É ne bɔban tám enziŋ ná mikɔ́bɔ mí ne mendzaŋ abwiññ é sí ñí,
ovɔ́ɔ́ enziŋ ye été wá wăá dzéŋ ki ayílíga;
11 Ve ngé măá yem ayílíga ye éduŋŋ te,
ma ye tɔbɔ ané nyín ébe é mot aa kɔ́bɔ,
ñí aa ye fe tɔbɔ ané nnéŋ á mfá wɔm.
12 Amvála te édɔ fe mína míní tɔɔ́ beñamle mam méye á Nsísim,
bíragán ádzéŋ ná míní belé mɔ ededea abwiññ á mfá ávé ekóánn bebwíni nguu.
13 Ya amú dzam te,
éñí aa kɔ́bɔ éyágán nkɔ́bɔ,
á yaglánán á mfá ye ná á kelan wɔ́.
14 Amú ná ngé ma yaglan éyágán nkɔ́bɔ,
nsísim wɔm wá yaglan,
ve ósímánn wɔm wá wá lígi kaa mfí.
15 Éde á yá?
Ma ye yaglan ya nsísim,
ma ye fe yaglan ya osímánn;
ma ye yee byéa ya nsísim,
ma ye fe byɔ áyee ya osímánn.
16 Dá é tɔɔ́ ná,
ngé wa vé abwará ya nsísim,
é mot ñí a ne kaa ayágalé,
nzá amvála mot te a ne dzó ná “Amén” ébe mvéán akíba we?
Akála ná ăá wók édí wa kɔ́bɔ.
17 Amú ná,
wa túga fá vé akíba mvéáñ,
ve é mot mbɔ́ɔ́ ñí ăá ñɔŋ nguu.
18 Ma vé Nzamá akíba ná,
ma kɔ́bɔ biyágán mikɔ́bɔ álot mína bésesé;
19 ve ékóánn bebwíni été,
ma bam yébe ná me kɔ́bɔ bifíá bí tán ya ósímánn wɔm,
á mfá áyágale fe é bot bevɔ́ɔ́,
se ná awóm binzuk bifíá á biyágán mikɔ́bɔ.
20 Á bɔbédzaŋ,
míní táa bɔ bɔ́ŋŋ ébe ámvála mína tém,
fáve ná bɔgán bɔ́ŋŋ á mfá mbɔann abé,
ve ébe ámvála mína tém,
bɔgán beñá bot.
21 Á métsiŋŋ été,
é ne ntsilann ná:
“Ma ye kɔ́bɔ ya áyɔŋ dí ébe bot béye mikɔ́bɔ mifé
ya ébe menu mefé,
éde atwaa néa băá ye ma béá,
Ntí éñe aa dzó dɔ.”
22 Édɔ é ne ná,
biyágán mikɔ́bɔ bí ne ndem,
se ákála bebwíni,
fáve ákála é bot bé ne kaa bebwíni;
ve nkúlánn medzó wá ó ne ákála bebwíni,
se ákála é bot bé ne kaa bebwíni.
23 Édɔ ná,
ngé ékóánn bebwíni ése é kóán,
bot bése bá bé ŋga kɔ́bɔ biyágán mikɔ́bɔ,
véa bot benziŋ bá bé ñíi,
ébɔ́ kaa ayágalé ngé ki ébá bé sés bebwíni;
nde băá ye dzó ná mína kwan mílém?
24 Ve ngé bot bése bá kúlu medzó,
véa mot enziŋ ye á sés mbwíni a ñíi ngé ki éñí a ne kaa ayágalé;
éde evuzá deñ dá ye ñí bwaale ósú bésesé,
aa ñɔŋ fe nkíkgán misaŋ ósú bésesé.
25 Éde é mam mé ne ñí nswalann á nlém weñ été,
má ye kwíñ éndendaŋ,
éde néa éñe eé ku asú ó sí,
á ŋga kaŋ Nzamá,
eé mem ná,
é ne été ná Nzamá a ne énzénzaŋ denan.
Ábɔ mam mése tételé á Ndá Nzamá
26 Éde á bɔbédzaŋ,
nzá dzam dá yian bɔban?
É tám mína kóán,
kada mot á nzaá ya dzeá,
ngé ki ya ayágalé,
ngé ki ya édí é léreban yaá ébe éñe,
ngé ki ya éyágán nkɔ́bɔ,
ngé ki ya ákelan nkɔ́bɔ.
Ásesé á bɔɔ́ge á mfá ávéán nguu.
27 Ngé mot enziŋ aa kɔ́bɔ éyágán nkɔ́bɔ,
bé kɔ́bɔgé bé beáñ,
ngé abwiññ,
bé ne bɔ bé léa;
ve kada mot ya éyɔŋ deñ;
mot enziŋ ñí á kelagán fe.
28 Ve ngé é mot aa kelan a sés,
bé tɔbɔgé evóó ékóánn bebwíni été,
bé kɔ́bɔgé fáve á mfá bébyen ya á mfá Nzamá.
29 Éde bekúlu medzó,
bá bé kɔ́bɔgé fe bé beáñ ngé ki bé léa;
é bot bevɔ́ɔ́ bá béé kík nsaŋ.
30 Ve ngé é mot enziŋ ye ébá bé tɔɔ́ ósí,
a ñɔŋ nléránn dzam,
éñí ósúá á tɔbɔgé evóó.
31 Amú ná mína bésesé míní ne kúlu medzó,
kada mot mbɔ́ɔ́ ya mbɔ́ɔ́,
ná bot bése bé ne ñɔŋ ayágalé,
bésesé bé ne fe ñɔŋ melépgá.
32 Édɔ ná,
mísísim bekúlu medzó myá bɔ bekúlu medzó mewók;
33 amú ná Nzamá a sés éñí ye á nzamzámánn,
fáve éñí ye á mvwaá.
Amvála ané énzénzaŋ bíkóánn bebwíni bíse mitɔ́pbán mi bot,
34 biningá bé sísge bivóó bíkóánn bebwíni été;
amú ná é sés bɔ́ ntélán ná bé kɔ́bɔ,
fáve ná bé tɔbɔgé édzwée ásí,
amvála ané nkɔɔ́ métsiŋŋ wá wá dzó fe dɔ.
35 Éde ngé bá kómo yága dzam,
bé síligé beyóm beba bébyen á ndá;
amú é ne osoán ná miningá á kɔ́bɔ ékóánn bebwíni été.
36 Ye é ne efíá Nzamá dá sɔ́ ébe mína?
Ngé ki ná,
ye éñe é sian yaá ébe mína etámm?
37 Ngé mot enziŋ aa tém ná a ne nkúlu medzó,
ngé ki ná a ne ya Nsísim,
á túga yem ná é dzam ma tsili mína dí é ne é mvéná Ntí;
38 ve ngé mot enziŋ ăá kómo dɔ yem,
bá băá ye ki ñí áyem.