2 Ngé me belé nkúlánn medzó,

meé yem fe é mam mése má nzaman kén mot,

ya nyemann óse,

ngé me belé ki mbwínánn óse ná ma vea mikoó,

ve ma kaa ábelé edziŋŋ,

me sés dzóm enziŋ.

3 Ngé ma kap é byém byam bíse,

ngé ma kee ki é ñúu dam ná eé dzík,

ve ma kaa ábelé edziŋŋ,

mĕé belé abúánn enziŋ.

4 Edziŋŋ é ne edzíp,

edziŋŋ e ne añep,

edziŋŋ é sés miñamle;

é sés aléránn,

é sés ki engúŋ;

5 dăá bɔ é mam má vé osoán,

dăá dzéŋ áadeñ émyen,

dăá ñan,

dăá láŋ ki abé,

6 dăá sán ékúkwát été,

ve dá sán á bébélá été;

7 dá dzíbi ásesé,

dá bwíni ásesé,

dá tɔbɔ ya mebúnn ásesé,

dá nzomo ásesé.

8 Edziŋŋ dăá mana tám enziŋ;

ve ngé nkúlánn medzó ó ne,

wá ye dzibi;

ngé mikɔ́bɔ myá mí né,

myá myá ye fe mana;

ngé nyemann mam wá ó ne ki,

wá wá ye fe dzibi.

9 Amú ná bía yem oyomm abímm,

bía kúlu fe medzó oyomm abímm;

10 ve é tám édí é ne ásesé dá ye sɔ́,

édí é ne oyomm abímm,

dá dá ye dzibi.

11 É tám me mbé mɔ́ŋŋ,

me ngá bɔ meé kɔ́bɔ ané mɔ́ŋŋ,

me ngá bɔ meé tém ané mɔ́ŋŋ,

me ngá bɔ fe meé fas mam ané mɔ́ŋŋ;

ve é tám me ntɔɔ́ ñá mot,

mam mé mɔ́ŋŋ mé dzibi yaá.

12 Amú ná,

bí ngén bía yén nkút ya nkút ané bá dága á ngɔɔ́p été,

ve tám te,

bía ye yén asú ya asú.

Me ngén fe ma yem oyomm abímm,

ve tám te,

ma ma ye yem amvála ané bé yem yaá ma.

13 Áwola dí,

mbwínánn,

ya oyan,

ya edziŋŋ,

byá laŋan bí léa bíte;

ve édí dá daŋ,

é ne edziŋŋ.