Mvɔmm ye á Nsísim
12
Á bɔbédzaŋ,
măá kómo ná míní tɔbɔ kaa áyem á mfá é mam má sɔ́ ébe Nsísim.
2 Mína yem ná é tám míní mbé bot béye meyɔŋ mefé,
memvála mése bé ngá bɔ béé ke bá dulu mína ébe mivúmvúk biyemá.
3 Ya dzam te édɔ,
ma bɔ ná míní yem ná mot enziŋ ye aa kɔ́bɔ ákála Nsísim Nzamá ăá dzó ná:
“Yesus a ne ya biboŋ,”
mot enziŋ a sés ki dzó ná:
“Yesus éñe a ne Ntí,”
ngé é sés ákála Mfúfúp Nsísim.
4 Éde,
mvɔmm é ne mendzaŋ ya mendzaŋ,
ve Nsísim émyen éñe a ne mbɔ́ɔ́;
5 mesúk mé éséññ Nzamá má mé ne fe mendzaŋ ya mendzaŋ,
ve Ntí émyen éñe a ne mbɔ́ɔ́;
6 ámvála mibɔann bíséññ myá mí ne fe mendzaŋ ya mendzaŋ,
ve Nzamá éñí aa bɔ mam mése ébe bot bése Émyen a ne mbɔ́ɔ́.
7 Ve,
nléránn ye á Nsísim bá vé wɔ́ ébe kada mot á mfá é dzam é ne ya abúánn.
8 Éde fá ngúrá mot ákála Nsísim,
bá vé ñí efíá kén,
éñí mbɔ́ɔ́ ñí ya efíá nyemann akála Nsísim mbɔ́ɔ́ ya mbɔ́ɔ́.
9 Éñí mbɔ́ɔ́,
ñí ya mbwínánn akála Nsísim mbɔ́ɔ́ ya mbɔ́ɔ́;
éñí mbɔ́ɔ́,
ñí ya mvɔmm ye áséñ bot ákála Nsísim mbɔ́ɔ́ ya mbɔ́ɔ́;
10 éñí mbɔ́ɔ́,
ñí ya ábɔ biyágán bí mam;
éñí mbɔ́ɔ́,
ñí ya nkúlánn medzó;
éñí mbɔ́ɔ́,
ñí ya áyem ábíli misísim;
éñí mbɔ́ɔ́,
ñí ya ákɔ́bɔ biyágán míkɔ́bɔ;
éñí mbɔ́ɔ́,
ñí ya ákelan biyágán míkɔ́bɔ.
11 Ve mam méte mése Nsísim Émyen aa bɔ mɔ a ne mbɔ́ɔ́ ya mbɔ́ɔ́,
eé kap ébe kada mot amvála ané Émyen aa kómo.
Ñúu fɔ́ɔ́
12 Amú ná amvála ané ñúu e ne fɔ́ɔ́,
da e belé abwiññ mesúk,
ve mesúk mése méye ó ñúu,
mé fáŋ bɔ abwiññ,
mé ne ñúu fɔ́ɔ́,
amvála te fe Kristo ñí a ne;
13 amú ná ébe Nsísim mbɔ́ɔ́,
bía bésesé bía tɔbɔ nduubán ébe ñúu fɔ́ɔ́,
ané bejudio ngé ki begriego;
ané aloá ngé ki ébá bé ne filí,
éde bésesé bá vé bɔ́ ná bé ñú ébe Nsísim mbɔ́ɔ́.
14 Amú ná ñúu e sés asúk avɔ́ɔ́,
fáve ná abwiññ mesúk.
15 Éde ngé abɔ é dzó ná:
“Akála ná me sés wéá,
éde me sés fe ngap ye ó ñúu”,
ye dzam te édɔ ăá ye bɔ kaa ábɔ ya dɔ ngap ye ó ñúu?
16 Ngé alɔ́ dá é dzó ki ná:
“Akála ná me sés dzís,
éde me sés fe ngap ye ó ñúu”,
ye dzam te édɔ ăá ye bɔ kaa ábɔ ya dɔ ngap ye ó ñúu?
17 Ngé ñúu ngúrá eé bɔ dzís;
éde áwók mam,
é ngá ye bɔ ó vé?
Ngé ñúu ngúrá eé bɔ alɔ́;
éde áwók binum,
dá é ngá ye bɔ ó vé?
18 Ve éndagá,
Nzamá ñí a téle yaá mesúk mé ñúu,
kada asúk,
amvála ané a ngá kómo dɔ.
19 Ve,
ngé ásesé a bɔ fáve asúk avɔ́ɔ́,
ñúu e ngá ye bɔ ó vé?
20 Édɔ é ne ná,
abwiññ mesúk mé ñúu,
ve ñúu e ne fɔ́ɔ́.
21 Éde dzís é sés dzó wéá ná:
“Ó sés ma ya eban”;
nló wá ó sés ki dzó mebɔ ná:
“Míní sés ma ya eban.”
22 Ve ádaŋdaŋ ná,
mésúk mé ñúu má lére ané émɔ má daŋ mitéteák,
émɔ mé ne émá má daŋ ya eban;
23 mésúk mé ñúu bía tém ná bía daŋ kám ya mɔ,
émɔ bía bía daŋ bwára ya ngaŋŋ;
akekwíñ ná émá bía daŋ swala,
émɔ bá bwára ededea mvéáñ.
24 Ve,
mésúk mé ñúu má yéne má măá yi dɔ.
Ve fáve ná éñe Nzamá aá téle ñúu néa,
eé bíra vé abwiññ ngaŋŋ ébe mésúk mé ñúu mĕé mbé mé belé dɔ,
25 ná nkánán mengamm ó nzá bɔ ó ñúu,
fáve ná mesúk mé ñúu mébyen mé kárán mevɔ́ɔ́ ya émá mevɔ́ɔ́.
26 Éde,
ngé asúk ñúu enziŋ dá dzuk,
mésúk mé ñúu mése má má dzuk fe ya édí te;
ngé asúk ñúu enziŋ dá ñɔŋ ki ngaŋŋ,
mésúk mé ñúu mése má má sán fe ya édí te.
27 Éde mína,
míní ne é ñúu Kristo,
kada mot asúk ñúu deñ.
28 Éde ékóánn bebwíni été,
Nzamá a téle yaá,
ósúsúá baapostol;
é belan,
bekúlu medzó;
é belan léa,
beyágale;
véa,
ébá bá bɔ é mam mé ne nguu;
véa,
mvɔmm ye áséñ bot;
émí míye ávwála bot,
émí míye ábɔ ntébosú,
ya fe mendzaŋ míkɔ́bɔ.
29 Ye bésesé bé ne baapostol?
Ye bésesé bé ne bekúlu medzó?
Ye bésesé bé ne beyágale?
Ye bésesé bá bɔ é mam mé ne nguu?
30 Ye bésesé bé belé mvɔmm ye áséñ bot?
Ye bésesé bá kɔ́bɔ mendzaŋ míkɔ́bɔ?
Ye bésesé bá kelan?
Edziŋŋ
31 Ábíran áñamle é mvɔmm dá daŋ ya mvéáñ.
Ve éndagá,
ma ma lére mína é nzenn dá daŋ ya mvéáñ.