Békík misaŋ bé sés bebwíni
6
É tám mot enziŋ ye ébe mína a belé adzó ya éñí mbɔ́ɔ́,
ye ná aa nzomo ná aa ke ya dɔ ébe bikúkwát bí bot bí né,
alígi áke ébe mítɔ́pbán mí bot?
2 Ye mínăá yem ná mítɔ́pbán mí bot émyɔ myá ye kík eniŋ ngúrá misaŋ?
Éde,
ngé mína mína ye kík eniŋ ngúrá misaŋ,
ye ná míní sés nkɔkgán ye ákík ámemámm misaŋ?
3 Ye mínăá yem ná bía ye kík baángel misaŋ?
Ndagan ná mam méye éniŋ dzí?
4 Édɔ ná,
ngé míní belé bíkóánn bá kík mam méye éniŋ dzí misaŋ,
amú dzé mína téle bekík misaŋ é bot bé sés dzóm ékóánn bebwíni?
5 Ma dzó dɔ á mfá ósoán wenan.
Ye ná mot mbɔ́ɔ́ enziŋ ye a ne ya kén a sés énzénzaŋ denan été,
ná a ne kík nsaŋ énzénzaŋ bɔbéñaŋ?
6 Éde,
fáve ná mwanñaŋ bá mwanñaŋ bá kíkgán misaŋ,
édí te,
dá ósú ébe ébá bé ne kaa ábwíni.
7 Édɔ ná,
dá é ntɔɔ́ mína evuzá énzénzaŋ denan ná,
míní mbelé nkíkgán misaŋ énzénzaŋ denan été.
Amú dzé é sés bam bɔ mvéáñ ná bé dzugu mína?
Nde é sés bam bɔ mvéáñ ná bé duk mína?
8 Ve déá,
mína bábá ya áduk,
ádaŋdaŋ ná míní bɔ dɔ bɔbéñɔŋ.
9 Nde mínăá yem ki ná bikúkwát bí bot bĭá ye ñɔŋ tsígá édzwée ngɔ́mán Nzamá?
Kaa dukgán mína bébyen,
amú ná,
ané bebɔ nsémm eveák,
ya bekaŋ biyemá,
ya bebɔ medzíán,
ya béfám bé biningá,
ya béfám bá yénán bábe ébá bevɔ́ɔ́ amvála ané biningá,
10 ya midzídzíp,
ya ébá bé ne oyéá byém,
ya béfían meywa,
ya bekɔ́bɔ bot abé,
ya mimvomvóó,
băá ye ñɔŋ tsígá édzwée ngɔ́mán Nzamá.
11 Édɔ ná néa éñe bot benziŋ béye ébe mína bé mbé;
ve bé sop yaá mína,
bé tɔɔ́ yaá mína eki,
bé tɔɔ́ yaá mína benzósoó ébe éyola Ntí Yesukristo ya ébe Nsísim é Nzamá wea.
É templo Mfúfúp Nsísim
12 Atsiŋŋ dá lére ma ná me ne bɔ mam mése,
ve mésesé mé sés ya abúánn;
atsiŋŋ dá lére ma ná me ne bɔ mam mése,
ve măá ye lík ná avɔ́ɔ́ enziŋ é dzwée ma.
13 Bidzí bí ne ákála osaŋŋ,
osaŋŋ wá ákála bidzí;
ve Nzamá ñí aa ye fá tsam bí beáñ bíte.
Édɔ ná,
ñúu da e sés ákála ábɔ nsémm eveák,
fáve ákála Ntí,
Ntí ñí ákála ñúu.
14 Éde Nzamá,
éñí a ngá wómo Ntí,
aa ye fe bía wómo ákála é nguu deñ.
15 Ye mínăá yem ná méñúu menan mé ne mésúk mé ñúu Kristo?
Ye ma ye ñɔŋ mésúk mé ñúu Kristo,
véa me kéñ mɔ bɔ mésúk mé ñúu miningá endendea?
É sés bɔban amvála enziŋ!
16 Ngé ki ná,
ye ná mínăá yem ná éñí aa fulan bá endendea miningá,
bá ñí bé ne ñúu fɔ́ɔ́?
Amú é ne ntsilann ná:
“Bé beáñ bá ye bɔ ñúu fɔ́ɔ́.”
17 Ve éñí ñí aa fulan bá Ntí,
bá ñí bé ne nsísim mbɔ́ɔ́.
18 Túpgán nsémm eveák!
Nsémm ósesé mot a ne bɔ,
ó ne ñúu mot átán;
ve éñí aa bɔ nsémm eveák,
aa bɔ nsémm ébe é ñúu deñ émyen.
19 Nde mínăá yem ki ná é ñúu denan e ne é templo Mfúfúp Nsísim e ne ébe mína,
éñí míní belé ébe Nzamá,
mína míní sés ki fe mína bébyen?
20 Amú ná bé kus yaá mína ya táŋ;
éde ná váán Nzamá dúmá ébe é ñúu denan,
ya fe ébe mísísim myenan,
[émí mí ne émí Nzamá].