Melépgá á mfá alúk
7
Ébe é mam míní ngá tsili ma:
é ne mvéáñ ná fám eé bɔ kaa ánama miningá.
2 Ve,
ákála nsémm eveák,
kada fám eé belégé é ngéá weñ émyen,
kada miningá ñí á belégé fe nnóm weñ émyen.
3 Fám eé dzálágé é mvólá a belé ya é ngéá weñ,
ntéññ mbɔ́ɔ́ fe miningá ñí á dzálágé ya nnóm.
4 Miningá ĕé belé edzwée ébe é ñúu deñ émyen,
fáve ná nnóm;
éde nnóm ñí ĕé belé ki edzwée ébe é ñúu deñ émyen;
fáve ná ngéá.
5 Kaa ñímán mína bébyen mbɔ́ɔ́ ébe éñí mbɔ́ɔ́,
fáve ngé míní tára dɔ kwíñ kíŋŋ fɔ́ɔ́,
á mfá ye ávé mína bébyen ébe tám meyaglán,
véa míní bera fulan,
á mfá ye ná Sátan a nza mína bóble ákála é kaa ndzwéán nlém wenan.
6 Ve ma dzó dɔ amvála ané melépgá,
se ané édí bá mánan.
7 Amú me ne kómo ná bot bése bé tɔbɔ amvála ané ma;
ve kada mot ñí a ñɔŋ yaá é mvɔmm deñ émyen ébe Nzamá,
ngúrá mot ámvála dí,
éñí mbɔ́ɔ́ ñí ámvála avɔ́ɔ́.
8 Éde,
má dzó mikyweñ befám ya mikús mí biningá ná,
é ne mvéáñ á mfá weba ná ngé bé ne tɔbɔ ané má.
9 Ve ngé bé sés dzwée bébyen,
bé lúkge;
amú dá daŋ ya mvéáñ ná mot á lúk,
ya ná á dzík.
10 Éde,
ma mánan ébá bé lúkgan yaá,
se ma,
fáve ná Ntí;
ná miningá a táa kánan bá nnóm;
11 ve ngé a kánan bá ñí,
á tɔbɔgé kaa áke álúk,
ngé ki ná á komŋe ókaŋŋ bíkwan bá nnóm,
fám da e táa ki lama ngéá.
12 Ve ma dzó ébá bevɔ́ɔ́ ná,
se Ntí:
Ngé mwadzaŋ enziŋ a belé ngéá ná ñí a sés mbwíni,
ngéá te ñí eé kómo tɔbɔ bá ñí,
mot te a táa ñí lama.
13 Éde,
ngé miningá enziŋ ñí a belé nnóm ná ñí a sés mbwíni,
nnóm te ñí eé kómo tɔbɔ bá ñí,
miningá te a táa lama nnóm.
14 Amú ná,
nnóm a ne kaa ábwíni a tɔbɔ yaá eki ébe ngéá,
ngéá ñí a ne kaa ki ábwíni ñí a tɔbɔ yaá eki ébe mwadzaŋ;
ngé kaa néa,
é bwán benan bá ye bɔ nzeze bot;
ve áwola dí bá bé ntɔɔ́ ntélán eki.
15 Ve,
ngé é mot a sés mbwíni aa kánan,
á kánaŋán;
ébe memvála mé mam méte,
mwadzaŋ ngé ki kéá dzea aa lígi filí,
ve Nzamá a lwée yaá mína ná míní niŋ á mvwaá été.
16 Á miningá,
wa yem fá á yá nde tám enziŋ wa ye koro ñu nnóm?
Á fám,
wa wa yem ki á yá nde tám enziŋ wa ye koro ñu ngéá?
17 Ve amvála te fe,
ma mánan bíkóánn bebwíni bíse,
ná kada mot á wulugé amvála ané Ntí a téle yaá ñí,
ya amvála ané Nzamá a lwée yaá fe ñí.
18 Ye bá lwée mot enziŋ a tɔɔ́ nkíkgán akeé?
Á tɔbɔgé nkíkgán akeé.
Ye bá lwée mot enziŋ a koan ná a sés nkíkgán akeé?
A táa kíkban akeé.
19 Nkíkgán akeé ó sés dzóm enziŋ,
kaa nkíkgán akeé ñí a sés ki dzóm enziŋ,
fáve ná á baale memvéná mé Nzamá.
20 Kada mot á tɔbɔgé amvála á mbé é tám bé ngá lwée ñí.
21 Ye bá lwée wa o tɔɔ́ oloá?
O táa kele nlém ó yóp;
afáŋbɔ ná ngé o ne tɔbɔ filí,
belagán ya dɔ mvéáñ.
22 Amú ná é mot Ntí aá lwée a tɔɔ́ oloá,
a ne filí mot ébe Ntí;
amvála te fe é mot bá lwée a tɔɔ́ filí mot,
a ne óloá Kristo.
23 Bá kus mína ya táŋ;
míní táa bɔ áloá bot.
24 Édɔ ná,
á bɔbédzaŋ,
kada mot á tɔbɔgé ébe Nzamá ámvála á mbé é tám bé ngá lwée ñí.
Pablo aa vé melépgá á mfá métám má súgan
25 Á mfá mikyweñ mí biningá mĕé belé é mvéná Ntí enziŋ,
ve ma lére ané me téa,
amvála ané éñí a koan yaá ya nyénánn engóngɔ́ɔ́ ébe Ntí á mfá ábɔ é mot bá tɔbɔ ya ñí mebúnn.
26 Éde,
ma tém ná é ne mvéáñ ná mot á tɔbɔ ámvála a ne,
dzam te dá dá yéne fe mvéáñ ébe midzuúk míye é tám ñí.
27 Ngé o tsií ya ngéá,
o táa dzéŋ ná o nkánán ya ñí.
Ngé weé belé ngéá,
o táa dzéŋ miningá.
28 Ve,
ngé wa lúk ki,
weé ndzí bɔ nsémm;
ngé nkyweñ miningá wá ke álúk,
wá weé ndzí ki bɔ nsémm;
ve bá ye yén midzuúk éniŋ dzí,
ma ma kómo mína myɔ ávée.
29 Ve,
á bɔbédzaŋ,
dá yíli ná tám eé ntɔɔ́ etun;
édɔ é ne ná,
atéé ye áwola dí ye áke ósú,
ébá bé belé beyéá,
bé tɔbɔgé amvála ané ngé bĕé belé bɔ́;
30 ébá bá ke bá yi,
amvála ané ngé băá yi ki;
ébá bá ke bá sán,
amvála ané ngé băá sán ki;
ébá bá ke bá kus,
amvála ané ngé bĕé belé ki dzóm enziŋ;
31 ébá bá bá ke bá ñɔŋ abúánn éniŋ dzí,
bá amvála ané ngé băá túga ki ñɔŋ abúánn,
amú ná efonann ye éniŋ dzí dá ke dá mana.
32 Ve,
ma ma kómo ná míní tɔbɔ filí ébe é mam bot bá dzéŋ.
Nkyweñ fám wá kee émyen ébe é mam Ntí,
ámvála a ne vé nlém Ntí mesán;
33 ve,
éñí ñí a belé ngéá,
aa kee émyen ébe é mam méye éniŋ dzí,
ámvála a ne vé nlém ngéá mesán,
34 amvála te édɔ a ne nkabann ónzáŋŋ.
Ntéññ mbɔ́ɔ́ fe,
é miningá ñí a sés álúk ngé ki éñí a ne endúnn ngwan,
aa kee émyen ébe é mam Ntí,
á mfá ye ná á tɔbɔ eki ané ó ñúu míson ané á nsísim;
ve,
é miningá a ne álúk ñí aa kee émyen ébe mam méye éniŋ dzí,
ámvála a ne vé nlém nnóm mesán.
35 Éde,
ma dzó dzam te á mfá ábúánn denan,
se á mfá ye ná ma vé mína miyeñ,
fáve á mfá édí é ne nzósoó ya á mfá áyémele mbɔann mbán éséññ Ntí ya nlém ósesé.
36 Ve,
ngé mot enziŋ aa tém ná ăá bɔ édí é ne tételé á mfá ngwan dzeñ,
ngé dá é bem yaá áku evom,
é kéŋ álúk ngé édɔ dá yian ná bé bɔ,
á bɔɔ́ge édí aa kómo;
ăá bɔ nsémm.
37 Ve éñí a yém nguu á nlém weñ été,
kaa ki ané bá tsíni ñí dzam enziŋ;
eé edzwée fe nlém weñ,
ñí a kík yaá fe á nlém weñ été ná,
aa baale ngwan dzeñ endúnn,
aa bɔ mvéáñ.
38 Édɔ é ne ná,
é mot aa kee éndúnn ngwan dzeñ álúk,
a bɔ mvéáñ;
ve,
éñí ñí a bɔ kaa ñí ákee álúk,
aa bɔ édí dá daŋ ya mvéáñ.