Ábee éfonann Kristo
15
Édɔ ná,
bía é bot bí yém,
bía yian nzomo áteák ébá bé ne mitéteák,
se ná bí bɔ é mam bía bébyen bía yén mvéáñ.
2 Kada mot á dzéŋŋe ébe éñí mbɔ́ɔ́ édí é ne mvéáñ á mfá ávé bot nguu.
3 Amú ná atwaa Kristo émyen ñí eé ndzí ki dzéŋ édí é ne mvéáñ á mfá weñ,
fáve ané é ne ntsilann ná:
“Méteá é bot bá kpógo wa,
maá ku ma á nló wɔm”.
4 Amú ná édí dá tɔbɔ ntsilann á metám ómvús,
baá tsili dɔ ákála áyágalé dea,
á mfá ye ná édzíp ya mfoŋann nlém bí ne á Mitsili été,
bía bí belé oyan.
5 Éde Nzamá ye édzíp ya mfoŋann nlém á vá mína ná míní belé osímánn ovɔ́ɔ́ énzénzaŋ denan amvála ané éwí Kristo Yesus,
6 á mfá ye ná fufúlu ya kíŋŋ fɔ́ɔ́,
míní vé Nzamá ya Éséá Ntí wea Yesukristo dúmá.
7 Ya amú dzam te,
ñɔŋŋán bevɔ́ɔ́ ya ébá bevɔ́ɔ́,
amvála ané Kristo ñí aá ñɔŋ fe mína á mfá é dúmá Nzamá.
8 Amú ma dzó ná Kristo ñí aá bɔ yaá mvwála bíséññ ye ébá bé ne nkíkgán mekeé ákála é bébélá Nzamá;
á mfá áyémele mengaá bé ngá kyaa betará,
9 ya fe á mfá ye ná meyɔŋ mefé mé vé Nzamá dúmá ya nyénánn engóngɔ́ɔ́ weñ;
amvála ané é ne ntsilann ná:
“Ya dzam te,
ma ye wa mem énzénzaŋ meyɔŋ mefé,
ma ye yee éyola dwe byeá bí olugú”.
10 Aa bera dzó ná:
“Á meyɔŋ mefé sánŋán,
mínabe áyɔŋ deñ”.
11 Aa bera fe dzó ná:
“Lugán Ntí mína meyɔŋ mefé mése;
bot bése lugán ñí”.
12 Esaía ñí aa bera dzó ná:
“É tsín Esaí dá ye féá,
édɔ dá ye tébe ná dá dzwée bot béye meyɔŋ mefé,
bot bése bá ye tɔbɔ ya ñí mebúnn”.
13 Éde Nzamá ye oyan á dzálágé mína ya mesán mése ya mvwaá akála mbwínánn,
á mfá ye ná míní tɔbɔ ya abwiññ oyan akála nguu ye á Mfúfúp Nsísim.
Éséññ apostol Pablo
14 Á bɔbédzaŋ,
á mfá wenan,
mámyen ma yem bébélá ná,
míní ne ndzálánn ya añep ya nyemann ósesé,
míní ne fe véán melépgá bevɔ́ɔ́ ya ébá bevɔ́ɔ́.
15 Ve me tsili yaá mína mam menziŋ ya aywá,
á mfá ye ná néa me vé mína mɔ osímánn,
amú é mvɔmm Nzamá bé vé yaá ma,
16 á mfá ye ábɔ mbɔ biséññ Kristo Yesus ébe meyɔŋ mefé,
meé bɔ eséññ nkatann mbamba fwéñ Nzamá amvála ané fára,
ná meyɔŋ mefé mé bɔ ñí metúnŋa bá yébe,
ná bé tɔbɔ fe eki á Mfúfúp Nsísim.
17 Édɔ ná,
ébe Kristo Yesus éñe mé koan ákéá ma vága ya dɔ ébe éséññ ma bɔ Nzamá.
18 Amú ná măá ye yébe ná ma kɔ́bɔ dzam enziŋ afé,
fáve édí Kristo a bɔ yaá ébe ma,
á mfá mbɔann méwók meyɔŋ mefé,
éfíá ya fe á mbɔann,
19 amú nguu ye á mendem ya biyágán bí mam;
ákála é nguu Nsísim Nzamá;
amvála te,
atéé ye á Yerusalen ya mévóm má boman ñí,
akekwíñ Elíriko me dzálá yaá ñí ya é mbamba fwéñ Kristo.
20 Amvála te édɔ,
me ngá dzéŋ ná me kat mbamba fwéñ é vóm bé ngén kaa áwók éyola Kristo,
á mfá ye ná me nzá lóŋ éyá mbókga áyóp,
21 ve amvála ané é ne ntsilann ná:
“Ébe ébá béé ndzí ñɔŋ é fwéñ deñ,
bá ye ñí yén;
ébá bá béé ndzí wók,
bá ye yem.”
Ngoman ekena
22 Akála dzam te,
abwiññ biyɔŋ me kómo yaá mína nzu yén,
ve bé dzip yaá me dɔ.
23 Éde éndagá,
ma kaa ki fe ya afóo vóm enziŋ ye á mebeŋŋ mé sí má,
ve dá é ntɔɔ́ abwiññ mibú mé belé nkómánn ye ánzu ébe mína,
24 é tám ma ye ke á Pañá,
ma ye mína fép.
Amú ná ma ye mína yén,
meé lot,
á mfá ye ná míní vwála ma tsíni ekena ósú ó véa,
éyɔŋ míní tára yaá ma vé mesán á nlém ébe etɔɔ́ bíabe mína oyomm tám enziŋ.
25 Ve éndagá ma ke á Yerusalen,
á mfá áke ya bébwíni bé ne ó wéñ avwálá.
26 Amú ná Masedonia bá Akaya bá yén mvéáñ ná bé kóán avwálá á mfá mítétéññ mí ne énzénzaŋ bebwíni á Yerusalen.
27 Akála bá yén mvéáñ ná bé bɔ́ dɔ,
afáŋbɔ ná bá bé belé fe bɔ́ mvólá;
amú ná ngé meyɔŋ mefé mé ñɔŋ yaá ngap ébe bíbwárán bíye á nsísim byeba,
bá bá yian fe bɔ́ vé ngap ébe byém bíye éniŋ dzí.
28 Édɔ ná,
niané me mana yaá dzálá dzam te,
me mana fe bɔ́ kee avwálá te,
ma ye ke á Pañá,
meé lot ébe mína.
29 Ma yem fe ná éyɔŋ ma ye nzu,
ma ye sɔ́ ya mína bíbwárán Kristo ndzálánn.
30 Á bɔbédzaŋ,
ákála Ntí wea Yesukristo ye ákála édziŋŋ Nsísim,
ma lép mína ná míní vé nguu fufúlu bíabe mína á meyaglán menan ébe Nzamá ákála dam,
31 á mfá ye ná mé tɔbɔ nkoránn ébe ébá bé ne kaa ábwíni bé ne á Judea,
ya ávwála ma ke ya dɔ á Yerusalen dá bɔbédzaŋ bé ñɔŋ fe dɔ ya mesán,
32 ya á mfá ye ná amú nkómánn Nzamá mé sian ya mesán ébe mína,
ná me waabe fe bíabe mína.
33 Nzamá ye á mvwaá á tɔbɔgé ya mína bésesé.
Amén.