MIBƆANN
É Kálara Míbɔann Baapostol
Ngaá Mfúfúp Nsísim
1
Á Teófilo,
me ngá tsili abá ósúá mfá é mam Yesus a ngá tára ná aa bɔ ya áyágale,
2 akekwíñ é mos bé ngá ñɔŋ ñí ó yóp,
ákoan ná a mana yaá vé é baapostol a ngá tɔ́p memvéná ya nguu ye á Mfúfúp Nsísim.
Hechos -introducción
3 Éde eé dzuk,
a wú fe,
véa a ngá léreban bɔ́ ntétéá ya ábwiññ méndem bé sés sóánn ya mɔ.
A ngá bɔ eé yéne ébe bɔ́ táŋ ané melú mewóm mé nii,
eé kɔ́bɔ fe ya bɔ́ mam mfá édzwée ngɔ́mán Nzamá.
4 Éyɔŋ a mbé fe vóm mbɔ́ɔ́ bábe bɔ́,
a ngá mánan bɔ́ ná:
“Míní táa kólo á Yerusalen,
ve yanaŋán é ngaá Tará,
éñí míní ngá wók ma dzó ya dɔ.
5 Afáŋbɔ ná Juan a ngá du ya mendzímm,
ve,
niané avítsaŋ melú dá lot,
mína ye tɔbɔ nduubán ya Mfúfúp Nsísim.”
Hechos 1.1-11
Yesus aa bét á dzóp
6 Éde é bot bé mbé fufúlu bábe Yesus bé ngá síli ñí ná:
“Éyɔŋ dí ébyen,
ye wa ye búlu Israel edzwée ngɔ́mán?”
7 Ané ñí a ngá yalan ya bɔ́ ná:
“É sés áadenan ná míní yem métám ya bíyɔŋ Tará a ngá nii mfá édzwée deñ émyen.
8 Ve déá,
mína ye ñɔŋ nguu é tám Mfúfúp Nsísim a sian yaá ébe mína;
véa mína ye ma bɔ bengañiá á Yerusalen,
á Judea ngúrá,
á Samaria ya akekwíñ é vóm sí da súgu.”
9 Éde niané a ngá mana dɔ dzó,
béé yén ñí,
ané a ngá bét.
Éde a ngá mana ñáŋán á nkút été;
bá kaa fe ñí ábera yén.
10 É tám bé ngá bem mís ó yóp eé ke,
átem ná,
befám bé beáñ bé baga mifúm bítóp bé ntéle bábe bɔ́.
11 Ané bé ngá dzó bɔ́ ná:
“Á bot béye á Galilea,
amú dzé míní téle míní dága ó yóp?
É Yesus bé ñɔŋ mína á dzóp été ñí,
aa ye sɔ́ ámvála avɔ́ɔ́ ya avɔ́ɔ́ míní yén eé ke á dzóp.”
Bá tɔ́p Matías éyian Judas
12 Éde bé ngá búlán á Yerusalen atéé ye nkoó Álíba,
éwí ó ne bebeñ ya Yerusalen ntéññ nzenn bé ne wulu é mos Sátará.
Hechos 1.12-26
13 Niané bé ngá sian á Yerusalen ané bé ngá bét á ndá ndága ó yóp,
é vóm bé mbé bé tɔɔ́ ná,
Pedro,
Juan,
Jakobo,
Andrés,
Felipe,
Tomás,
Bartolomé,
Mateo,
Jakobo é mwán Alfeo,
Simón éñe fe bé ngá lwée ná Selote ya Judas é mwán Jakobo.
14 Bésesé béte bé mbé bé tɔɔ́ mbán á meyaglán été ya nlém mbɔ́ɔ́ bábe biningá,
ya fe María ñiá Yesus,
ya Yesus bɔbéñaŋ.
15 Éde melú méte,
ekóánn bot é tɔɔ́ ané ntet bot ya bot mewóm mé beáñ,
ané Pedro a ngá tébe énzénzaŋ bɔbéñaŋ a dzóo bɔ́ ná:
16 “Á bɔbédzaŋ,
é ngá yian ná Ntsili ó dzálában á mfá Judas amvála ané Mfúfúp Nsísim a ngá tára dɔ kɔ́bɔ ébe ánu David;
Judas te éñe a mbé nlére nzenn é bot bé ngá biñ Yesus.
17 Amú ná a mbé mbɔ́ɔ́ ye ébe bía,
a mbé fe a belé ngap éséññ Nzamá dí.”
18 “Ve,
aá kus afóo sí ya ntáŋ ékúkwát deñ,
éde niané a ngá ku búrúburu,
a laa fe,
ané miyea mí ngá mana ñí kwíñ átán.
19 Éde é bot bése bé mbé bé tɔɔ́ á Yerusalen bé ngá mana yem dzam te,
ané bé ngá lwée afóo sí te ná,
Aséldama,
dá yíli á nkɔ́bɔ weba ná,
afóo sí mekií.”
20 “Amú ná e ne ntsilann ábá Besalmo ná:
‘Étɔbɔga deñ é bɔɔ́ge ekuút,
kaa é mot aa tɔbɔ été,’
ya fe ná,
‘Mot mfé á ñɔŋŋe ásúk éséññ deñ.’ ”
21 “Dá yian ná,
é bot bíabe bɔ́ bí tɔbɔ yaá fufúlu é tám áse Ntí bíabe bɔ́ bí ngá wulu,
22 atéé ye nduann Juan akekwíñ é mos bé ngá ñɔŋ bía ñí ó yóp,
mot mbɔ́ɔ́ ye été á bɔ ngañiá bíabe bɔ́ ye áwómó Yesus.”
23 Éde bé ngá lére bot bé beáñ;
José,
éñí bé ngá lwée ná Barsabás,
eyola mésóm dá é tɔɔ́ ñí ná Justo ya fe Matías.
24 Ané bé ngá yaglan ná:
“Á Ntí,
wa wa yem mílém mí bot bése.
Léregé ébe é bot bá bé beáñ nzá o tɔ́p yaá,
25 á mfá ye ná á ñɔŋ afóo eséññ Nzamá,
a bɔ fe apostol,
édí Judas a ngá lés,
ná aa ke é vóm ó ngá yian ya ñí.”
26 Éde bé ngá kyak bemaa ébe bot béte bé beáñ,
ané bemaa bé ngá lére ná Matías,
éde bé ngá láŋ ñí bábe baapostol awóm ya mbɔ́ɔ́.