JUAN
É Mbamba Fwéñ Apostol Juan a ngá tsili
Éfíá ye éniŋ
1
Átáraga,
Efíá é mbé é tɔɔ́.
Efíá é mbé é tɔɔ́ bá Nzamá.
Efíá fe é mbé Nzamá.
2 Éñí te a mbé á tɔɔ́
bá Nzamá átáraga.
La Palabra (Juan 1.1-18)
3 Mam mése mé ngá tɔbɔ mbɔann amú Éñe,
éde kaa ki Éñe dzóm enziŋ ye é ntɔɔ́ mbɔann,
deé ndzí tɔbɔ mbɔann.
4 Éñe eniŋ é mbé é tɔɔ́ ébe éñe,
eniŋ te é mbé éyéá bot;
5 eyéá te dá feañ á dzíbi été,
ve dzíbi dá kaa dɔ ádzím.
6 Mot enziŋ aá sɔ́,
a tɔɔ́ eyola ná Juan,
Nzamá éñe aá lóm ñí.
7 Mot te a ngá sɔ́ amú ngañiá,
á mfá ye ná á vé é ngañiá eyéá te,
ná ébe éñe bot bése bé bwíni.
8 Se mot te émyen éñe a mbé eyéá,
fáve ná aá sɔ́ á mfá ávé
é ngañiá eyéá te.
9 Éñí te,
éñe a mbé é bébélá eyéá
é sɔ́ yaá éniŋ dzí,
aa feañ fe ébe mot binam áse.
10 A mbé a tɔɔ́ éniŋ dzí,
eniŋ dá dá tɔbɔ fe mvelann amú éñe;
ve éniŋ dzí deé ndzí ñí yem.
11 Aá sɔ́ ébe áabyeñ émyen,
ve áabyeñ bíte bí ndzí ñí ñɔŋ.
12 Ve,
ébá bése bé ngá ñɔŋ ñí,
ébá bá bwíni éyola deñ,
ébɔ́,
ñí a ngá vé nguu ye ábelé étɔɔ́ bwán Nzamá,
13 ébá béte bé sés mbyálánn ákála mékií,
ngé ki amú nkómánn mot binam,
ngé ki nkómánn fám enziŋ,
ve fáve nkómánn Nzamá.
14 Ané Éfíá te é ngá súgan bɔ mot binam,
é sɔ́ tɔbɔ énzénzaŋ dea.
Éde bía bí yén yaá fe é dúmá deñ,
dúmá ané édí é Mwán mbɔ́ɔ́ ya mbɔ́ɔ́ Éséá,
ndzálánn ya mvɔmm ya fe bébélá.
15 Juan a ngá vé ngañiá á mfá weñ,
eé kɔ́bɔ ya kíŋŋ oyaáp ó yóp éde a ngá dzó ná,
“Éñí,
éñe a ne é mot me ngá dzó ya ñí ná,
‘Éñí a mbé ná aa nzu ma á mvús,
éñe a súgan yaá ma bɔ ósú.
Amú ná a mbé a tɔɔ́ kaa ná me bɔ.’ ”
16 Ákála ná,
ébe ndzálánn abóm deñ,
bía bésesé bí ñɔŋ yaá é mvɔmm ñí ya éñí fɔ́ɔ́.
17 Dá é tɔɔ́ ná bá kee nkɔɔ́ métsiŋŋ ébe Moisés,
ve mvɔmm ya bébélá byá bí sɔ́ yaá amú Yesukristo.
18 Mot enziŋ ăá bé yén Nzamá eyɔŋ enziŋ;
ve é Mwán mbɔ́ɔ́ ya mbɔ́ɔ́ a yága Éséá ó twíñ,
éñe a lére yaá ñí.
É ngañiá Juan ndubot
19 É ngañiá Juan éñe ñí éyɔŋ bejudio bé ngá lóm befára ya belevita á Yerusalen ná bé ke ñí ásíli ná,
“O ne nzá?”
Juan el Bautista identifica al Mesías (Juan 1.19-34)
21 Ané bé ngá síli ñí ná,
“Éde ya?
Ye wa o ne Elías?”
Ané ñí a ngá dzó ná,
“Me sés ñí.”
“Ye wa o ne nkúlu medzó te?”
Ané a ngá yalan ná,
“Kaa.”
22 Véa éñe bé ngá síli ñí ná,
“Wa o ne nzá,
á mfá ye ná bí ke vé é bot bé lóm bía eyalann,
wa dzó á mfá wámyen á yá?”
23 Éde a ngá yalan ná,
“Ma mé ne kíŋŋ,
éñí da yónán éyáŋŋ été ná,
‘Sóŋánán é nzenn Ntí,’
amvála ané nkúlu medzó Esaía a ngá dzó.”
“Éde amú dzé wa du bot ngé o sés Kristo,
ngé Elías,
ngé ki nkúlu medzó te?”
26 Ané Juan a ngá yalan ya bɔ́ ná,
“Ma du bot ya mendzímm;
ve énzénzaŋ denan,
mot enziŋ a ntéle,
éñí míní ne kaa áyem.
27 Aa nzu ma á mvús,
[éñe a ne kaa ané mé bɔ],
éñí dăá ñep ya ma ná me tsii ñí mikɔɔ́ mengop.”
28 É mam má,
mé ngá bɔban á Betania á Yordán áyát,
é vóm Juan a ngá bɔ eé du bot.
É mwann ntómá Nzamá
29 É mos ó ngá belan véa,
Juan eé yén Yesus ná aa nzu ébe éñe,
á ŋga dzó bot ná:
Yénŋán é mwann ntómá Nzamá aa vea mísémm bot béye é sí ñí,
éñe ñí.
30 Éñe me ngá dzó ya ñí ná,
“É mvús dam mot aa ye sian,
éñe a súgan yaá ma bɔ ósú,
amú ná a mbé a tɔɔ́ kaa ná me bɔ.”
31 Mĕé ngá yem ñí,
ve á mfá ye ná ánzu léreban Israel été,
édɔ me ngá nzu ma du bot ya mendzímm.
32 Juan a ngá vé fe ngañiá,
eé dzó ná,
“Me yén yaá Mfúfúp Nsísim eé sigi á dzóp a sɔ́ berebe ébe éñe,
eé yéne ané obeŋŋ.
33 Éde,
mĕé ngá yem ñí,
ve éñí a ngá lóm ma ná me nzu ma du bot ya mendzímm éñe aá dzó ma ná,
“É mot wa ye yén Mfúfúp Nsísim aa sigi a sɔ́ berebe ébe éñe,
mot te éñe a ne é mot aa du bot ya Mfúfúp Nsísim.
34 Éde me yén yaá ñí,
me vé yaá fe ngañiá ná mot te éñe a ne É Mwán Nzamá.
Yesus aa tára tɔ́p beyága
35 É mos ó ngá belan véa,
Juan a ngá bera tébe ó véa bábe beyága bé beáñ béye béyága beñ.
Los seguidores siguen a Jesús (Juan 1.35-51)
36 Niané a ngá yén Yesus eé lot,
éde a ngá dzó ná,
“É mwann ntómá Nzamá éñe ñí.”
37 Éde niané beyága bé beáñ béte bé ngá wók é dzam a ngá dzó,
bé ŋga ke bá bee Yesus.
38 Vé niané Yesus á ngá veŋan,
á yén bɔ́ béé bee ñí,
ané a ngá síli bɔ́ ná,
“Dzé mína dzéŋ?”
Éde bé ngá yalan ya ñí ná,
“Á Rabí (bá kelan dɔ ná,
‘Á nyágale’),
o tɔɔ́ ó vé?”
39 Ané a ngá dzó bɔ́ ná,
“Nzaán,
mína ye yén”.
Éde bé ngá ke yén é vóm a mbé a tɔɔ́;
ané bé ngá lígi bábe bɔ́ mos te;
ákoan á ntɔɔ́ ané méwola mé nii ye ngɔgáse.
40 A mbé Andrés,
Simón Pedro mwanñaŋ,
mot mbɔ́ɔ́ ye é bot bé beáñ bé ngá wók Juan,
bé ŋga bee Yesus.
41 Éñí te aá tára koan ya mwanñaŋ Simón,
éde a ngá dzó ñí ná,
“Bí koan yaá ya Mesías (bá kelan dɔ ná,
‘Kristo’).”
42 Ané a ngá ke ya ñí ébe Yesus.
Niané Yesus a ngá dága ñí,
véa á dzó ñí ná,
“Wa o ne Simón,
é mwán Jonás;
bá ye wa lwée ná Sefas (bá kelan dɔ ná ‘Pedro’).”
43 É mos ó ngá belan véa,
Yesus eé kómo ke á Galilea,
ané a ngá koan ya Felipe,
véa aa dzó ñí ná,
“Beegé ma.”
44 Felipe te a mbé mot ye á Betsaida,
é kísoan Andrés bá Pedro.
45 Éde Felipe ñí aa koan ya Natanael,
ané a ngá dzó ñí ná,
“Bí yén yaá é mot Moisés a ngá tsili á nkɔɔ́ métsiŋŋ été,
ya fe bekúlu medzó,
Yesus é mwán José,
mot ye á Nasaret.”
46 Ané Natanael a ngá síli ñí ná,
“Ye é dzam é ne mvéáñ é ne sɔ́ á Nasaret?”
Éde Felipe a ngá yalan ya ñí ná,
“Nzá áyén.”
47 Niané Yesus a ngá yén Natanael eé nzu ñí bebeñ,
éde a ngá dzó á mfá weñ ná,
“Dággán,
ñá mwann Israelita éñe ñí,
meduk mé sés ébe éñe.”
48 Ané Natanael a ngá síli ñí ná,
“Wa yem ma ó vé?”
Véa éñe Yesus a ngá yalan ya ñí ná,
“Me yén wa éyɔŋ wa tɔɔ́ élé Ígera ásí kaa ná Felipe á lwée wa.”
49 Ané Natanael a ngá yalan ya ñí ná,
“Á Rabí,
wa o ne É Mwán Nzamá!
Wa fe o ne Kéza ye Ísrael.”