Áwómó Yesus
24
É mos ósúá ye á sóánn,
ekúná kírí,
éde biningá béte bé ngá ke á sɔŋ,
bé kéñ fe ya é byém byá num mvéáñ,
é byém bé ngá mana koman.
2 Ané bé ngá koan ná ákwá é ngá dzip sɔŋ é kólo yaá;
3 éde bé ngá ñíi été,
ve béé ndzí koan ya mbim Ntí Yesus.
4 Éde a ngá bɔ ná,
bé téle nzamzámánn néa,
éde bot bé beáñ bé ngá nzu yéne ébe bɔ́,
bé baga bítóp byá feañ.
5 Éde bé ngá kɔ wɔŋŋ,
bé kútbe ó sí,
bé lwíi fe mesú ósí,
ané bot béte bé ngá síli bɔ́ ná:
“Amú dzé mína dzéŋ éñí a ne ntétéá á miwúán été?
6 A sés ó vá;
á wómo yaá.
Símaŋán ámvála a ngá kɔ́bɔ ya mína,
ákoan a ngén á Galilea,
7 ná:
‘dá yian ná bé kee é Mwán Mot é mó bebɔ misémm été,
bé dɔ́mle fe ñí á krús,
eyɔŋ te a wómo é mos léa.’ ”
8 Éde bé ngá síman bífíá Yesus,
Ángeles en la Tumba
9 ané bé ngá kólo á sɔŋ,
bé kéñ kat beyága awóm ya mbɔ́ɔ́ mam méte ya fe é bot bése bevɔ́ɔ́.
10 Ébá bé ngá kat baapostol mam méte bé mbé ná:
María Magdalena,
Juana ya María,
Jakobo ñiá,
ya é biningá bevɔ́ɔ́ bé mbé bábe bɔ́.
11 Ve,
bifíá bíte bí ngá fonan bɔ́ ané mengann.
Béé ndzí bwíni biningá béte.
12 Ve déá,
éde Pedro a ngá tébe a kéñ mbíí á sɔŋ;
niané a ngá dága été,
ané a ngá yén fáve bitóp,
éde a ngá ke á ndá,
eé yágán fe é dzam é ngá bɔban.
La Tumba Está Vacía
Nzenn ye Emaús
13 Mos te ébyen,
bot bé beáñ béye beyága Yesus bé ngá ke é dzeá bá lwée ná Emaús,
é mbé ané awóm mekwá ya akwá avɔ́ɔ́ akekwíñ á Yerusalen.
14 Bé ngá ke bá kɔ́bɔ bevɔ́ɔ́ ya ébá bevɔ́ɔ́ é mam mése mé ngá bɔban.
15 Éde a ngá bɔ ná,
béé ke bá kɔ́bɔ,
ya fe ákéá bébyen ya bébyen,
ané Yesus émyen a ngá yit bɔ́ bebeñ,
á ŋga ke fe bábe bɔ́;
16 bé ngá yén ñí,
ve dzam enziŋ é ngá dzip bɔ́ ná bé táa ñí yem.
17 Éde a ngá síli bevɔ́ɔ́ ya ébá bevɔ́ɔ́ ná:
“Mína ke mína léan benzá mam?”
Ané bé ngá tébe,
bé tɔɔ́ eywiññ.
18 Éde mbɔ́ɔ́ ye ébe bɔ́,
éñí á mbé eyola ná Kleofas,
a ngá yalan ya ñí,
a dzóo ná:
“Wa fá o ne suga nnéŋ á Yerusalen ná wăá yem é mam mé bɔban yaá ó wéñ mélú má.”
19 Ané ñí a ngá síli bɔ́ ná:
“Benzá mam?”
Éde bé ngá yalan ná:
“É dzam Yesus ye á Nasaret;
a mbé nkúlu medzó,
a mbé fe ewólo á mibɔann ya á bifíá,
ébe ású Nzamá ya ósú bot bése;
20 ya ámvála betébosú befára ya bédzwée bea bé ngá kee ñí á mfá ye ná bé kík ñí nsaŋ ná aa wú,
bé dɔ́mle fe ñí á krús;
21 á mfá wea,
bí ngá yana ná éñe a nkún nzu ya akoroga ná á vé Israel filí.
Ve,
ya ásesé te,
ngúrá mfá éwɔ ó ne ná,
é mos léa éwɔ wí avé dzam te é bɔban.
22 Mfá mbɔ́ɔ́ éwɔ wá ó ne ná,
biningá benziŋ béye ébe bía bá bé kpoo yaá bía mevoó.
Bé kúnú ke á sɔŋ é kírí ñí,
23 bá kaa fe ákoan ya mbim weñ.
Éde bé nzu dzó ná baángel bé yéne ébe bɔ́,
ané baángel béte bé dzó bɔ́ ná Yesus a ne ntétéá.
24 Éde fe befám benziŋ béye ébe bía bé ke á sɔŋ weñ,
ané bá bé koan fe ya dɔ ámvála biningá bé mvá dzó;
bá béé ndzí ki ñí yén.”
25 Éde Yesus a ngá dzó bɔ́ ná:
“Á akúkút bot milém mí ne otɔ́ŋŋ ye ábwíni é mam mése bekúlu medzó bé ngá dzó!
26 Ye ná Kristo ĕé ngá yian yén midzuúk míte,
a kéñ fe ñíi á dúmá deñ été,
ngeá?”
27 Ané a ngá túga bɔ́ kat é mam Mitsilann míse myá kɔ́bɔ mfá weñ,
atéé ye mébá Moisés akekwíñ mébá bekúlu medzó bése.
28 Éde bé ngá sian bebeñ é dzeá bé ngá ke,
éde a ngá bɔ ané é mot aa ke oyaáp ósú.
29 Ve,
éde bé ngá yémle ya ñí,
béé dzó ná:
“Líggé bíabe mína,
amú ná ŋgɔgɔ́ é ntɔɔ́ bebeñ,
nlódzóp wá ó lúŋbe yaá fe.”
Éde fá a ngá ñíi,
ané a ngá lígi bábe bɔ́.
30 Éde a ngá bɔ ná,
niané a ngá tɔbɔ ó téble bábe bɔ́,
éde a ngá twáa mfémm,
a vé akíba,
ané a ngá bák wɔ́,
a vé fe bɔ́ wɔ́.
31 Éde é mís meba mé ngá kúuban,
ané bé ngá yem ñí.
Ve,
éde a ngá dzáŋ.
32 Éde bé ngá dzó bébyen ya bébyen ná:
“Yénŋe ané milém mí mvá bía yóŋ éyɔŋ a mvá kɔ́bɔ ya bía á nzenn,
éyɔŋ a mvá bía túga kat Mitsili!”
33 Éde bé ngá tébe áwola te ébyen,
ané bé ngá búlán á Yerusalen;
éde bé ngá koan ya baapostol awóm ya mbɔ́ɔ́ bé tɔɔ́ vóm mbɔ́ɔ́ ya fe é bot bábe bɔ́ bé mbé.
34 Ané bésesé béte bé ngá dzó bot bé beáñ béte ná:
“É ne été ná Ntí a wómo yaá;
a yéne yaá fe ébe Simón.”
35 Éde bé beáñ béte bá bé ngá kat bɔ́ é mam mé ngá lot a bɔ́ énzénzaŋ nzenn,
ya ámvála bé ngá yem ñí niané a ngá bák mfémm.
Yesus aa yéne énzénzaŋ béyága été
36 Ákoan ná bé ngén bá kɔ́bɔ mam méte,
ané Yesus a ngá yéne énzénzaŋ deba été,
a dzóo bɔ́ ná:
“Mvwaá eé bɔɔ́ge ya mína.”
37 Éde bé ngá sigan ya ábíra kɔ wɔŋŋ;
bé ŋga bwíni ná bá yén kónn.
38 Ané a ngá dzó bɔ́ ná:
“Amú dzé mína fógan?
Amú dzé ki mína sigbe mílém myenan été?
39 Yénŋán é mó mam ya mébɔ mam.
Mámyen ñí;
namaŋán ma,
yénŋán fe ma,
amú ná kónn dĕé belé mison ngé ki biveés ané míní téa me belé byɔ ná.”
40 Niané a ngá dzó dɔ,
éde a ngá lére bɔ́ mó ya mebɔ.
41 Ve,
bé ngén bé tɔɔ́ néa kaa ábwíni,
amú mesán ya eyágán,
ané a ngá dzó bɔ́ ná:
“Ye míní belé dzóm ye ádzí ó vá?”
42 Éde bé ngá vé ñí etun nkéŋán kwaás [ya ywíñ];
43 ané ñí a ngá ñɔŋ dɔ a dzí fe dɔ ébe ású deba.
44 Véa,
éñe a ngá dzó bɔ́ ná:
“Ákoan me ngén bíabe mína,
bífíá mé ngá kɔ́bɔ ya mína ébyɔ bí:
‘Ná é mam mése mé ne ntsilann mfá wɔm métsiŋŋ Moisés été ya mébá bekúlu medzó été ya Bésalmo été mé belé ná má mana dzálában.’ ”
45 Éde a ngá bɔ bɔ́ osímánn ná bé túga wók Mitsili,
46 a dzóo fe bɔ́ ná:
“Éñe é ne ntsilann amvála te,
ná:
Kristo á dzuk,
a wómo miwúán été é mos léa,
47 ya fe ná,
ya éyola deñ bé kat fwéñ ye á ndzobán mfá ye á ndzámann mísémm ébe meyɔŋ mése,
atéé ye á Yerusalen.
48 Míní ne mam méte bengañiá.
49 Dággán,
ma ye mína lóm é ngaá Tará a ngá kyaa.
Ve,
tɔbɔgán á kísoan ó vá akekwíñ ané mína ye tɔbɔ mbwátán ya é nguu da sɔ́ á dzóp.”
Aparece Jesús Resucitado
Yesus aa bét á dzóp
50 Ané a ngá kólo ya bɔ́ á kísoan été akekwíñ á Betania;
éde a ngá bére mó ó yóp,
á ŋga vé abwará ya bɔ́.
51 Éde a ngá bɔ ná,
é tám a ngá vé abwará ya bɔ́,
á ŋga kólo ébe bɔ́ eé bét á dzóp.
52 Éde,
niané bé ngá mana kútbe ó sí ná bá vé ñí ngaŋŋ,
ané bé ngá búlán á Yerusalen ya abwiññ mesán;
53 bé mbé fe mbán átɔbɔ á templo été,
béé lugu Nzamá.
La Gran Comisión y Ascensión
Invitación para Conocer Personalmente a Jesús