MARKOS
É Mbamba Fwéñ Markos a ngá tsili
Juan Ndubot a ne éyáŋŋ été
1
Átáraga ye é mbamba fwéñ Yesukristo é Mwán Nzamá.
Markos 1.1-13
“Dággán,
ma lóm nkat fwéñ wɔm ébe ású dwe,
éñe aa ye kom é nzenn dwe.
3 Kíŋŋ mot da yón éyáŋŋ été,
deé dzó ná,
‘Komŋán é nzenn Ntí,
sóŋán ménzenn meñ tételé.’ ”
4 Juan Ndubot a ngá kúlu éyáŋŋ été,
eé kat fwéñ ye á nduubán ye á ndzobán mfá ndzámann mísémm.
5 Abeŋŋ sí ye á Judea ngúrá ya bot bése béye á Yerusalen bé ngá ke ébe éñe,
éde béé mem mísémm myeba,
á ŋga du bɔ́ óswíñ Yordán.
6 Juan a mbé a baga bitóp bikop bí kamelio,
a mbé fe a baga kaná ekop tsít ángérgá,
a ngá dzí bitandá ya ywíñ ye áfan.
7 Juan a ngá kat fwéñ eé dzó ná,
“É mvús dam é mot aa daŋ ya ma ya nguu aa nzu,
éñí me sés é mot a ne lúŋbe ósí ná a tsii mikɔɔ́ míye méngop meñ.
8 Me ngá du mína ya mendzímm,
ñí aa ye mína du ya Mfúfúp Nsísim.”
Bá du Yesus
9 A ngá bɔ ná melú méte Yesus a ngá sɔ́ á Nasaret ye á Galilea,
ané Juan a ngá du ñí á Yordán.
10 Éde é tám a ngá kólo méndzímm été,
etéññ te ébyen a ngá yén dzóp deé yɔ́ŋbe,
éde Mfúfúp Nsísim a ngá sigi ébe éñe amvála ané obeŋŋ.
11 Ané kíŋŋ e ngá sɔ́ á dzóp été deé dzó ná,
“Wa o ne ndzindziŋŋ Mwán wɔm,
wa wa vé ma mesán á nlém.”
Sátan aa bóble Yesus
12 Etéññ te ébyen Mfúfúp Nsísim a ngá tsíni ñí ná a ke éyáŋŋ été.
13 Éde a ngá tɔbɔ éyáŋŋ été táŋ melú mewóm mé nii,
Sátan eé bóble ñí;
a mbé a tɔɔ́ énzénzaŋ bétsít béye áfan été,
baángel béé belan ya ñí.
Yesus aa tára ná aa kat mbamba fwéñ á Galilea
14 Niané bé ngá fet Juan á mbok,
Yesus a ngá ke á Galilea eé kat é mbamba fwéñ Nzamá,
Markos 1.14-45
15 eé dzó ná,
“Tám é koan yaá,
édzwée ngɔ́mán Nzamá é ntɔɔ́ bebeñ,
dzobgán míní bwíni fe mbamba fwéñ.”
Yesus aa lwée beyɔ́p kwaás
16 Yesus eé lot á nsá máŋ méye á Galilea,
ané a ngá yén Simón bá mwanñaŋ Andrés béé wea mevwát á máŋ été,
amú ná bé mbé beyɔ́p kwaás.
17 Éde Yesus a ngá dzó bɔ́ ná,
“Beegán ma,
ma ye mína lík ná míní bɔ beyɔ́p bot.”
18 Éde bé ngá lík mevwát etéññ te ébyen,
ané bé ngá bee ñí.
19 Niané a ngá bera ke ósú avítsaŋ,
ané a ngá yén Jakobo é mwán Zebedeo,
ya mwanñaŋ Juan,
bá bé mbé fe bé tɔɔ́ á byéa été béé kom mevwát.
20 Éde a ngá lwée bɔ́ etéññ te ébyen;
éde béé lík éséá weba Zebedeo á byéa été ya bebɔ biséññ,
ané bé ngá ke bábe Yesus.
É mot a mbé a belé nsísim mvin
21 Éde bé ngá sian á Kapernaúm;
niané é mos Sátará ó ngá kwíñ,
ané Yesus a ngá ñíi á sinagoga été,
ané a ngá tára ná aa yágale bot.
22 Éde bot bé ngá kám áyágalé deñ,
amú ná a ngá yágale bɔ́ amvála ané éñí a belé edzwée,
se ané beyágale métsiŋŋ.
23 Mot enziŋ a mbé á sinagoga été ó véa a belé nsísim mvin ó ñúu,
ané mot te a ngá tára ná aa yón,
24 eé dzó ná,
“Nzá dzam bí belé ya wa,
á Yesus mot ye á Nasaret?
Ye o sɔ́ yaá bía tsam?
Ma yem nzá o né,
O ne Mfúfúp Mot Nzamá.”
25 Yesus a ngá vé nsísim te mbámm,
eé dzó ná,
“Dzipge anu,
kólogé fe ébe mot te!”
26 Ané nsísim mvin te ó ngá suk ñí ñúu ya nguu,
éde ó ngá yón ya kíŋŋ oyaáp ó yóp,
ó kwíñ.
27 Ané bot bése bé ngá kám,
akekwíñ ané bé ngá síli bevɔ́ɔ́ ya ébá bevɔ́ɔ́ ná,
“Nzá dzam dí?
Mfefeñ áyágalé ya edzwée!
Aa mánan atwaa misísim mí mvin,
mí ŋga wók ñí.”
28 Éde,
etéññ te ébyen éwógá deñ é ngá mana ñeŋ mifá míse míye ábeŋŋ sí ye á Galilea.
Yesus aa séñ Simón Pedro nkiá
29 Etéññ te ébyen,
niané bé ngá kólo á sinagoga été,
éde bé ngá ke é ndá Simón ya Andrés,
bábe Jakobo ya Juan.
30 Ákoan ná,
Simón nkiá a bóo énɔŋŋ ná aa wók avép;
ané bé ngá dzíga dɔ kat Yesus.
31 Éde Yesus a ngá yit ñí bebeñ,
ané a ngá biñ ñí wéá,
a téle ñí,
éde avép a ngá mana ñí ó ñúu,
á ŋga belan ya bɔ́.
Yesus aa séñ abwiññ bot
32 Ngɔgáse,
niané nlódzóp ó ngá dzím,
éde bé ngá sɔ́ ya ñí ya é bot bése bé ngá kwan ya ébá bé mbé bé belé misísim mí mvin.
33 Éde kísoan ngúrá e ngá mana nzu dzéñ á mbéñ ósí.
34 Ané a ngá séñ abwiññ bot é mbé é belé akwann memvála ya memvála,
a ngá vea fe abwiññ misísim mí mvin,
ĕé ngá lík ki ná mísísim míte mí kɔ́bɔ,
amú ná mí ngá yem ñí.
Yesus aa kat mbamba fwéñ bésinagoga
35 Ekúná kírí,
ákoan ná oyomm dzíbi ó ngén,
Yesus a ngá tébe a kwíñ,
éde a ngá ke vóm enziŋ évwíñ,
á ŋga yaglan ó véa.
36 Éde Simón,
ya é bot bábe bɔ́ bé mbé bé ngá ke ñí dzéŋ;
37 Niané bé ngá koan ya ñí,
ané bé ngá dzó ñí ná,
“Bot bése bá dzéŋ wa.”
38 Ané a ngá dzó bɔ́ ná,
“Bí keŋán mfá mbɔ́ɔ́,
á meá mé ne míféŋŋ,
á mfá ye ná me kat fe mbamba fwéñ ó wéñ,
amú ná édɔ má sɔ́.”
39 Ané a ngá ke aa kat mbamba fwéñ á Galilea áse,
besinagoga beba été,
eé vea fe mimbéa misísim.
Yesus aa séñ nzénzamm
40 Éde nzénzamm enziŋ ó ngá nzu ébe éñe,
o kút ñí mebɔ́ŋŋ ó sí,
ó ŋga dzaa ñí engóngɔ́ɔ́,
weé dzó ñí ná,
“Ngé wa kómo,
o ne ma fúbu.”
41 Ané Yesus a ngá yén ñí engóngɔ́ɔ́,
éde a ngá sám wéá a nama ñí,
a dzóo fe ñí ná,
“Ma kómo.
Bɔɔ́ge mfúbánn!”
42 Éde etéññ te ébyen nzamm é ngá mana ñí ó ñúu,
ané a ngá lígi mfúbánn.
43 Éde Yesus a ngá vé ñí mbámm,
véa,
a yáán ya ñí,
44 ané a ngá dzó ñí ná,
“Dággé,
o táa kat mot enziŋ dzam;
fáve ná,
kéŋ,
léregé fára é ñúu dwe,
o vé fe metúnŋa mfá mfúbánn we,
émá Moisés a ngá téle á mfá ye ná é bɔ bɔ́ ngañiá.”
45 Ve,
éñe,
niané a ngá kólo,
á ŋga tára ná aa ke a kɔ́bɔ dɔ éyéá été ya ákúlán dɔ akekwíñ ná Yesus ĕé mbé fe ñíi á kísoan enziŋ éyéá été,
fáve ná,
a ngá bɔ eé lígi átán,
mevóm bot bĕé tɔɔ́;
bot bé ŋga sɔ́ ébe éñe mifá míse.