É fwéñ áwómó Yesus
28
Niané Sátará a ngá lot,
ekúná kírí ye é mos ósúá ye á sóánn,
ané María Magdalena bá é María mbɔ́ɔ́,
bé ngá ke yén sɔŋ.
2 Véa éñe bora sukban sí ó ngá bɔban,
amú ná ángel Ntí a ngá sigi á dzóp été,
niané a ngá sian a bígle akwá,
a tɔbɔ fe dɔ áyóp.
3 A ngá yéne amvála ané vevés,
étóp deñ dá mfúm amvála ané nieve.
4 Ya é wɔŋŋ bé ngá kɔ ñí,
benzima bé ŋga ku ngom,
véa bé kpéñ ané mibim.
5 Éde ángel,
eé kɔ́bɔ,
a ngá dzó biningá ná,
“Míní táa kɔ wɔŋŋ;
amú ma yem ná mína dzéŋ Yesus,
éñí bé ngá ywíñ á krús.
6 A sés ó vá,
amú ná a wómo yaá ámvála a ngá dzó.
Nzaán áyén é vóm a mbé a bóo!
7 Édɔ ná,
keŋán avóó,
míní kat béyága beñ ná,
‘Á wómo yaá míwúán été;
éde ná aa ke mína ósú á Galilea;
ó wéñ éñe mína ye ñí yén.’
Dággán ná ma me dzó yaá mína dɔ.”
Biningá bá yén Yesus
8 Éde biningá bé ngá dzíga kólo ó sɔŋ ya wɔŋŋ,
béé bíra fe sán,
ané bé ngá ke mbíí bé kat béyága beñ fwéñ.
[Éyɔŋ bá bé ngá ke kat beyága fwéñ,]
9 véa éñe,
Yesus a ngá toban ya bɔ́,
eé dzó ná,
“Á mbólán!”
Éde bá bé ngá yit ñí bebeñ,
bé kútbe ó sí bé ŋga kaŋ ñí,
béé wúbán ñí ya mebɔ.
10 Ané Yesus a ngá dzó bɔ́ ná,
“Míní táa kɔ wɔŋŋ.
Keŋán,
katgán bɔbédzaŋ fwéñ ná bé ke á Galilea,
éñe fe bá ye ma yén ó wéñ.”
É fwéñ bénzima bé ngá kálá sɔŋ
11 Véa bá béé ke,
ané benzima benziŋ béye été bé ngá ke á kísoan,
bé kat betébosú befára é mam mése mé ngá bɔban.
12 Éde,
niané bé ngá mana kóán bábe mikúkúmá,
béé bu fak,
ané bé ngá kee benzima béte abwiññ moann,
13 béé dzó ná,
“Dzógán ná,
‘Béyága béñ bé sɔ́ á alú,
bé dzíp mbim weñ ntéññ bía bóo óyó.’
14 Éde ngé ŋgɔ́vina ñí a wók dzam te,
bía bía ye ñí sili nlém ósí,
véa bí kam fe ya mína ébe ntéé óse.”
15 Ébá bé ngá ñɔŋ moann,
bá bé bɔ fe ámvála bé ngá lére bɔ́.
Ané ndzóán te ó ngá mana kwíñ éndendaŋ béjudio été,
anzukwíñ émuú.
Yesus aa lóm béyága beñ
16 Édɔ ná awóm béyága ya mbɔ́ɔ́ bá bé ngá ke a Galilea,
á nkoó Yesus a ngá dzó bɔ́ ya wɔ́.
17 Niané bé ngá yén ñí bé kútbe ó sí bé ŋga kaŋ ñí;
afáŋbɔ ná bevɔ́ɔ́ benziŋ bá bé ngá yep.
18 Niané Yesus a ngá ke koan ya bɔ́,
ané a ngá dzó ná,
“Nguu Édzwée ése ye á dzóp,
ye fe á sí ó vá,
bé vé yaá ma dɔ.
19 Édɔ é ne ná,
keŋán,
bɔgán fe beyága ébe meyɔŋ mése,
míníí du bɔ́ ébe éyola Éséá,
ébe édí Mwán,
ya ébe édí Mfúfúp Nsísim;
20 míní vé bɔ́ ayágalé ná bé dzálá é mam mése me mánan yaá mína.
Dággán fe ná,
me tɔɔ́ bíabe mína mélú mése,
akekwíñ ásúgánn ye é tám ñí.”