Mfúfúp Nsísim aa sian
2
Éyɔŋ é mos Pentekostés ó ngá kwíñ,
bésesé bé mbé bé kóán vóm mbɔ́ɔ́.
Hechos 2.1-13
2 Éde ásítem ná,
mora eduŋŋ a ngá sɔ́ á dzóp été,
amvála ané mora evúŋ dá lot,
eduŋŋ te é mana dzéñ é ndá bé mbé bé tɔɔ́.
3 Ané dzóm é ngá yéne é tɔɔ́ ané bwann mikaba mí ndúán,
deé fonan ya medém,
é berebe kada mot ye ébe bɔ́ áyóp.
4 Éde bésesé bé ngá tɔbɔ ndzálánn ya Mfúfúp Nsísim,
ané bé ngá tára ná bá kɔ́bɔ mikɔ́bɔ mifé ámvála Nsísim a ngá vé bɔ́ ná bé kɔ́bɔ.
5 Bejudio bé mbé bé tɔɔ́ á Yerusalen,
ébá bá baale memvéná mé Nzamá mvéáñ bé ngá sɔ́ ébe meyɔŋ mése méye á nlódzóp ásí.
6 Niané mora eduŋŋ te a ngá bɔ,
ané nkuna bot ó ngá kóán ó tɔɔ́ nzamzámánn,
amú ná kada mot a ngá wók bɔ́ béé kɔ́bɔ á nkɔ́bɔ weñ émyen.
7 Éde bé voó néa ya áyágán ané bé ngá dzó ná:
“Dággán!
Ye ná é bot bése bá kɔ́bɔ bá bé sés Begalileo?”
8 “É ne bɔ á yá,
ná kada mot ye ébe bía bía wók míkɔ́bɔ bía bébyen bí ngá byála ya myɔ?
9 Beparto,
Bemedo,
Beelamita;
é bot bé tɔɔ́ á Mesopotamia,
ya á Judea,
ya á Kapadosia,
ya á Ponto,
ya Asia,
10 ya á Frigia,
ya á Panfilia,
ya Égipto,
ya á mebeŋŋ mésí méye á Libia bebeñ á Sirene;
ya béyéŋ bá sɔ́ á Roma,
ané bejudio,
ya é bot bá bee nyébé béjudio;
11 Bekretense,
ya Meráp,
bía wók bá kɔ́bɔ míkɔ́bɔ myea é bora bé mam Nzamá.”
12 Bésesé bé ngá bíra voŋbe kaa ki áyem é dzam dá lot,
ané bé ngá síli bébyen ya bébyen ná:
“É dzam dí,
dá yíli á yá?”
13 Ve,
ébá bevɔ́ɔ́ bá béé kpógo bɔ́ bé ŋga dzó ná:
“Bá fían vino.”
Pedro aa kɔ́bɔ ya nkuna bot
14 Ané Pedro a ngá tébe tételé bábe awóm baapostol ya apostol mbɔ́ɔ́,
éde a ngá bére kíŋŋ eé kat bɔ́ ná:
“Á bejudio ya é bot bése míní tɔɔ́ á Yerusalen;
yemŋán é dzam dí,
túggán fe ábéá bífíá byam.
Hechos 2.14-47
15 Ébá băá fían ámvála mína tém,
amú ná dzóp é ngén méwola ebuú ye kíkírí.
16 fáve ná,
édí édɔ é ne ndzóán ébe nkúlu medzó Joel ná,
17 ‘Nzamá aa dzó ná:
aa ye bɔ ná,
melú méye ásúgánn,
ma ye swii Nsísim wɔm ébe mot áse;
é bwán béfám benan ya é bwán bé biningá benan
bá ye kúlu medzó;
béndómán benan,
bá bá ye yén miyénánn míye á nsísim,
míyomm mí bot myenan myá myá ye yén biyéyemm.
18 Melú méte áloá béfám,
ya áloá biningá dam
dá ma ye fe swii Nsísim wɔm,
bá bé ŋga kúlu fe medzó.
19 Ma ye bɔ bora biyágán bí mam ó yóp á dzóp été,
mendem má á sí ó néa;
mekií,
ndúán ya fe ebúbút ye ótsírá.
20 Kaa ná é mora mos dúmá Ntí ó sian,
nlódzóp wá ye veŋan dzíbi,
ngomdan da e veŋan mekií.
21 Aa ye bɔ ná,
éñí áse aa yónán éyola Ntí,
aa ye tɔbɔ nkoránn.’ ”
22 “Á befám béye Israel,
béágán bífíá bí:
Yesus mot ye á Nasaret,
éñe Nzamá a ngá lére ébe ású denan ná a mbé a tɔɔ́ ébe éñe,
ya biwólo bí mam,
ya bora biyágán bí mam,
ya fe méndem Nzamá a ngá bɔ ébe Yesus te énzénzaŋ denan,
amvála ané mína bébyen mína yem.
23 Éñí te,
ya átáraga nyemann mam Nzamá ya ntáán mam weñ,
míní ngá kee ñí é mó é bot bé ne kaa ábaale metsiŋŋ,
ná bé dɔ́mle ñí á krús,
míní ywíñ fe ñí.
24 Éñe Nzamá a ngá wómo niané a ngá mana ñí vea mítéñ míye áwú,
é tɔɔ́ ná awú dĕé mbé ñí dzwée.
25 Amú ná David aa kɔ́bɔ á mfá Yesus te ná,
‘Ma yén Ntí ósú wɔm eyɔŋ ése;
amú ná a ne ma á mfá meyóm ná me nza fógan.
26 Dzam te édɔ nlém wɔm ó ngá sán,
é dém dam dá é ŋga va;
atwaa é ñúu dzam,
da da ye fe waabe ya óyan te.
27 Amú ná wăá ye lík nsísim wɔm á sí békónn
wăá ye ki lík ná mfúfúp mot we ó yén ané wá bweñ.
28 Waá lére ma nzenn ye éniŋ,
wa ye ma dzálá ya mesán ású dwe.’ ”
29 “Á bɔbédzaŋ,
me ne mína kɔ́bɔ bébélá ná,
emvámvámm David dá wú,
é dzebe,
é sɔŋ deñ da e ne fe énzénzaŋ dea aa nzu kwíñ émuú.
30 Édɔ é ne ná,
David a mbé nkúlu medzó,
a ngá yem fe ná Nzamá aá kyaa ñí eé kan sɔŋ ná mot ye é mvɔŋ bot dzeñ [mékií meñ] aa ye tɔbɔ ósí étɔɔ́ édzwée deñ.
31 Éde niané a ngá yén é mam má nzu mélú ósú,
néa,
a ngá kɔ́bɔ á mfá áwómó Kristo,
éñí eé ndzí tɔbɔ nlamann á sí békónn,
é ñúu deñ da deé ndzí ki bweñ.
32 Yesus te,
éñe a ne éñí Nzamá a ngá wómo.
Bía bésesé bí ne dzam te bengañiá.
33 Édɔ é ne ná,
a ntɔɔ́ mbélánn ó yóp á mfá meyóm Nzamá,
a ñɔŋ yaá fe é ngaá Mfúfúp Nsísim ébe Éséá.
Éde a swii yaá é dzóm mína yén ya áwók dí.
34 Amú ná David eé ndzí bét á dzóp,
ve,
aa dzó ná
‘Ntí a ngá dzó Ntí wɔm ná:
Tɔbɔgé á mfá méyóm wɔm,
35 akekwíñ ané má bɔ mínzínzíŋŋ mwe étéle mebɔ dwe.’ ”
36 “É ndá bot áse ye Israel,
yemŋán ya bébélá áse ná,
é Yesus émyen míní ngá dɔ́mle á krús,
Nzamá a téle yaá ñí Ntí ya Kristo.”
37 Niané bé ngá wók dɔ,
ané bé ngá wórán nlém mitéñ;
éde bé ngá síli Pedro bábe é baapostol bevɔ́ɔ́ ná:
“Á bɔbédzaŋ,
bía yian bɔ á yá?”
38 Ané Pedro a ngá yalan ya bɔ́ ná:
“Dzobgán kada mot ye ébe mína,
á duuban fe ya éyola Yesukristo,
ná mísémm myenan mí tɔbɔ ndzámann,
éde mína ye ñɔŋ Mfúfúp Nsísim.
39 Amú ná mína míní ne ya ngaá te,
ya é bwán benan ya é bot bése bé ne oyaáp ya ébá bésesé Ntí é Nzamá wea aa ye lwée.”
40 Pedro a ngá vé bɔ́ ngañiá ya abwiññ bifíá bifé,
eé yémle fe bɔ́ ná:
“Tɔbɔgán nkoránn ébe ékúkwát myee bot wi!”
41 Éde é bot bé ngá yébe bífíá byeñ,
bé ngá duuban,
ané bot bé ngá kɔgle mos te bebeñ táŋ binzuk bí léa.
42 Bé ngá tɔbɔ mbán méyágalé baapostol été,
ya ákóán vóm mbɔ́ɔ́,
bé ngá bɔ béé kaban mfémm,
béé yaglan fe.
43 Éde mot áse a ngá kɔ wɔŋŋ,
amú ábwiññ mendem ya biyágán bí mam bí ngá bɔban é mó baapostol.
44 Ébá bésesé bé ngá bwíni,
bé ngá bɔ béé kóán vóm mbɔ́ɔ́,
bé mbé fe bé belé byém bíse fufúlu.
45 Ané bé ngá kuan ákúmm deba ya é byém byeba,
béé kap byɔ ámvála é mbé vwála kada mot.
46 Kada mos bé ngá bɔ béé tɔbɔ mbán ya nlém mbɔ́ɔ́ á templo.
Bé ngá bɔ béé ke bá kap mfémm mendá ya mendá,
béé dzí fe ya mesán ya nlém nsilann ósí,
47 béé lugu Nzamá,
bot bése bé ngá yén fe bɔ́ mvéáñ.
Éde Ntí a ngá bɔ eé kɔgle bɔ́ é bot bé ngá ke bá koroban kada mos.