Mbóbók wá tɔbɔ Mvwaá
3
Mos enziŋ,
Pedro bá Juan bé ngá ke méyaglán méye méwola mé léa ye ngɔgáse á templo.
Hechos 3.1-26
2 Á mbéñ ósí templo bá lwée ná Mbamba Mbéñ,
kada mos bé ngá bɔ béé bwíi mot enziŋ ó véa,
ná é mot áse á ñíi á templo,
mot te á dzaa ñí ntólo;
mot te a tɔɔ́ mbóbók atéé ye ábum ñiá.
3 Niané mot te a ngá yén Pedro bá Juan ná bé nkún ke ñíi á templo á ŋga dzaa bɔ́ ntólo.
4 Éyɔŋ te Pedro bá Juan bé ngá bem ñí mís,
ané Pedro a ngá dzó ñí ná:
“Dággé bía.”
5 Éde a ngá túga bɔ́ bem mís,
eé bwíni ná aa ye ñɔŋ dzóm enziŋ ébe bɔ́.
6 Ané Pedro a ngá dzó ñí ná:
“Mĕé belé ngoós ngé ki koŋ,
ve,
é dzóm me belé édɔ ma vé wa;
ya éyola Yesukristo ye á Nasaret,
tébegé o wulu.”
7 Ané Pedro a ngá biñ ñí é wéá meyóm,
a téle ñí;
éde etéññ te ébyen mébɔ mot te ya memvɔ́ŋlé bí ngá mana yém.
8 Éde a ngá vala ósí a tébe ya mebɔ,
á ŋga wulu,
ané a ngá ñíi bábe bɔ́ á templo;
eé wulu,
eé yóo,
eé lugu fe Nzamá.
9 Éde bot bése bé ngá yén ñí eé wulu,
eé lugu fe Nzamá.
10 Ané bé ngá yem fe ñí ná,
éñe a mbé é mot a ngá bɔ eé tɔbɔ á mbéñ ósí templo bá lwée ná Mbamba Mbéñ ná á dzaa bot ntólo.
Éde bot bése bé ngá bíra voŋbe ya áyágán é dzam é ngá bɔ mot te.
Pedro aa kɔ́bɔ ya bot á templo
11 É mot a ngá séñban,
ákoan ná a ngén a kárán ya Pedro bá Juan,
éde bot bése bé tɔɔ́ avoó bé ngá dzíga ke dzéñ á yát été bá lwée ná éñí Salomón,
é vóm bé mbé.
12 Niané Pedro a ngá yén dɔ,
éde a ngá síli bot ná:
“Á befám béye Israel,
amú dzé mína ku avoó ya é dzam dí,
amú dzé ki mína bem bía mís amvála ané ngé é nguu dzeá ya bébélá nyébé wea édɔ é bɔ ná é mot ñí á wulu?
13 É Nzamá Abraam,
Isaak,
ya Jakob;
ya é Nzamá bétará,
éñe a vé yaá é Mwán weñ Yesus dúmá;
éñí míní ngá kee,
míní tep fe ñí ébe ású Pilato,
é tɔɔ́ ná Pilato a ngá kík nsaŋ ná a dzáma ñí.
14 Ve,
míní ngá tep Mfúfúp ya Nzósoó Mot.
Ané míní ngá dzaa ná bé dzáma mína nywíñbot.
15 Éde míní ngá ywíñ éñí a ne Mvele Eniŋ,
éñe Nzamá a wómo yaá á miwúán été.
Bía bí ne dzam te bengañiá.
16 É dzam é bɔ ná é mot mína yem míní téa fe ñí,
ná á ñɔŋ nguu,
é ne mbwínánn ébe éyola Yesus.
Mbwínánn te,
éwɔ ó vé ñí mvwaá áse ébe ású mína bésesé.”
17 “Áwola dí,
á bɔbédzaŋ ma yem ná míní ngá bɔ dɔ ákála ndzímán,
ntéññ mbɔ́ɔ́ fe bétébosú benan.
18 Ve,
amvála te édɔ Nzamá a ngá dzálá édí a ngá tára kat fwéñ kaa ná é bɔ ébe ánu bekúlu medzó bése,
ná é Kristo weñ a ngá yian dzuk.
19 Édɔ é ne ná,
dzobgán,
tsénŋán fe milém,
á mfá ye ná mísémm myenan mí tɔbɔ ntsamann;
véa,
ébe ású Ntí,
metám mé awaabé má ye mína sɔ́;
20 Nzamá á lóm fe mína Kristo Yesus,
éñí a ngá tára mína kyaa.
21 Kristo te,
éñe dzóp é ngá yian tára ñɔŋ,
akekwíñ métám mam mése má bera tɔbɔ nkomann,
émá Nzamá a ngá kɔ́bɔ ébe ménu mítɔ́pbán bekúlu medzó myeñ atéé ye métám méye ókuá.
22 Moisés aá kɔ́bɔ bébélá ná:
‘Ntí é Nzamá wenan,
aa ye mína téle nkúlu medzó amvála ané ma,
eé sɔ́ énzénzaŋ bɔbéñɔŋ benan.
Nkúlu medzó te éñe mína ye béá é mam mése aa ye mína kɔ́bɔ.
23 Ané dá ye bɔ ná,
é mot áse aa ye bɔ kaa áwók nkúlu medzó te,
mot te bá ye ñí vea áyɔŋ été.’ ”
24 “Éde,
atéé ye ébe Samuel ya bíyian byéñ ósú,
bekúlu medzó bése bé kat yaá fe fwéñ mélú má.
25 Mína míní ne é bwán bekúlu medzó ya ébá béye élat Nzamá a ngá bɔ ya bímvámvámm byenan,
eé dzó Abraam ná:
‘Ébe é mvɔŋ dzwe,
meyɔŋ mése méye é sí ñí,
má ye ñɔŋ bibwárán.’
26 Nzamá a ngá wómo é Mwán weñ,
éde a ngá tára mína ñí lóm ná á vé mína abwará,
eé bɔ ná kada mot ye ébe mína á lúm mbéa be mam meñ mvús.”