Yesus aa yéne ébe béyága zaŋgbéá béye áabeñ
21
Nia véa,
ané Yesus a ngá bera yéne ébe béyága beñ á máŋ méye á Tiberias.
Éde a ngá yéne ámvála dí;
Jesús en el mar de Galilea (Juan 21.1-25)
2 bé mbé vóm mbɔ́ɔ́ ná,
Simón Pedro,
ya Tomás (éñí bé ngá lwée ná Mbyás),
ya Natanael (mot ye á Kaná ye á Galilea),
ya ébá Zebedeo,
ya beyága Yesus bé beáñ befé.
3 Véa éñe Simón Pedro a ngá dzó bɔ́ ná,
“Ma ke míyéŋ mí kwaás!”
Ané bá bé ngá dzó ñí ná,
“Bía bía ke fe bíabe mína.”
Éde bé ngá ke bé daŋ á byéa été.
Ve alú te ébɔ́ kaa áywíñ dzóm enziŋ.
4 Éde,
éyɔŋ kírí e ngá ke da léne,
Yesus á ntéle á nsá máŋ;
ve beyága ébɔ́ kaa áyem ná Yesus éñe ñí.
5 Ané Yesus a ngá síli bɔ́ ná,
“Á bɔ́ŋŋ,
ye míní belé ayomm kwaás enziŋ?”
Éde bé ngá yalan ya ñí ná,
“Kaa.”
6 Éde a ngá dzó bɔ́ ná,
“Weagán avwát mfá meyóm mé byéa,
mína ye biñ.”
Ané bé ngá wea dɔ,
ébɔ́ kaa fe ya nguu ye ádulu dɔ,
amú abwiññ kwaás.
7 Véa éñe,
nyága Yesus a ngá dziŋ a dzó Pedro ná,
“A ne Ntí!”
Niané Simón Pedro a ngá wók ná a ne Ntí,
á ŋga kom elíŋŋá,
(akála ná a mbé kaa dɔ),
véa éñe émyen a ngá wea ñúu óswíñ.
8 Ve béyága bevɔ́ɔ́ bá bé ŋga bee ñí á byéa été,
béé nzu bá dulu avwát é tɔɔ́ ndzálánn ya kwaás,
amú ná bĕé mbé sí oyaáp,
ve fáve ané táŋ ntet bemetro.
9 Véa,
niané bé ngá sís ó sí,
bé yén mekak mé ndúán mé tɔɔ́ nkomann,
kwaás e bóo mɔ áyóp ya mfémm.
10 Ané Yesus a ngá dzó bɔ́ ná,
“Nzaán ya ma ya kwaás ye éñí míní ndem áywíñ.”
11 Éde Simón Pedro a ngá daŋ á byéa,
á ŋga dulu avwát ó sí,
é tɔɔ́ ndzálánn ya bora bé kwaás,
táŋ ntet kwaás ya kwaás mewóm mé tán ya kwaás é léa (153);
afáŋbɔ ná kwaás e mbé ededea abwiññ,
avwát deé ndzí ñaba.
12 Ané Yesus a ngá dzó bɔ́ ná,
“Nzaán ádzí!”
Nyága enziŋ eé ndzí nzomo ná a síli ñí ná,
“O ne nzá?”
Amú bé ngá yem ná a ne Ntí.
13 Véa éñe Yesus a ngá sɔ́,
a twáa mfémm,
a kee bɔ́ wɔ,
amvála te fe a ngá bɔ ya kwaás.
14 Édí te édɔ é mbé éyɔŋ léa Yesus a ngá yéne ébe béyága beñ,
ákoan ná a wómo yaá míwúán été.
Yesus bá Pedro
15 Éde,
niané bé ngá mana dzí,
ané Yesus á ngá síli Simón Pedro ná,
“Á Simón é mwán Juan,
ye wa dziŋ ma álot ébá?”
Éde a ngá dzó ñí ná,
“Ãá,
á Ntí wa yem ná ma dziŋ wa.”
Ané Yesus a ngá dzó ñí ná,
“Baalé mítómá myam!”
16 Éde a ngá bera ñí dzó éyɔŋ beáñ ná,
“Á Simón,
é mwán Juan,
ye wa dziŋ ma?”
Ané a ngá yalan ya ñí ná,
“Ãá,
á Ntí,
wa yem ná ma dziŋ wa.”
Éde Yesus a ngá dzó ñí ná,
“Tugá baale mítómá myam!”
17 Ané a ngá bera ñí dzó éyɔŋ léa ná,
“Á Simón é mwán Juan,
ye wa dziŋ ma?”
Véa éñe Pedro a ngá tɔbɔ ya eywiññ,
amú Yesus a ngá bera ñí síli éyɔŋ léa ná,
“Ye wa dziŋ ma?”
Éde a ngá yalan ya ñí ná,
“Á Ntí,
wa yem dɔ ásesé.
Wa yem ná ma dziŋ wa.”
Ané Yesus a ngá dzó ñí ná,
“Baale é bwann mítómá bam.
18 Ma dzó wa bébélá ya bébélá ná,
éyɔŋ ó mbé ndómán,
o ngá bwára wámyen,
o ngá wulu fe é vóm wa kómo.
Ve eyɔŋ ó ntɔɔ́ nnomm,
wa ye sám bínam bywe,
véa mot mfé éñe aa ye wa bwára byém,
éñe á ŋga ke ya wa é vóm wăá kómo.”
19 (A ngá dzó dzam te ná,
aa lére nzaá ámvála awú Pedro aa ye wú ná aa vé Nzamá dúmá.)
Niané a ngá dzó dɔ,
véa éñe a ngá dzó ñí ná,
“Beegé ma!”
Yesus bá nyága weñ a ngá bíra dziŋ
20 Éde Pedro a ngá veŋan a yén nyága Yesus a ngá dziŋ eé bee bɔ́ (éñí a mbé a yága Yesus ó twíñ,
éñe fe á ngá síli ñí ná,
“Á Ntí,
nzá aa ye wa kuan?”,
éyɔŋ bé ngá dzí bidzí bíye alú.)
21 Éde niané Pedro a ngá yén ñí,
véa éñe a ngá dzó Yesus ná,
“Á Ntí,
éñe ñí á yá?”
22 Ané Yesus a ngá yalan ya ñí ná,
“Dzé é ne wa été?
Ngé ma kómo ná á lígi a tɔɔ́ akekwíñ é tám ma ye sɔ́.
Wa,
beegé ma!”
23 Ya dzam te édɔ,
édí te é ngá mana ñeŋ énzénzaŋ bɔbédzaŋ ná,
nyága te ăá ye fe wú.
Ve Yesus ñí eé ndzí ñí dzó ná,
ăá ye wú;
ve fáve ná,
“Ngé ma kómo ná á lígi a tɔɔ́ akekwíñ é tám ma ye sɔ́,
dzé é ne wa été?”
Édí dá súgan
24 Nyága te éñe aa vé é mam má ngañiá,
éñe fe aá tsili dɔ;
bía bía yem fe ná é ngañiá weñ a ne bébélá.
25 Éde,
abwiññ mam afé dá é ne fe ná,
Yesus aá bɔ,
émá mé ne ná ngé bé tsili kada dzam ye été,
ma tém ná atwaa eniŋ ngúrá ébyen dá dĕé mbé ki kɔk ábímm mítsili míte.