Mitéteák ya mingungúú
14
Ñɔŋŋán éñí a ne ntéteák á mbwínánn kaa ábɔ ya ñí mikéá.
2 Ngúrá mot wá bwíni ná ó ne dzí byém bíse,
ve éñí a ne ntéteák,
aa dzí fáve bilwá.
3 Éñí aa dzí,
a táa byana éñí a ne kaa ádzí;
éde éñí a ne kaa ádzí,
a táa kík éñí aa dzí nsaŋ,
amú ná Nzamá a ñɔŋ yaá ñí.
4 O ne nzá ná wa kík éyá mbɔ biséññ ye á ndá misaŋ?
Mfá é mása weñ a téle ngé ki ná aa ku;
aa ye lígi a téle tételé,
amú ná mása a ne nguu ye átéle ñí tételé.
5 Éde,
ngúrá mot wá kík nsaŋ ná mos enziŋ wá daŋ éwí mbɔ́ɔ́ ya eban,
éñí mbɔ́ɔ́ ñí aa kík nsaŋ ná mos míse mí ne amvála avɔ́ɔ́.
Kada mot á túga yébe édí é ne ñí ósímánn weñ été.
6 Éñí aa baale ngúrá mos,
aa baale wɔ́ á mfá Ntí [éñí ñí ăá baale ngúrá mos,
ăá baale wɔ́ á mfá Ntí].
Éñí ñí aa dzí,
aa dzí á mfá Ntí,
amú ná aa vé Nzamá akíba.
Éñí a ne kaa ádzí,
aa ki bidzí á mfá Ntí,
aa vé fe Nzamá akíba.
7 Amú ná mot enziŋ ye ébe bía ăá niŋ mfá weñ émyen,
mot enziŋ ñí ăá wú ki fe mfá weñ émyen;
8 éde ngé bía niŋ,
bía niŋ á mfá Ntí;
ngé bía wú ki,
bía wú mfá Ntí;
éde ná,
a ne bɔ ná ngé bía niŋ,
a ne ki bɔ ná ngé bía wú ki,
bí ne ébá Ntí.
9 Amú ná akála te édɔ Kristo aá wú,
aá niŋ fe,
á mfá ye ná á bɔ Ntí ané ébá bé ne míwúán ané ébá bé ne betétéá.
10 Ve wa,
amú dzé wa kík mwanñɔŋ nsaŋ?
Ngé ki ná,
á wa,
amú dzé wa byana mwanñɔŋ?
Amú ná bía bésesé bía ye ke tébe ébe ású étɔɔ́ nkíkgán misaŋ Nzamá.
11 Amú é ne ntsilann ná:
“Ntí aa dzó ná,
ma niŋ,
éde abɔ́ŋŋ ése dá ye kútbe ébe ású dam,
dém ése dá dá ye fe mem Nzamá”.
12 Édɔ é ne ná,
kada mot ye ébe bía aa ye vé Nzamá táŋ mfá weñ émyen.
13 Édɔ fá ná,
bí kaa ábera kík misaŋ bevɔ́ɔ́ ya ébá bevɔ́ɔ́,
fáve ná bí belégé nkíkgán nsaŋ wí ná,
kaa ábwíi mwadzaŋ enziŋ é dzóm aa vus ya dɔ nzenn,
ngé ki é dzam dá bɔ ñí ná á ku.
14 Éde ma yem,
me tɔɔ́ fe ya mebúnn ébe Ntí Yesus ná dzóm enziŋ é sés eki ébe ébyen;
fáve mfá éñí aa ñɔŋ ná dzóm te é ne eki,
á mfá mot te émyen éñe é ne eki.
15 Amú ná ngé mwanñɔŋ aa tɔbɔ eywiññ ákála bidzí,
véa wĕé tɔɔ́ fe niŋ édziŋŋ été.
O táa bɔ ná éñí Kristo a ngá wú ya akála deñ á dzáŋ ya bidzí bywe.
16 Édɔ ná,
míní táa lík ná bé kɔ́bɔ abé édí é ne mvéáñ mfá wenan.
17 Amú ná édzwée ngɔ́mán Nzamá é sés bidzí ngé ki meñú,
fáve nzósoó,
mvwaá ya mesán á Mfúfúp Nsísim été.
18 Amú ná é mot aa séan ya Kristo amvála te,
aa vé Nzamá nlém mesán,
bot bá bá sák fe ñí.
19 Édɔ véa,
bí dzéŋŋán ya nlém ósesé é mam má vwála á mfá mvwaá ya ávé bot nguu énzénzaŋ dea.
20 O táa tsam éséññ Nzamá ákála bidzí.
Ngúrá mfá,
byém bíse bí ne mifúbánn,
ve mfá mbɔ́ɔ́,
é ne abé ná mot a bɔ ná éñí mbɔ́ɔ́ á ku á nsémm ya bidzí.
21 É ne mvéáñ ná mot á bɔ kaa ádzí tsít,
kaa áñú vino,
kaa ki ábɔ é dzam dá bɔ ná mwanñɔŋ á ku á nsémm.
22 Mbwínánn o belé,
baale wɔ́ mfá we ósú Nzamá.
Mvɔmm ya éñí a ne kaa ávé émyen meku ébe édí aa ñɔŋ ná é ne mvéáñ.
23 Ve,
éñí aa dzí eé yep,
aa vé émyen meku,
amú ná ăá bɔ dɔ ya mbwínánn;
éde édí ése dá bá bɔ kaa mbwínánn,
é ne nsémm.