Átɔbɔ édzwée ngɔ́mán ásí
13
Mot áse á kpá bidzwée bí ne ñí áyóp ásí,
amú ná edzwée enziŋ é sés ná é sés édí Nzamá;
ve ébí bí ne Nzamá éñe á ngá téle byɔ.
2 Édɔ ná,
éñí a ne edzwée á ngamm áyát,
édí Nzamá a téle yaá édɔ ñí aa sóán ya dɔ;
ébá bá bá ke á ngamm áyát,
bébyen bá ñɔŋ mekira.
3 Amú ná bedzwée bé sés ekɔwɔŋŋ á mfá é mot aa bɔ mbeŋ,
fáve éñí aa bɔ abé.
Ye wa kómo bɔ kaa ákɔ edzwée wɔŋŋ?
Bɔɔ́ge édí é ne mvéáñ,
véa edzwée dá ye wa sák;
4 amú ná mvwála bíséññ Nzamá a ne á mfá é mvéáñ dwe.
Ve ngé wa bɔ abé,
kɔge wɔŋŋ;
amú ná ĕé belé nzwaokeŋ á nzeze,
akála ná a ne mvwála bíséññ Nzamá ná á vé akunŋa á mfá é mot aa bɔ abé.
5 Ya amú dzam te,
dá yian ná mína ku edzwée ásí,
se fáve akála akira,
ve ya fe akála ósímánn ye á nlém.
6 Ya amú dzam te fe mína yáán mfóŋsí,
amú ná bedzwée bé ne bébɔ biséññ Nzamá,
édɔ fe bá bá bɔ ntéññ éniŋ.
7 Yáágán ya mot áse é mvólá míní belé ñí;
éñí mfóŋsí,
mfóŋsí;
éñí meyáán,
meyáán;
éñí wɔŋŋ,
wɔŋŋ;
éñí ngaŋŋ,
ŋgaŋŋ.
8 Míní táa belé mot enziŋ mvólá,
fáve ná dziŋŋán bevɔ́ɔ́ ya ébá bevɔ́ɔ́;
amú ná é mot aa dziŋ éñí mbɔ́ɔ́,
a dzálá yaá atsiŋŋ.
9 Amú ná édí:
“Wăá ye bɔ medzíán,
wăá ye ywíñ,
wăá ye dzip,
wăá ye ñamle”,
é mvéná ése evɔ́ɔ́,
dá súgan ya édí:
“Wa ye dziŋ é mot mbɔ́ɔ́ amvála ané wa dziŋ wámyen”.
10 Édziŋŋ dăá bɔ é mot mbɔ́ɔ́ abé;
éde edziŋŋ édɔ é ne ndzálánn atsiŋŋ.
11 Ébe dzam te,
míníí yem é tám ñí,
amú ná á ntɔɔ́ áwola bá vee óyó,
akála ná ákoroga dea é ntɔɔ́ bebeñ áwola dí álot é tám bí ngá tára bwíni.
12 Alú é ntɔɔ́ oyaáp,
kírí da eé ntɔɔ́ bebeñ;
édɔ ná bí veagán mibɔann míye ó dzíbi,
bí bwátgán mengéá méye éyéá.
13 Bí niŋŋán á ngaŋŋ été,
amvála ané éyéá été,
se á mbéa mefét bá yénán befám ya biningá,
ya áfían meywa;
se nsémm eveák,
ngé ki áyénán biningá endendea,
se á mitéé,
ngé ki abéánn.
14 Fáve ná,
Ntí Yesukristo á tɔbɔgé ndzálánn ébe mína,
kaa dzéŋŋán ki ná míní dzálá bívéé bíye á nlém mot.