Mfefeñ éniŋ
12
Édɔ ná,
á bɔbédzaŋ,
ma lép mína á mfá nyénánn engóngɔ́ɔ́ Nzamá ná télegán mína bébyen amvála ané ntétéá mótúnŋa ya eki,
émɔ Nzamá aa sán ya mɔ,
édɔ é ne ñá nkaŋann Nzamá.
2 Kaa niŋŋán amvála ané bot béye é tám ñí,
fáve ná tsénŋán mína bébyen ya nzenn ye á mfefeñ atémŋa denan,
véa éñe mína ye lére nkómánn Nzamá,
éwí ó ne mvéáñ,
ya ávé mesán ya fe tételé.
3 Amú ná,
ya ébe é mvɔmm bé vé yaá ma,
ma dzó kada mot ye ébe mína,
ná a táa ñɔŋ ná éñe a ne ya eban álot ábímm dá yian,
fáve ná á ñɔŋŋe dɔ ya mbamba kén,
ya ábímm mbwínánn Nzamá a vé yaá ébe kada mot.
4 Amú ná amvála ané ó ñúu fɔ́ɔ́ bí belé abwiññ mesúk mé ñúu,
ve mesúk mé ñúu mése mĕé belé amvála eséññ avɔ́ɔ́,
5 amvála te bía bí tɔɔ́ abwiññ,
bí ne ñúu fɔ́ɔ́ ébe Kristo,
kada mot ye ébe bía ñí a ne ásúk ñúu ébá bevɔ́ɔ́.
6 Édɔ é ne ná,
bíí belé bivévé myá selan amvála ané é mvɔmm bé vé yaá bía;
ngé éwí nkúlánn medzó,
ábelan ya wɔ́ amvála ábímm mbwínánn dwe ó ne.
7 Ngé éwí ábɔ eséññ Nzamá,
ábelan ya wɔ́;
ngé ki éwí áyágale,
á yágalé;
8 ngé mvɔmm ye mfoŋann mílém,
á foŋŋe;
éñí aa vé,
ya añep;
éñí aa dzwée,
á dzwéegé ya akéŋŋ áse;
éñí a belé nyénánn engóngɔ́ɔ́,
á bɔɔ́ge dɔ ya mesán.
É mam Krísten aa yian bɔ
9 Edziŋŋ é bɔɔ́ge kaa meduk;
míníí víni ekúkwát,
biñŋán édí é ne mvéáñ.
10 Ábelé edziŋŋ bɔbéñafwáa bevɔ́ɔ́ ya ébá bevɔ́ɔ́;
á mfá ngaŋŋ,
míní tára téle é bot bevɔ́ɔ́ ósúá;
11 ébe édí dá dzaa akéŋŋ áse,
míní táa bɔ andeát;
áséan ya Ntí ya nlém ósesé;
12 ébe oyan,
míníí sán;
ébe midzuúk,
míníí nzomo;
ébe méyaglán,
míníí tɔbɔ mbán;
13 míníí vwála ébe é mam má yi á mfá bebwíni,
míníí ñɔŋ beyéŋ.
14 Abwará ya é bot bá dzéŋ mína ásí,
váán abwará kaa váán bɔ́ biboŋ.
15 Sánŋán ya ébá bá sán,
yigán fe ya ébá bá yi.
16 Belégán amvála ósímánn ovɔ́ɔ́ ébe bevɔ́ɔ́ ya ébá bevɔ́ɔ́;
kaa ábélán mína bébyen ó yóp ásímánn denan été,
fáve ná tɔbɔgán mfulán ya ébá bé ne nsilann ósí.
Míní táa bɔ miyemann ásímánn denan été.
17 Kaa ábúlu ya mot enziŋ abé ya abé;
dzéŋŋán ná míní bɔ édí é ne mvéáñ énzénzaŋ bot bése.
18 Ngé é ne bɔban,
á mfá wenan,
tɔbɔgán mvwaá ya bot bése;
19 Á mindzindziŋŋ,
kaa kunŋán mína bébyen,
fáve ná váán afóo á mfá méyéá Nzamá,
amú é ne ntsilann ná:
“Akunŋa é ne éedam;
ma ye búlu ntáŋ”,
Ntí éñe aa dzó.
20 Fáve ná:
“ngé nzínzíŋŋ we wá wók nzeñ,
vá ñí bidzí;
ngé aa wók ki evéé,
vá ñí ná áñú;
amú ná weé bɔ néa,
wa ye ñí koman mekak mé ndúán á nló áyóp.”
21 Abé,
édɔ é táa wa wún,
fáve ná wúnŋe abé ya mbɔann mbeŋ.