Ámvála Nzamá aa koman mam
11
Éde ma síli,
ye ná Nzamá a tep yaá áyɔŋ deñ?
É sés bɔban amvála enziŋ!
Amú ná ma me ne fe mwann Israelita,
mot ye é mvɔŋ bot Abraam,
ébe áyɔŋ Benjamín.
2 Nzamá eé ndzí tep áyɔŋ deñ,
édí a ngá tára yem.
Ye mínăá yem ki édí Mitsili myá dzó á mfá Elías,
ámvála a ngá lére ósú Nzamá míkéá myeñ ya Israel,
eé dzó ná:
3 “Á Ntí,
bé ywíñ yaá békúlu medzó bwe,
bé tsam yaá fe mé altar mwe;
éde ma etámm me lígi yaá,
bá dzéŋ fe éniŋ dzam ásí?”
4 Ve déá,
éyalann Nzamá dá dzó ñí á yá?
“Mámyen me kána yaá á mfá wɔm bot táŋ binzuk zaŋgbéá ébá béé ndzí kút Baal mebɔ́ŋŋ.”
5 Amvála te fe é tám ñí,
bit bot dá é ntɔɔ́ fe ámvála ntɔ́pbán mvɔmm ó ne.
6 Ve,
ngé é ne ákála mvɔmm,
dá deé sés fe éndagá amú mibɔann;
ngé éñe é bɔ néa,
ngé mvɔmm da deé sés ki fe mvɔmm.
Ngé ákála mibɔann dá deé sés fe mvɔmm;
ngé éñe néa,
mibɔann mí sés fe mibɔann.
7 Éde á yá?
Édí Israel aa dzéŋ eé ndzí koan ya dɔ;
ve ébá bé ne mitɔ́pbán ébɔ́ bé koan ya dɔ,
éde ébá bevɔ́ɔ́ bá bá tɔbɔ ya milém aleét.
8 Amvála ané é ne ntsilann ná:
“Nzamá aá vé bɔ́ nsísim ndzemm,
é mís mé ne kaa áyén,
ya melɔ́ mé ne kaa áwók,
anzukwíñ mos ye émuú.”
9 David ñí aa dzó fe ná:
“Méfét meba mé veŋan bɔ́ asimá ya olám,
Ekɔp obaá ya fe ntáŋ mfá weba.
10 Dzíbi é kpá bɔ́ á mís ná bé bɔ kaa áyén.
É mvús deba da eé tɔbɔgé fe bɔ́ é viri tám áse.”
11 Éde ma síli ná:
Ye ná béé ndzí kɔp á mfá ye ná bé ku?
É sés bɔban amvála enziŋ!
Fáve ná amú ntsamann metsiŋŋ weba ákoroga é sɔ́ yaá ébe meyɔŋ mefé,
á mfá ásɔŋ bɔ́ ya abéánn.
12 Édɔ ná ngé ntsamann metsiŋŋ weba ó ne ntam á mfá éniŋ ngúrá,
ádzímlé deba dá ntam ébe meyɔŋ mefé.
Ntéññ avé ndzálánn mvɔmm weba!
13 Ve ma kɔ́bɔ ya mína,
meyɔŋ mefé,
dá é tɔɔ́ ná me ne ápostol meyɔŋ mefé,
meé vé fe éséññ Nzamá dam ngaŋŋ,
14 ná ngé me ne sɔŋ áyɔŋ dam ya abéánn,
ngé bot benziŋ béye été bé ne tɔbɔ nkoránn.
15 Amú ná ngé atsílánn deba dá bɔ ná eniŋ ngúrá é bera belé elat;
dzé dá ye bɔban ñɔŋŋán weba,
ye se fáve eniŋ mfá bewú?
16 Éde,
ngé ngap ósúá e ne eki,
ñúu ése dá e ne fe dɔ;
ngé ndzi ó ne eki,
mitem myá mí ne fe dɔ.
17 Ve ngé mitem minziŋ myá kíkban,
éde wa o tɔɔ́ elé olíba ye áfan,
bé sɔ́ wa bem énzénzaŋ nkuk weba wa o ntɔɔ́ fe ñɔŋngap ye á mbamba mendzímm má sɔ́ mídzi mí ñá elé olíba,
18 wá kaa ábɔ engúŋ ya mítem;
ve ngé wa bɔ engúŋ,
se wa wa yála midzi,
fáve ná midzi émyɔ myá yála wa.
19 Ve déá,
wa ye dzó ná:
“Mitem myá kíkban á mfá ye ná ma me tɔbɔ mbemann á nkuk”.
20 Éde véa,
bá kík myɔ amú é kaa mbwínánn weba,
ve wa o téle akála mbwínánn.
O táa bɔ engúŋ!
Fáve ná ákɔ wɔŋŋ;
21 amú ná ngé Nzamá eé ndzí dzɔgɔ beñá mitem,
wa ăá ye ki dzɔgɔ.
22 Dággé fá áñep ya é ngét Nzamá;
ngét mfá ébá bé ngá ku,
ve ésós Nzamá dá á mfá we,
ngé wa tɔbɔ ésós deñ été;
ngé se néa wa wa ye fe tɔbɔ nkíkgán.
23 Ve,
á mfá ébɔ́,
ngé bá ye bɔ kaa álaŋan átɔbɔ kaa ábwíni,
bá ye bɔ́ bem á nkuk,
amú ná Nzamá a belé nguu ye á bera bɔ́ bem.
24 Amú ná ngé wa é mot bá kík ébe elé olíba ébyen ye áfan,
bé sɔ́ wa bem ébe ñá elé olíba,
édí dăá yian,
ntéññ avé ébá bébyen bé ne beñá mitem,
bá ye bɔ́ bem ébe á nkuk olíba weba bébyen?
Israel áse aa ye tɔbɔ nkoránn
25 Á bɔbédzaŋ,
măá kómo ná míní dzími é dzam dá nzaman kén mot dí,
á mfá ye ná míní nzá vága ye á nyemann wenan,
é ne ná:
ábímm áleét nlém é kwíñ yaá ébe Israel,
dá ye tɔbɔ akekwíñ ané nɔmɔ bot béye meyɔŋ mefé dá yian aa ye mana ñíi.
26 Éde véa,
Israel áse aa ye tɔbɔ nkoránn;
amvála ané é ne ntsilann ná:
“Mvé bot filí aa ye sɔ́ á Sión;
aa ye vea abé ébe Jakob.
27 Éde élat dam bíabe bɔ́,
édɔ dí é tám ma ye vea mísémm myeba.”
28 Á mfá mbamba fwéñ,
bé ne minzínzíŋŋ ákála denan;
ve á mfá ntɔ́pbán Nzamá,
bé ne mindzindziŋŋ akála beéséá;
29 amú ná dás ya ékígá Nzamá ăá bera byɔ vea.
30 Édɔ ná,
amvála ané mína míní ngá tára bɔ Nzamá melɔ́,
ve éndagá míní koan yaá ya mvɔmm akála melɔ́ meba,
31 ntéññ mbɔ́ɔ́ fe éndagá,
bá bé bɔ yaá melɔ́,
á mfá ye ná nyénánn engóngɔ́ɔ́ Nzamá a lére yaá wa,
ya fe ná éndagá,
bá a lére fe nyénánn engóngɔ́ɔ́.
32 Amú ná Nzamá aá dzili bot bése á melɔ́ été,
á mfá ye ná á lére fe bésesé mvɔmm.
33 Nzá ámvála nnén ntam,
ya é kén,
ya nyemann Nzamá bí né!
Nzá ayéñ é ne ná bé yem nkíkgán misaŋ weñ,
ya ndzuúk ye áyem ménzenn meñ!
34 “Nzá fá a yem yaá ósímánn Ntí?
Nzá ki a bɔ yaá mvé melépgá weñ?
35 Ngé ki ná nzá a tára yaá ñí vé,
á mfá ye ná ñí á bera ñí búlán.”
36 Amú ná ébe éñe,
ya ákála éñe,
ya mfá éñe,
mam mése mé né.
Éñe á bɔɔ́ge ya dúmá kɔ́mm áse.
Amén.