Israel bá mbamba fwéñ
10
É bɔbédzaŋ bam,
é dzam ma yén mvéáñ á nlém wɔm ya méyaglán mam ébe Nzamá akála deba,
é ne á mfá akoroga.
2 Amú ná ma vé ngañiá mfá weba ná bé ne abéánn ébe Nzamá,
ve se á mfá nyemann;
3 amú ná bá kaa áyem é nzósoó Nzamá,
béé dzéŋ ná bé téle é nzósoó weba bébyen,
bá kaa fe áku é nzósoó Nzamá ásí.
4 Amú ná atsiŋŋ dá súgan ébe Kristo mfá nzósoó ébe é mot áse aa bwíni.
5 Amú ná mfá nzósoó ye átsiŋŋ,
Moisés aa tsili ná:
“É mot aa bɔ é mam má,
émɔ aa ye niŋ ya mɔ.”
6 Ve é nzósoó ye á mbwínánn,
aa dzó aaná:
“O táa síli á nlém we été ná:
‘Nzá aa ye bét á dzóp été?’ ”
(Dzam te dá sili Kristo ásí).
7 “Ngé ki ná:
‘Nzá aa ye sigi édwá dzíbi ósí?’ ”
(Dzam te dá sɔ́ ya Kristo á miwúán été).
8 Éde,
aa dzó á yá?
“Efíá é ne wa bebeñ,
ánu dwe ya fe á nlém we été.”
Édɔ é né,
éfíá ye á mbwínánn bía kat fwéñ,
9 ná:
Ngé wa mem ya ánu dwe ná Yesus éñe a ne Ntí,
o bwíni fe á nlém we été ná Nzamá aá wómo ñí á miwúán été,
wa ye tɔbɔ nkoránn.
10 Amú ná bá bwíni ya nlém á mfá nzósoó,
anu édɔ dá bá mem ya dɔ á mfá akoroga.
11 Mitsili myá dzó fá ná:
“Éñí áse aa bwíni ñí,
ăá ye wú osoán.”
12 Amú ná nzelann e sés ébe mwann Judio bá mwann Griego;
Ntí fá a ne Ntí bésesé,
eé bíra bwárán ya ébá bésesé bá yónán ya ñí;
13 amú ná:
“Éñí áse aa yónán ya éyola Ntí aa ye tɔbɔ nkoránn.”
14 Bá ye fá yónán ya éñí béé ndzí bwíni á yá?
Bá ye fá bwíni éñí béé ndzí wók á yá?
Bá ye ki béá á yá kaa é mot aa kat bɔ́ fwéñ?
15 Éde ngé băá lóm bɔ́,
bá ye ki kat fwéñ á yá?
Amvála ané é ne ntsilann ná:
“Nzá mvéáñ e ne ya mebɔ ébá bá kat mbamba fwéñ édí é ne mvéáñ!”
16 Ve déá,
se bésesé ébɔ́ bé ngá bɔ mbamba fwéñ mewók.
Amú Esaía aa dzó ná:
“Á Ntí,
nzá a bwíni yaá é fwéñ dea?”
17 Édɔ é ne ná,
mbwínánn wá sɔ́ amú nwókgánn,
ve á nwókgánn amú éfíá Kristo.
18 Ve,
ma ma síli ná,
ye ná béé ndzí wók?
Bébélá a ne ná bá wók:
“É kíŋŋ deba dá é mana wɔ́gɔ ébe sí áse,
éfíá deñ dá é mana fe wɔ́gɔ akekwíñ mevóm mése bot bé tɔɔ́.”
19 Ve ma síli ná:
Ye ná Israel ĕé ngá yem?
Édí ósúá,
Moisés aa dzó ná:
“Ma ye mína sɔŋ abéánn ya áyɔŋ é sés ayɔŋ,
ya ébe áyɔŋ é ne kaa kén,
ma ye mína sɔŋ ya meyéá.”
20 Éde,
Esaía ñí aa kɔ́bɔ fe ya aywá,
eé dzó ná:
“Ébe ébá bé mbé kaa ma ádzéŋ,
bá koan ya ma;
Maá yéne ébe ébá
bé mbé kaa ásíli á mfá wɔm.”
21 Ve á mfá Israel,
aa dzó ná:
“Ngúrá ntéññ mos me sám yaá é mó mam
ébe áyɔŋ é ne melɔ́ é tɔɔ́ fe ma á ngamm áyát.”