Nsísim wá vé bía eniŋ
8
Édɔ ná,
éndagá meku menziŋ mé sés mfá é bot bé ntɔɔ́ ébe Kristo Yesus,
[é bot bé ne kaa áwulu amvála ané nkómánn ye mot binam,
fáve amvála ané nkómánn ye á Nsísim éwɔ ó ne.]
2 Amú ná atsiŋŋ eniŋ ye á Nsísim ébe Kristo Yesus é tɔɔ́ yaá wa filí átsiŋŋ ye á nsémm ya édí ye áwú.
3 Amú ná édí atsiŋŋ dĕé mbé bɔ,
dá é tɔɔ́ ná eniŋ mot dá vé atsiŋŋ ateák,
Nzamá éñe a bɔ yaá dɔ eé lóm é Mwán weñ émyen,
éfonann mot mbɔ nsémm,
ya akála nsémm,
vé nsémm méku ébe mot binam.
4 A ngá bɔ dɔ á mfá ye ná é nzósoó atsiŋŋ á dzálában ébe bía,
bía é bot bĭá wulu amvála ané nlém mot wá kómo,
fáve amvála ané Nsísim wá kómo.
5 Amú ná ébá bá niŋ amvála ané nlém mot wá kómo,
bá síman mam méye éniŋ mot;
ve,
ébá bá niŋ amvála ané Nsísim aa lére,
bá é mam Nsísim.
6 Amú ná ábwíi osímánn ébe mam méye éniŋ mot,
é ne awú;
ve ábwíi osímánn á Nsísim,
é ne ñá eniŋ ya mvwaá;
7 édɔ ná osímánn mam méye éniŋ mot,
wá síŋ Nzamá;
amú ná wăá ke métsiŋŋ Nzamá ásí,
amú ná ó sés ki dɔ bɔ.
8 Éde é bot bá niŋ ané nlém mot ó ne bé sés vé Nzamá nlém mesán.
9 Ve mína,
mínăá niŋ amvála nlém mot ó ne,
fáve amvála ané Nsísim a ne,
dá é tɔɔ́ ná Nsísim Nzamá ó ntɔɔ́ ébe mína.
Ve ngé mot enziŋ a ne kaa ábelé Nsísim Kristo,
mot te a sés é mot weñ.
10 Ve ngé Kristo a ne ébe mína,
véa mot ye á nlém á ntɔɔ́ nwúán akála nsémm,
ve nsísim ó ne ntétéá mfá nzósoó.
11 Éde,
ngé Nsísim éñí a ngá wómo Yesus míwúán été ó tɔɔ́ ébe mína,
éñí émyen a ngá wómo Kristo Yesus míwúán été,
aa ye fe vé bíwúwúa mé ñúu byenan eniŋ ákála Nsísim weñ,
éwí ó tɔɔ́ ébe mína.
12 Édɔ ná,
á bɔbédzaŋ,
bĭí belé mot ye á nlém mvólá,
mfá ániŋ amvála ané mot ye á nlém aa kómo.
13 Amú ná ngé míní niŋ amvála ané mot ye á nlém aa kómo,
míní nkún nzu wú;
ve ngé ákála Nsísim,
mína ywíñ míbɔann mot ye á nlém,
mína ye niŋ.
14 Amú ná ébá bésesé Nsísim Nzamá wá wulu ya bɔ́,
bot béte ébɔ́ bé ne é bwán Nzamá.
15 Míní ndzí fá ñɔŋ nsísim etɔɔ́ oloá á mfá ábera ábúlán ákɔ wɔŋŋ,
fáve ná,
míní ñɔŋ yaá Nsísim wá vé etɔɔ́ bwán,
éwí wá bɔ bía ná bí yónán:
“Ábba!
Á Tará!”
16 Nsísim émyen aa vé ngañiá á nsísim wea ná bí ne é bwán Nzamá.
17 Éde,
ngé bwán,
bí ne fe beñɔŋ tsígá;
ngúrá mfá béñɔŋ tsígá Nzamá,
ve mfá mbɔ́ɔ́ beñɔŋ tsígá fufúlu bíabe Kristo,
bíí dzuk fe bíabe bɔ́,
á mfá ye ná bí ke ñɔŋ dúmá fufúlu bíabe bɔ́.
É dúmá dá nzu
18 Amú ma láŋ ná midzuúk míye é tám ñí,
băá yian kánan ya myɔ ya é dúmá é nkún léreban ébe bía.
19 Amú ná ñá nkómánn éniŋ é ne mvelann ó ne ábíra seŋ nléránn é bwán Nzamá.
20 Amú ná éniŋ é ne mvelann dá dzímle bébélá eban,
se amú nkómánn weñ ébyen,
fáve ákála éñe ñí a ngá téle eniŋ ya oyan.
21 Édɔ ná,
éniŋ é ne mvelann ébyen dá ye fe tɔbɔ filí ébe étɔɔ́ oloá ye ewúwúa ñúu mfá étɔɔ́ filí ye dúmá é bwán Nzamá.
22 Bía yem fá ná éniŋ é ne mvelann áse dá kɔŋle nsámá,
dá dzuk fe fufúlu ya mitéñ mí myeé anzukwíñ métám má;
23 se fáve édɔ etámm,
fáve ná,
ya fe bía bébyen,
bía ébá bí mbelé Nsísim ané ngap ósúá,
bía bía kɔŋle fe mílém myea été,
bíí bíra seŋ ya nkómánn etɔɔ́ bwán,
akoroga ye é ñúu dea.
24 Amú ná ya oyan te éwɔ bía tɔbɔ ya wɔ nkoránn;
ve,
oyan bé téa băá yana wɔ.
Amú dzé fá băá yana édí mot á ŋga yén yaá?
25 Ve ngé bía yana édí bĭá yén,
bía bíra dɔ seŋ ya edzíp.
26 Amvála te avɔ́ɔ́ ya avɔ́ɔ́ Nsísim wá wá nzu fe bía vwála ébe áteák dea;
amú ná ámvála bía yian yaglan bĭá yem dɔ,
fáve ná Nsísim ébyen wá dzaa mfá wea,
ya míkɔŋle mí ne kaa bifíá.
27 Ve éñí aa bíli milém mí bot,
aa yem osímánn Nsísim,
amú ná ané nkómánn Nzamá ó ne,
aa dzaa mfá mítɔ́pbán mí bot.
Nzá aa ne bía kána ébe édziŋŋ Nzamá
28 Éde bía yem ná,
á mfá ébá bá dziŋ Nzamá,
mam mése má vwála á mfá mvéáñ,
ébá béte ébɔ́ a lwée yaá amvála ané ntélán mam weñ ó ne.
29 Amú ná eé tára yem ébá aa tɔ́p,
ébɔ́ fe a ngá tára mana tsini ya nkómánn weñ,
ná bé bɔ amvála ané efonann é Mwán weñ é né,
mfá ábɔ Ntóó énzénzaŋ abwiññ bɔbéñaŋ.
30 Éde,
ébá tára yaá tɔ́p,
ébɔ́ fe a ngá lwée;
ébá bá a ngá lwée,
ébɔ́ fe a ngá tɔɔ́ nzósoó;
ébá bá a ngá tɔɔ́ benzósoó,
ébɔ́ fe a ngá vé dúmá.
31 Éde ébe é mam má,
bía ye dzó á yá?
Ngé Nzamá a ne é ngamm dea,
nzá aa ye bía ke á ngamm áyát?
32 Éñí eé ndzí dzɔgɔ é Mwán weñ émyen ya awú,
fáve ná aá kee ñí ákála bía bésesé,
éde amú dzé ăá ye fe bía vé mam mése á nzeze bíabe bɔ́?
33 Nzá aa ye sɔ́mán ébá Nzamá á tɔ́p yaá?
Nzamá éñe a ne éñí aa tɔɔ́ bot nzósoó.
34 Nzá aa ye vé meku?
Kristo Yesus éñe a ne éñí a ngá wú;
ve ádaŋdaŋ ná,
éñe a ngá wómo ya ná éñe a tɔɔ́ á mfá méyóm Nzamá,
éñe fe aa yaglan ákála dea.
35 Nzá aa ye bía kána ébe édziŋŋ Kristo?
Ye midzuúk,
ye eywiññ,
ye ndzéŋán bot ásí,
ye nzeñ,
ye etɔɔ́ swéswéññ,
ye áŋgónó dzam,
ye nzwaokeŋ?
36 Amvála ané é ntɔɔ́ ntsilann ná:
“Ákála dwe édɔ bí ntɔɔ́ ntélán áwú áyóp mos míse;
bé ñɔŋ yaá bía amvála ané mítómá bá ke kík!”
37 Fáve ná mfá mam méte mése,
bía daŋ ébá bé wún yaá ébe éñí a ngá dziŋ bía.
38 Amú ná ma yem bébélá ná,
atwaa awú,
atwaa eniŋ,
atwaa baángel,
atwaa bidzwée,
atwaa édí ye é tám ñí,
atwaa édí é nkún nzu,
atwaa menguu,
39 atwaa édí ye ó yóp,
atwaa édí ye édwá ó sí,
kaa dzóm enziŋ efé ye é ne mvelann é sés bía kána ébe édziŋŋ Nzamá é ne ébe Kristo Yesus Ntí wea.