Nganán ya alúk
7
Á bɔbédzaŋ,
ye mínăá yem (ma kɔ́bɔ fá ya ébá bá yem atsiŋŋ) ná atsiŋŋ dá dzwée mot fáve é tám a ngén a téa?
2 Akála ná é miningá a ne álúk,
a tsií ya átsiŋŋ álúk é tám nnóm aa téa;
ve ngé nnóm aa wú,
a ne filí ébe átsiŋŋ alúk nnóm.
3 Édɔ ná,
é tám nnóm aa téa;
ngé aa yén fám fé,
bá ye ñí lwée ná mbɔ medzíán;
ve ngé nnóm aa wú,
a ne filí ébe atsiŋŋ te,
ó véa ngé aa lúk fám fé a sés mbɔ medzíán.
4 É bɔbédzaŋ bam ntéññ mbɔ́ɔ́ fe,
mína mína tɔbɔ fe nwúán á mfá atsiŋŋ ébe é ñúu Kristo,
ná míní tɔbɔ nlatán mínabe mot mfé,
ébe éñí a ngá wómo á miwúán été,
ná bía ye wúm bibumá á mfá Nzamá.
5 Amú ná é tám bí ngá niŋ ané mot binam,
atsiŋŋ é ngá bɔ ná bívéé bíye á nsémm bí bɔ eséññ mésúk mé ñúu mea été,
ná bí wúm bibumá bíye áwú.
6 Ve éndagá bí tɔbɔ yaá filí mfá atsiŋŋ niané bíá wú ébe é dzam é ngá ká bía,
á mfá ye ná bí séan á mfefeñ eniŋ,
se atsiŋŋ ntsilann ye á nnomm eniŋ.
Melúmán ya nsémm
7 Éde bía ye dzó á yá?
Ye ná atsiŋŋ é ne nsémm?
É sés bɔban amvála enziŋ!
Fáve ná mĕé mbé yem nsémm,
ngé atsiŋŋ mé bɔ kaa dɔ;
amú ná mĕé mbé yem miñamle,
ngé atsiŋŋ é bɔ kaa ádzó ná:
“Wăá ye ñamle.”
8 Ve nsémm wá weé ñɔŋ afóo akála mvéná,
ané mé ngá sɔ́ ya ma miñamle memvála mése;
amú ná kaa atsiŋŋ,
nsémm o ne nwúán.
9 Éde,
tám enziŋ ma me ngá niŋ kaa atsiŋŋ;
ve niané mvéná é ngá sɔ́,
ané nsémm ó ngá belé eniŋ,
10 éde ma me ngá wú.
Ané me ngá ñú táŋ ná é mvéná eé mbé mfá éniŋ,
é ngá súgan awú mfá wɔm.
11 Amú ná nsémm wá ñɔŋ afóo akála mvéná,
éde ó ngá duk ma,
ya ákála deñ ó ywíñ fe ma.
12 Édɔ ná,
atsiŋŋ é ne eki,
mvéná da e ne fe eki,
ya nzósoó ya fe mvéáñ.
13 Éde,
ye édí é ne mvéáñ é veŋan yaá áwú mfá wɔm?
É sés bɔban amvála enziŋ!
Fáve ná nsémm á mfá ye ná ó léreban ná ó ne nsémm,
éwɔ wá súgan áwú ya nzenn ye édí é ne mvéáñ ná akála mvéná,
nsémm ó daŋ bera nzu bɔ áŋgónó nsémm.
14 Amú bía yem ná atsiŋŋ é ne édí ye á nsísim;
ve ma me ne mot binam,
bé kuan yaá fe ma ané óloá nsémm.
15 Amú ná édí ma bɔ,
măá wók dɔ;
măá bɔ fá édí ma kómo bɔ,
fáve ná,
édí ma víni,
édɔ ma bɔ.
16 Éde,
ngé ma bɔ édí măá kómo bɔ,
ma yébe ná atsiŋŋ é ne mvéáñ.
17 Ve,
éndagá se fe ma ma bɔ dɔ,
fáve ná nsémm ó tɔɔ́ ébe ma.
18 Amú ma yem ná ébe ma,
dá yíli ná á nlém wɔm été,
dzam enziŋ ye é ne mvéáñ dĕé tɔɔ́ ma été;
éde ná nkómánn éwɔ ó ne ébe ma,
ve se ábɔ édí é ne mvéáñ!
19 Éde măá bɔ fá é mvéáñ ma kómo bɔ,
fáve ná ábé măá kómo bɔ,
édɔ ma bɔ.
20 Ngé édí măá kómo,
édɔ ma bɔ,
se fe ma ma bɔ dɔ,
fáve ná nsémm ó tɔɔ́ ébe ma.
21 Édɔ ná,
ma koan ya atsiŋŋ dí,
ná meé kómo bɔ mvéáñ,
abé é ne ébe ma.
22 Amú ná ma sán ya atsiŋŋ Nzamá ya é mot a ne ma été,
23 ve ma yén amvála atsiŋŋ afé mésúk mé ñúu mam été,
deé lúman ya atsiŋŋ ye ósímánn wɔm,
dá biñ fe ma nkómm ye átsiŋŋ nsémm é tɔɔ́ ma mésúk mé ñúu été.