É ndem édziŋŋ Nzamá ébe bía
5
É tɔɔ́ ná,
bí tɔbɔ yaá benzósoó amú mbwínánn,
ébe Nzamá bí ntɔɔ́ mvwaá akála Ntí wea Yesukristo.
2 Amú ná ébe éñí fe bí mbelé añíí ákála mbwínánn mvɔmm te,
édɔ bí yém fe été,
bía vága fe ya é dúmá Nzamá édɔ é ne oyan.
3 Se fáve édɔ etámm,
ya fe ná bía vága fe á nyénánn midzuúk été,
bíí yem ná midzuúk myá vé étɔɔ́ mbán;
4 Éde étɔɔ́ mbán dá dá bɔ mot ná á kyaba mikat,
nkyabán mikat wá,
oyan;
5 oyan wá wăá vé osoán amú ná édziŋŋ bé swii yaá bía dɔ mílém myea été akála Mfúfúp Nsísim bé ngá vé bía.
6 Amú,
ákoan ná bí ngén ateák,
éde é tám e ngá yian,
Kristo a ngá wú akála é bot băá kɔ Nzamá wɔŋŋ.
7 Amú é ne ayéñ ná mot enziŋ á wú akála nzósoó mot;
atwaa tám enziŋ mot enziŋ ñí a ne yébe ná aa wú akála mbamba mot.
8 Ve Nzamá ñí aa lére édziŋŋ deñ ébe bía ná Kristo a ngá wú ákála dea,
ákoan bí ngén bebɔ misémm.
9 Éde ádaŋdaŋ ná,
bí ntɔɔ́ benzósoó éndagá amú mékií meñ,
bía ye tɔbɔ nkoránn ákála deñ ébe méyéá Nzamá.
10 Amú ná ngé é tám bí mbé minzínzíŋŋ Nzamá bí ngá bera ke belé elat ákála áwú é Mwán weñ,
ádaŋdaŋ ná niané bí bera yaá ke belé elat,
bía ye tɔbɔ nkoránn ákála éniŋ dzeñ.
11 Se fáve édɔ etámm,
ya fe ná bía vága ébe Nzamá amú Ntí wea Yesukristo,
ákála éñe éndagá bí ñɔŋ yaá nkomann okaŋŋ bikwan.
Adán bá Yesukristo
12 Édɔ ná,
amvála ané nsémm ó ngá ñíi éniŋ ákála mot mbɔ́ɔ́,
awú dá akála nsémm,
néa éñe awú é ngá mana fe ñeŋ ébe bot bése,
amú ná bésesé bá bɔ nsémm.
13 Amú ná nsémm ó mbé éniŋ kaa ná atsiŋŋ é bɔ,
ve é tám atsiŋŋ é sés,
băá ñú nsémm táŋ.
14 Ve déá,
atéé ye ébe Adán akekwíñ ébe Moisés awú é ngá dzwée atwaa ébá béé ndzí bɔ nsémm ámvála Adán a ngá tsam atsiŋŋ,
éñí a ne efonann ye é mot a mbé ná a nkún nzu.
15 Ve é dás Nzamá dăá sian amvála ané ntsamann atsiŋŋ te;
amú ná ngé ákála ntsamann atsiŋŋ mot mbɔ́ɔ́ abwiññ bot daá wú,
dá daŋdaŋ ná ábwará Nzamá ya é dás deñ ákála ábwará mot mbɔ́ɔ́,
Yesukristo,
bí ngá fwíige mfá abwiññ bot.
16 Éde nsémm mot mbɔ́ɔ́ bé sés kanan ya wɔ́ ya dás te,
amú ná nkíkgán misaŋ wá sɔ́ akála nsémm mbɔ́ɔ́ mfá meku,
ve dás dá dá sɔ́ akála abwiññ ntsamann metsiŋŋ mfá átɔɔ bot benzósoó.
17 Amú ná,
ngé ákála ntsamann atsiŋŋ mot mbɔ́ɔ́,
éñe awú é ngá nzu dzwée,
ntéññ avé akála mot mbɔ́ɔ́,
Yesukristo,
bot bá ye daŋdaŋ dzwée éniŋ,
ébá bá ñɔŋ ábwiññ abwará ya dás ye á nzósoó.
18 Édɔ ná amvála ané ntsamann metsiŋŋ mbɔ́ɔ́ ó ngá súgan bɔ méku bot bése,
amvála te fe mbɔann nzósoó mot mbɔ́ɔ́ ó ngá súgan tɔɔ́ bot bése benzósoó mfá eniŋ.
19 Amú ná ámvála mbɔann melɔ́ mot mbɔ́ɔ́,
é ngá súgan tɔɔ́ abwiññ bot bebɔ misémm;
amvála te fe mbɔann mewók mot mbɔ́ɔ́,
abwiññ dá ye súgan tɔbɔ benzósoó.