2 Ané bí ngá daŋ á byéa ye Ádramitio ó mbé ná ó nkún ke mébóŋŋ méye Ásia,

éde bí ngá tée;

Aristarko mwann Masedonio ye á Tesalonika ñí a mbé fe bíabe bɔ́.

3 É mos ó ngá belan véa,

ané bí ngá sim ósí á Sidón;

Julio a mbé esós ya Pablo,

eé lík ná á ke ébe bemvwíññ ná bé belan ya ñí.

4 Atéé ye ó véa,

éde bí ngá daŋ á byéa,

bí sáale evúŋ á Tsípre á mféŋŋ,

amú ná bivúŋ bí ngá sɔ́ bía ósú.

5 Niané bí ngá kígán máŋ,

bí ŋga wulu bebeñ á nsá Silisia ya Panfilia,

ané bí ngá sian á Mira,

kísoan ye á Lisia.

6 Éde kaba a ngá koan ya byéa ye Álejandria ó véa ná wá ke Ítalia.

Ané a ngá dea bía été.

7 Bí ŋga wulu otaktak ya ndzuúk abwiññ melú,

éde bí ngá lot nzósoó á Gnido akála ná evúŋ dĕé ngá lík ná bí tsíni ósú.

Ané bí ngá sáale evúŋ á Kreta á mféŋŋ asú ye asú Salmón.

8 Bí tsíni nsá ya nsá ya ndzuúk,

bí sian vóm ó mbé eyola ná Mbamba Mebóŋ,

bebeñ á kísoan Lasea.

9 Ákoan ekena é bíra yaá mana dzímle tám,

é ntɔɔ́ fe ededea aŋgónó,

atwaa é tám bá ki bidzí da é lot yaá fe.

Pablo á ŋga lép bɔ́,

10 eé dzó ná,

“Á bot,

me téa ná ekena é nkún bɔ ya ndzuúk ya abwiññ adzímlé,

se fáve á mfá mibaga ya byéa;

ve,

ya fe á mfá biniŋ byea.”

11 Ve,

kaba ñí a ngá daŋ yébe é dzam é mot a mbé ya byéa,

ya ndulu byéa bé ngá dzó,

álot édí Pablo a ngá dzó.

12 Dĕé mbé mvéáñ ná bí lot tám akos ya avép ébe abóŋ te,

ané abwiññ bot é ngá kík ná bí kólo ya byéa ó véa,

á mfá ye ná bí vak ngé bí ne sian á Fenise,

abóŋ ye á Kreta,

édí dá dága á nkeññ mfá méyéá ya ókwiñn á mfá méyéá,

ná bí lot metám mé avép ó véa.

13 Éde,

niané mwann evúŋ ye nkeññ a ngá lot,

ané bé ngá tém ná bé mbelé é dzam bé ngá kómo;

éde bé ngá vea meñílí,

bé ŋga lot kíŋlé bebeñ á Kreta.

14 Ve abwiññ tám deé ndzí lot,

ané evúŋ ókos bá lwée ná Eurakilón é ngá nzu é yimi byéa.

15 Ané é ngá tára ná dá dulu byéa,

bía bĭí mbé ki fe kam ná evúŋ é táa ke ya byéa;

éde bí ngá dzɔgɔ,

bí lík ná evúŋ é ke ya bía.

16 É tám byéa ó ngá sian é vóm ó ngá sáale evúŋ á mwann etuŋŋ a tɔɔ́ eyola ná Klauda,

ya nguu bí mbé biñ élenn dá koro bot,

ákoan bí dzuk yaá.

17 Niané bé ngá dea elenn te á byéa été,

bé ŋga ká byéa ya miwula béé lot ya myɔ ásí.

Ve béé kɔ wɔŋŋ ná bé nza ke bók ó sí á Sirte,

éde bé ngá sili mewom,

[béé wea óswíñ é dzóm dá sim byéa mbíí],

evúŋ é ŋga ke dá sɔ́gle bɔ́ néa.

18 É mos ó ngá belan véa,

okos weé bíra bía suk,

ané bé ngá tára saga mibaga.

19 Álú léa éde bé ngá mana wea byém bíye á byéa ó máŋ ya é mó meba bébyen.

20 Ané táŋ abwiññ melú,

nlódzóp ya atéteñ bí ngá bɔ kaa ákwíñ,

mora mbéa tám ñí a ngá laŋan fe,

akekwíñ bí ngá dzímle oyan óse ná bí ne tsíni ya eniŋ.

21 Ákoan bí lot yaá abwiññ tám kaa ákómo dzí,

éde Pablo a ngá tébe tételé énzénzaŋ deba a dzóo ná:

“Á bot,

ngé míní béá ma,

bía kaa átée á Kreta,

ngé bĭá mana ki dzuk aaná,

ngé ki ádzímle byém.

22 Éde áwola dí,

ma lép mína ná míní ñɔŋ nguu,

amú ná mot enziŋ ye ébe mína ăá ye dzímle éniŋ dzeñ,

fáve byéa etámm.

23 Akála ná álú dí,

é Nzamá ma kaŋ,

éñe fe a ne ya ma,

ángel weñ á yéne ébe ma,

24 eé dzó ná:

‘Á Pablo,

o táa kɔ wɔŋŋ,

dá yian ná bé ke wa téle ébe ású Sesar;

yénŋe fe ná Nzamá a mana yaá wa kee bíniŋ é bot bése mínabe bɔ́ mína wulu á máŋ été.’

25 Édɔ é ne ná,

á bot,

biñŋán nguu!

Amú me tɔɔ́ ya Nzamá mebúnn ná dá ye bɔ ásesé ámvála á dzó ma.

26 Ve dá yian ná bí sim etuŋŋ enziŋ.”

27 Niané álú awóm ya nii é ngá kwíñ,

evúŋ deé sɔ́gle bía ó máŋ Adriátiko,

ákoan ná á ntɔɔ́ ané énzénzaŋ alú,

éde bedulu byéa bé ngá tém ná bé ŋga kwíñ yaá sí enziŋ bebeñ.

28 Ané bé ngá vak abímm máŋ mé mbé edwá,

bé koan ná é mbé táŋ mitéññ mewóm mé beáñ.

Éde bé ngá bera tsíni ósú avítsaŋ,

bé bera vak,

ané bé ngá koan ya awóm mitéññ ya mitéññ mí tán.

29 Éde béé kɔ wɔŋŋ ná bé nza ke bók á mekwá áyóp,

ané bé ngá wea meñílí mé nii óswíñ métsínn mé byéa,

bé ŋga seŋ ná kírí eé léne.

30 Bedulu byéa béé dzéŋ ná bé túp á byéa été,

éde bé ngá sili élenn dá koro bot,

béé lére ané bé nkún wea meñílí méye mendéŋ mé byéa óswíñ.

31 Éde Pablo a ngá dzó kaba,

ya benzima ná:

“Ngé é bot bá,

ébɔ́ kaa átɔbɔ á byéa été,

míní sés niŋ.”

32 Véa,

benzima bé ngá kík míwula mí mbé mí tsini ya élenn dá koro bot,

bé lík ná é ku óswíñ.

33 Éyɔŋ a ngá bɔ ná kírí é nkún léne,

Pablo á ŋga bíra dzaa bésesé ná bé dzí bídzí,

eé dzó ná:

“Álú awóm ya nii édɔ dí míní tɔɔ́ evéveññ,

míní tɔɔ́ fe kaa ádzí,

kaa ki ákyak dzóm enziŋ.

34 Édɔ ma lép mína ná míní dzí,

amú ná dá yian fe mfá é mvwaá denan;

akála ná nkɔ́ esií enziŋ ye ó ne mína á nló,

wá wăá ye dzímle mot enziŋ ye míní né.”

35 Niané a ngá mana dɔ dzó,

éde a ngá ñɔŋ mfémm,

á ŋga vé Nzamá akíba ósú bot bése,

ané a ngá bák wɔ́ a tára ná aa dzí.

36 Éde bésesé bé ngá biñ nguu,

bá bé ŋga dzí fe.

37 Á byéa été bía bésesé bí mbé bot mitet mí beáñ ya mewóm zaŋgbéá ya bot bé saman.

38 Véa,

niané bí ngá mana dzéñ ya bidzí,

bé ŋga wea misɔ́ mí trigo óswíñ á mfá ye ná byéa ó bɔ ovovos.

39 É tám kírí e ngá léne,

ébɔ́ kaa fe áyem sí te,

ve bé ngá yén enzwánzwá enziŋ oyaáp eé belé nsá,

éde bé ngá dzó ná bá beŋ vak áke ya byéa ó wéñ ngé é ne bɔban.

40 Ané bé ngá mana kík meñílí,

bé lík mɔ á máŋ été,

etéññ te ébyen bé mana fe sulu méngáp mé ngá fét byéa,

bé bére awom ye á nló byéa évúŋ,

bé ŋga lére byéa á mfá á kíníŋé.

41 Ve,

éde byéa ó ngá ke bók á tómbá áyóp,

énzénzaŋ nden é beáñ été,

é tám mendéŋ mé byéa mé ngá ke faman kaa áfógan,

metsínn mé byéa má mé ŋga bóro ya nguu mikebá.

42 Éde nkíkgán bénzima ó mbé ná bá ywíñ mibok,

á mfá ye ná mbɔ́ɔ́ enziŋ ó nzá túp ya ndzwá.

43 Ve kaba ñí eé kómo koro Pablo,

ané a ngá kam ya bɔ́ nkíkgán te.

Éde kaba a ngá mánan ná é bot bá yem dzwá,

bé tára ku óswíñ bé kéñ kwíñ ó sí,

44 ané é táŋ da buk,

bevɔ́ɔ́ bé kéñ mébámm áyóp,

ébá bevɔ́ɔ́ bá á byém binziŋ bíye á byéa.

Amvála te édɔ bot bése bé ngá sian ósí mvwaá.